ໃນວັນທີ່29ຕຸລາ2019ນີ້ ກອງບັນຊາການ ປກສ ແຂວງສະຫວັນນະເຂດໄດ້ຈັດກອງປະຊຸມປຶກສາຫາລື ກະກຽມສະເຫຼີມຫຼອງ ວັນແຫ່ງຊາດຕ້ານຢາເສບຕິດປີ 2019 ຄົບຮອບ 18 ປີ(12ຕຸລາ2001-12ຕຸລາ2019)ໂດຍການເຂົ້າຮ່ວມຂອງທ່ານປອ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ ທັງເປັນປະທານຄະນະກໍາມະການກະກຽມສະເຫຼີມສະຫຼອງວັນແຫ່ງຊາດຕ້ານຢາເສບຕິດ, ທ່ານ ພັອ ຄໍາພົນສີຫາປັນຍາ ຫົວໜ້າກອງບັນຊາການ ປກສ ແຂວງ, ມີບັນດາຄະນະພັກ-ຄະນະບັນຊາ ກອງບັນຊາການ ປກສ ແຂວງ, ຫົວຫນ້າພະແນກ, ຮອງພະແນກການອ້ອມຂ້າງແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ

ທ່ານ ພັທ ຄຳສີ ທູນທະວົງສັກ ຫົວໜ້າຫ້ອງຕຳຫຼວດ ປກສ ແຂວງໄດ້ຜ່ານບົດລາຍງານແຜນການກະກຽມສະເຫຼີມສະຫຼອງ ວັນແຫ່ງຊາດຕ້ານຢາເສບຕິດ ໂດຍອີງຕາມ ແຈ້ງການຂອງຫ້ອງການກວດກາ ແລະ ຄວບຄຸມຢາເສບຕິດ ເພື່ອປຶກສາຫາລື ແລະ ເອກະພາບກັນໃນທາງຈັດຕັ້ງປະຕິບັດ, ບັນດາເນື້ອໃນພິທີສະເຫຼີມສະຫຼອງ, ຂະບວນການ, ກິດຈະກຳຕ່າງໆ, ການປ້ອງກັນເວນຍາມ ຕະຫຼອດຮອດການຈັດຕັ້ງປະຕິບັດ ຈາກນັ້ນກໍ່ໄດ້ຜ່ານແຈ້ງການຂອງຫ້ອງການກວດກາ ແລະ ຄວບຄຸມ ຢາເສບຕິດ, ກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບສະບັບເລກທີ 685/ຫກຄສ, ລົງວັນທີ 18ກັນຍາ2010 ວ່າດ້ວຍການສະເຫຼີມສະຫຼອງວັນແຫ່ງຊາດຕ້ານຢາເສບຕິດຄົບຮອບ 18ປີ, ຂໍ້ຕົກລົງ ຂອງທ່ານເຈົ້າແຂວງໆ ສະຫວັນນະເຂດ ສະບັບເລກທີ 1752/ຈຂ,ສຂ ລົງວັນທີ່22ຕຸລາ2019ວ່າດ້ວຍການແຕ່ງຕັ້ງຄະນະກໍາມະການກະກຽມພິທີສະເຫຼີມສະຫຼອງ ແລະ ລາຍງານແຜນການກະກຽມສະເຫຼີມສະຫຼອງວັນດັ່ງກ່າວເຊິ່ງຈະໄດ້ຈັດຂື້ນໃນວັນທີ່ 1ພະຈິກ2019 ທີ່ຈະມາເຖິງນີ້

ເພື່ອປະຕິບັດແນວທາງນະໂຍບາຍຂອງພັກ, ກົດຫມາຍຂອງລັດ ແລະ ຂໍ້ກໍານົດຕ່າງໆ ກ່ຽວກັບບັນຫາຢາເສບຕິດ, ປຸກລະດົມຂົນຂວາຍເອົາທຸກຊັ້ນຄົນ, ທຸກເພດໄວໃນທົ່ວສັງຄົມເຂົ້າຮ່ວມຢ່າງກວ້າງຂວາງ ໃນຂະບວນການຄວບຄຸມ, ສະກັດກັ້ນ ແລະ ຕ້ານຢາເສບຕິດ, ສະແດງເຖິງເຈດຈໍານົງ ແລະ ການຮ່ວມແຮງຮ່ວມໃຈກັນຕໍ່ຕ້ານຢາເສບຕິດ ຊຶ່ງເປັນໄພຄຸກຄາມຕໍ່ການພັດທະນາເສດຖະກິດ-ສັງຄົມ ແລະ ການພັດທະນາຊັບພະຍາກອນມະນຸດ ໂດຍສະເພາະ ໄວຫນຸ່ມ-ຊາວຫນຸ່ມ ທີ່ເປັນຫນໍ່ແຫນງຂອງຊາດ, ໂຄສະນາເຜີຍແຜ່ໃຫ້ທຸກຊັ້ນຄົນໃນສັງຄົມ, ໄດ້ຮັບຮູ້, ເຂົ້າໃຈລະບຽບກົດຫມາຍ ແລະ ຜົນຮ້າຍຂອງຢາເສບຕິດ ເພື່ອເຮັດໃຫ້ບັນຫາຢາເສບຕິດຫຼຸດໜ້ອຍຖອຍລົງ ແລະ ໝົດໄປຈາກສັງຄົມ.

ພາບ-ຂ່າວ: ສີສະເຫຼີມສັກ ສີມມາລາ
savannakhet medialaos