ສະຫະພັນກຳມະບານແຂວງສະຫວັນນະເຂດ ຊຶ່ງນຳໂດຍ ທ່ານ ຄຳຕັນ ສີໂພໄຊ ຮອງປະທານຄະນະບໍລິຫານງານສະຫະພັນກຳມະບານແຂວງ ພ້ອມດ້ວຍຂະແໜງການທີ່ກ່ຽວຂ້ອງ ໄດ້ມີການສຶບຕໍ່ລົງເຜີຍແຜ່ມະຕິກອງປະຊຸມຄົບຄະນະບໍລິຫານງານສະຫະພັນກຳມະບານແຂວງ 6 ເດືອນຕົ້ນ ປີ 2019 ພ້ອມທັງຊຸກຍູ້ວຽກງານກຳມະບານຮອບດ້ານໃຫ້ແກ່ ສະຫະພັນກຳມະບານເມືອງທ່າປາງທອງ, ເມືອງຊົນນະບູລີ ແລະ ເມືອງໄຊພູທອງໃຫ້ໄດ້ຮັບຮູ້ຢ່າງທົ່ວເຖິງ ແລະ ທັງເປັນການທາບທາມ ເອົາບັນດາຄຳຄິດ-ຄຳເຫັນ ຂອງສະມາຊິກກຳມະບານ ເພື່ອມາດັດປັບລະບຽບກອງທຶນ ໂດຍມີຄະນະປະຈຳພັກເມືອງ, ກຳມະການພັກເມືອງ, ປະທານ, ຮອງປະທານ, ຄະນະບໍລິຫານງານສະຫະພັນກຳມະບານເມືອງ ຕະຫຼອດສະມາຊິກກຳມະບານພາຍໃນເມືອງດັ່ງກ່າວ ເຂົ້າຮ່ວມຈຳນວນ 335 ທ່ານ, ຍິງ 185 ທ່ານ.

ໃນພິທີ ທ່ານ ຄຳຕັນ ສີໂພໄຊ ກໍ່ໄດ້ມີການເຜີຍແຜ່ມະຕິກອງປະຊຸມ 6 ເດືອນຕົ້ນປີ 2019 ແລະ ໂອ້ລົມເນັ້ນໜັກບາງບັນຫາທີ່ສະຫະພັນກໍາມະບານເມືອງຈະຕ້ອງໄດ້ເອົາໃຈໃສ່ ເປັນຕົ້ນແມ່ນວຽກງານການສຶກສາອົບຮົມທາງດ້ານການເມືອງ-ແນວຄິດ ໃຫ້ແກ່ສະມາຊິກກຳມະບານ, ກຳມະກອນ ໃຫ້ມີລະບຽບວິໄນໃນການອອກແຮງງານ, ມີສະຕິເຄົາລົບລະບຽບກົດໝາຍ ແລະ ການຈັດຕັ້ງ ໂດຍຕິດພັນກັບການປົກປ້ອງສິດຜົນປະໂຫຍດ ຂອງສະມາຊິກກຳມະບານທີ່ຢູ່ໃນຄວາມຮັບຜິດຊອບຂັ້ນຂອງຕົນໃຫ້ໄດ້ຢ່າງທົ່ວເຖິງ. ພ້ອມດຽວກັນນີ້ທ່ານກໍ່ຍັງໄດ້ມີການທາບທາມ ເອົາຄຳຄິດ-ຄຳເຫັນຂອງບັນດາສະມາຊິກກຳມະບານ ເພື່ອເປັນບ່ອນອີງໃນການນຳມາດັດປັບລະບຽບກອງທຶນ ກຊທ ໃຫ້ມີຄວາມສອດຄ່ອງ ແລະ ເເທດເໝາະກັບແຕ່ລະໄລຍະຕື່ມອີກ.

ຂ່າວ – ພາບ : ວັນນະເລດ ມະນີວົງ
savannakhet medialaos