ກອງປະຊຸມດໍາເນີນຊີວິດການເມືອງຄົບຄະນະບໍລິຫານງານພັກເມືອງພີນເປີດກວ້າງທ້າຍສະໄໝ

0
254

ກອງປະຊຸມດໍາເນີນຊີວິດການເມືອງຄົບຄະນະບໍລິຫານງານພັກເມືອງພີນເປີດກວ້າງທ້າຍສະໄໝ ໄດ້ຈັດຂຶ້ນໃນລະຫວ່າງວັນທີ 23-25 ຕຸລາ 2019 ທີ່ຜ່ານມາຢູ່ທີ່ສະໂມສອນເມືອງພີນ. ໂດຍພາຍໃຕ້ການເປັນປະທານຂອງ ສະຫາຍ ວົງເພັດ ໄຊສະຫງວນ ຮອງເລຂາພັກແຂວງ ຫົວໜ້າຄະນະໂຄສະນາອົບຮົມແຂວງສະຫວັນນະເຂດ , ສະຫາຍ ສາລີ ວິນລາວັນ ວ່າການເລຂາພັກເມືອງ ເຈົ້າເມືອງໆພີນ, ມີບັນດາສະຫາຍຄະນະຮັບຜິດຊອບບັ້ນດໍາເນີນຊີວິດການເມືອງ, ອະນຸກໍາມະການເນື້ອໃນຂັ້ນແຂວງເຂົ້າຮ່ວມຕິດຕາມ, ພ້ອມມີບັນດາຄະນະປະຈໍາພັກເມືອງ, ກໍາມະການພັກເມືອງ, ເລຂາ-ຮອງເລຂາຄະນະພັກຮາກຖານ, ເລຂາ-ຮອງເລຂາໜ່ວຍພັກອ້ອມຂ້າງເມືອງ, ຄະນະພັກກອງບັນຊາການ ປກຊ-ປກສ, ເລຂາ-ຮອງເລຂາຄະນະພັກຮາກຖານກຸ່ມບ້ານ, ບ້ານ, ເລຂາ-ຮອງເລຂາໜ່ວຍພັກບ້ານ, ພະນັກງານບໍານານອາດີດການນໍາຂອງເມືອງເຂົ້າຮ່ວມທັງໝົດ 180/24 ສະຫາຍ.

ໃນພິທີ ສະຫາຍ ສາລີ ວິນລາວັນ ວ່າການເລຂາພັກເມືອງ ເຈົ້າເມືອງໆພີນໄດ້ສະເໜີລາຍງານສະພາບການຊີ້ນໍາ-ນໍາພາຂອງອົງຄະນະພັກເມືອງພີນໃນໄລຍະ 05 ປີຜ່ານມາໃນການຈັດຕັ້ງຜັນຂະຫຍາຍແນວທາງນະໂຍບາຍຂອງພັກ-ລະບຽບກົດໝາຍຂອງລັດ, ເປັນຕົ້ນແມ່ນການເຄື່ອນໄຫວວຽກງານດ້ານການເມືອງ-ແນວຄິດໂດຍໄດ້ນໍາເອົາເນື້ອໃນຈິດໃຈມະຕິກອງປະຊຸມໃຫຍ່ ຄັ້ງທີ X ຂອງພັກ, ຄັ້ງທີ VIII ຂອງອົງຄະນະພັກແຂວງ, ຄັ້ງທີ X ຂອງອົງຄະນະພັກເມືອງ ແລະແນວທາງແຜນນະໂຍບາຍຂອງພັກ, ມະຕິ, ຄໍາສັ່ງຕ່າງໆຂອງພັກ-ລັດລົງໄປຈັດຕັ້ງເຜີຍແຜ່ເຊື່ອມຊືມໃຫ້ສະມາຊິກພັກ, ພະນັກງານຫຼັກແຫຼ່ງ, ພະນັກງານລັດທະກອນ, ທະຫານ-ຕໍາຫຼວດຕະຫຼອດຮອດປະຊາຊົນບັນດາເຜົ່າໃນທົ່ວເມືອງພີນ. ຄະນະບໍລິຫານງານພັກເມືອງພີນ ໄດ້ຮັບການເລືອກຕັ້ງຈາກຜູ້ແທນກອງປະຊຸມໃຫຍ່ ຄັ້ງທີ X ໃນຄັ້ງວັນທີ 29-30 ກໍລະກົດ 2014 ເພື່ອເປັນຫຼັກແຫຼ່ງຊີ້ນໍາ-ນໍາພາເປັນເວລາ 5 ປີ, ກອງປະຊຸມໄດ້ເລືອກເອົາຄະນະບໍລິຫານງານພັກເມືອງ ຈໍານວນ 25/3 ສະຫາຍ, ໃນນັ້ນຄະນະປະຈໍາ 7/1 ສະຫາຍ.

ເຊີ່ງເປັນແກນນໍາໃນລະບົບການເມືອງແຕ່ລະຂັ້ນເພື່ອຊີ້ນໍາ-ນໍາພາເຄື່ອໄຫວຈັດຕັ້ງປະຕິບັດວຽກງານຕ່າງໆຕາມພາລະບົດບາດໜ້າທີ່ຂອງຕົນທີ່ໄດ້ກໍານົດໄວ້ໃນລະບຽບຂອງພັກປະຊາຊົນປະຕິວັດລາວ. ໃນຈໍານວນ 25/3 ສະຫາຍ ໄດ້ຖືກຍົກຍ້າຍ, ຮັບບໍານານ ແລະເສຍຊີວິດມີຈໍານວນ 4 ສະຫາຍ, ປະຈຸບັນຄະນະບໍລິຫານງານພັກເມືອງ ມີ 21/1 ສະຫາຍ; ໃນນັ້ນ ຄະນະປະຈໍາ 6/1 ສະຫາຍ. ປະຈຸບັນທົ່ວເມືອງພີນ ມີ 17 ຮາກຖານພັກ, ມີໜ່ວຍພັກທັງໝົດ 136 ໜ່ວຍພັກ ທຽບໃສ່ກອງປະຊຸມຄັ້ງທີ X ເພີ່ມຂື້ນ 41 ໜ່ວຍພັກ, ມີສະມາຊິກພັກທັງໝົດ 1.981/454 ສະຫາຍ ເພີ່ມຂື້ນ 724/224 ສະຫາຍ, ສະມາຊິກພັກສົມບູນໄດ້ຮັບບັດສະມາຊິກພັກແລ້ວ 759/178 ສະຫາຍ = 38,84 % ຂອງຈໍານວນສະມາຊິກພັກສົມບູນ. ຈາກນັ້ນ ກໍ່ໄດ້ຮັບຟັງການໂອ້ລົມແນະນໍາກ່ຽວກັບວິທີຈັດຕັ້ງປະຕິບັດແຕ່ລະຂັ້ນຕອນ, ພ້ອມນັ້ນໃນທີ່ປະຊຸມຍັງໄດ້ເຊື່ອມຊືມເອກະສານສໍາຄັນຕ່າງໆທີ່ກ່ຽວຂ້ອງໃນບັ້ນດໍາເນີນຊີວິດການເມືອງ. ໃນການດໍາເນີນທາບທາມໂຄງປະກອບຄະນະບໍລິຫານງານພັກເມືອງພີນໃນແຕ່ລະຂັ້ນ ເຊີ່ງຜົນການທາບທາມມີຄື: ຄະນະພັກໃນຈໍານວນ 50/9 ສະຫາຍ ຜູ້ທີ່ໄດ້ຄະແນນ 20% ຂື້ນມີ 50/9 ສະຫາຍ ໃນນັ້ນຄະນະພັກຊຸດເກົ່າ 21/3 ສະຫາຍ, ຄະນະປະຈໍາມີເປົ້າໝາຍສະເໜີໃໝ່ 16/2 ສະຫາຍ, ເລຂາມີເປົ້າໝາຍສະເໜີໃໝ່ 21/3 ສະຫາຍ, ຮອງເລຂາມີເປົ້າໝາຍສະເໜີໃໝ່ 18/2 ສະຫາຍ, ປະທານກວດກາມີເປົ້າໝາຍສະເໜີໃໝ່ 16/1 ສະຫາຍ ແລະຮອງປະທານກວດກາມີເປົ້າໝາຍສະເໜີໃໝ່ 23/6 ສະຫາຍ. ສັງລວມແລ້ວຄວາມພ້ອມສະເລ່ຍແຕ່ລະດ້ານໃນການກະກຽມກອງປະຊຸມໃຫຍ່ຄັ້ງທີ XI ອົງຄະນະພັກເມືອງພີນ ມາຮອດປະຈຸບັນມີຄວາມພ້ອມ 80% ຄາດວ່າໃນລະຫວ່າງທ້າຍເດືອນ ວັນທີ 27-28 ພະຈິກ 2019 ຈະເປີດກອງປະຊຸມໃຫຍ່ຜູ້ແທນອົງຄະນະພັກເມືອງພີນ ຄັ້ງທີ XI ຢ່າງເປັນທາງການໄດ້.

Savannakhet medialaos