ໃນຕອນບ່າຍວັນທີ 29 ຕຸລາ 2019ນີ້ ທີ່ຫ້ອງຮັບແຂກຫ້ອງວ່າການປົກຄອງແຂວງສະຫວັນນະຂດ ທ່ານ ສັນຕິພາບພົມ ວິຫານ ເຈົ້າແຂວງສະຫວັນນະເຂດໄດ້ຕ້ອນຮັບ ທ່ານ ຊະຢັນ ສິລິມາດ ຜູ້ວ່າລາດສະການຈັງຫວັດມຸກດາຫານທີ່ ໄດ້ນຳເອົາເຄື່ອງຊ່ວຍເຫຼືອບັນເທົາທຸກ ນຳມາມອບໃຫ້ການນຳແຂວງເພື່ອນຳໄປມອບຕໍ່ໃຫ້ກັບປະຊາຊົນທີ່ຖືກອຸທົກກໄພນໍ້າຖ້ວມໃນເດືອນສິງຫາທີ່ຜ່ານມາ.

ຈຸດປະສົງຂອງການມາໃນຄັ້ງນີ້ທ່ານ ຊະຢັນ ສິລິມາດ ຜູ້ວ່າຈັງຫວັດມຸກດາຫານໄດ້ກ່າວວ່າ: ໃນ ນາມຄະນະກຳມະການຮ່ວມພາກລັດ ແລະ ເອກະຊົນ ເພື່ອພັດທະນາ ແລະ ແກ້ໄຂເສດຖະກິດ ຈັງຫວັດມຸກດາຫານ ທີ່ໄດ້ຮວບຮວມນໍ້າໃຈທຸກພາກສ່ວນ ທັງພາກລັດ ແລະ ເອກະຊົນຂອງຊາວມຸກດາຫານ ທີ່ໄດ້ ຮູ້ມາ ວ່າ ແຂວງສະຫວັນນະຂດໄດ້ຮັບໄພພິບັດ ແລະ ໄດ້ຮັບຮູ້ວ່າຂາດແຄນທາງດ້ານເຂົ້າໜຽວ ຈຶ່ງໄດ້ນຳເອົາ ວັດຖຸປັດໄຈທີ່ ມີເຄື່ອງອຸປະໂພກ ແລະ ບໍລິໂພກ, ສຳລັບເຄື່ອງທີ່ນຳມາມອບໃນຄັ້ງນີ້ປະກອບມີ: ເຂົ້າສານໜຽວ, ໝີ່, ນໍ້າດື່ມ, ປາກະປ໋ອງ, ຢາປົວພະຍາດ, ຢາກັນຍຸງ, ນໍ້າປາ, ເຄື່ອງໃຊ້ສໍາລັບແມ່ຍິງ, ເຂົ້າໜົມ, ນໍ້າມັນພືດ, ເສື້ອຊູຊີບ ແລະ ເສື້ອຜ້າ ລວມມູນຄ່າເປັນເງິນທັງໝົດ 707.160 ບາດ ທັງນີ້ກໍ່ເພື່ອຊ່ວຍເຫຼືອບັນເທົາທຸກໃຫ້ກັບປະຊາຊົນຊາວແຂວງສະຫວັນນະເຂດ ທີ່ໄດ້ຮັບໄພພິບັດນໍ້າຖ້ວມ, ນອກນັ້ນກໍ່ຍັງຈະໄດ້ລະດົມຈາກປະຊາຊົນຕື່ມອີກເປັນເຂົ້າເປືອກເພື່ອສົ່ງໃຫ້ໂຮງສີແປຮູບແລ້ວຈະມາຊ່ວຍແກ້ໄຂຕື່ມອີກ.

ຈາກນັ້ນທ່ານ ເຈົ້າແຂວງກໍ່ໄດ້ກ່າວຄຳຂອບໃຈມາຍັງທ່ານຜູ້ວ່າຈັງຫວັດມຸກດາຫານ ພ້ອມສະມາຄົມຈັງຫວັດ ມຸກດາຫານ ທີ່ໄດ້ແບ່ງປັນນໍ້າຈິດ ນໍ້າໃຈ ຂອງປະຊາຊົນຊາວມຸກດາຫານກໍ່ຄື ປະຊາຊົນຊາວໄທໄດ້ນຳເອົາເຄື່ອງມາຊ່ວຍເຫຼືອບັນເທົາທຸກໃຫ້ແກ່ ປະຊາຊົນລາວ ເວົ້າສະເພາະກໍ່ແມ່ນຊາວແຂວງສະຫວັນນະເຂດ ທີ່ໄດ້ຮັບຜົນກະທົບທາງໄພພິບັດທຳມະຊາດໃນຄັ້ງນີ້.
ໂອກາດດຽວກັນນີ້ ທ່ານ ຊະຢັນ ສິລິມາດ ຜູ້ວ່າຈັງຫວັດມຸກດາຫານກໍ່ໄດ້ ໃຫ້ກຽດມອບເຄື່ອງຊ່ວຍເຫຼືອດັ່ງກ່າວ ໂດຍໃຫ້ກຽດຮັບຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມນັ້ນທ່ານ ສັນຕິພາບ ພົມວິຫານກໍ່ໄດ້ມອບໃບຍ້ອງຍໍໃຫ້ ແກ່ຄະນະກຳມະການພາກລັດ ແລະ ເອກະຊົນເພື່ອພັດທະນາ ແລະ ແກ້ໄຂເສດຖະກິດຈັງຫວັດມຸກດາຫາຫານ ທີ່ມີນໍ້າໃຈຊ່ວຍເຫຼືອສັງຄົມໃນຄັ້ງນີ້ອີກດ້ວຍ.

savannakhet medialaos