ວັນທີ 30 ຕຸລາ 2019 ນີ້ ຢູ່ທີ່ຫ້ອງການບ້ານພາໃຕ້ ເມືອງຜາໄຊ ແຂວງຊຽງຂວາງ ໄດ້ຈັດພິທີປະກາດຮັບຮອງເອົາ 7ບ້ານ ເມືອງຜາໄຊຄື: ບ້ານຫໍ່ໄຊ, ບ້ານຊົວ, ບ້ານ ນາເພຍນາແຖງ, ບ້ານ ນາຮຸງໜອງຫອຍ, ບ້ານ ທຸ່ມນາຕຽງ, , ບ້ານ ໂພນ, ບ້ານ ພາໃຕ້ ເປັນຄອບຄົວ ແລະບ້ານສາມັກຄີປອງດອງຂື້ນຢ່າງເປັນທາງການ. ພາຍໃຕ້ການເປັນປະທານຂອງ ທ່ານ ບຸນເຍືອງ ແສງຕາວັນ ເລຂາພັກບ້ານພາໃຕ້ ເປັນກຽດເຂົ້າຮ່ວມພິທີມີ ທ່ານ ດໍາດີ ນັນທະວົງ ກຳມະການພັກແຂວງ, ປະທານແນວລາວສ້າງຊາດແຂວງ, ທ່ານ ສຸດໃຈ ສີປະເສີດ ຄະນະປະຈຳພັກເມືອງ ປະທານແນວລາວສ້າງຊາດເມືອງ, ຄະນະກຸ່ມ, ເລຂາພັກບ້ານ 7 ບ້ານ, ຜູ້ຊົງຄຸນວຸດທິ, ເຈົ້າກົກ-ເຈົ້າເຫຼົ່າ, ເຖົ້າແກ່ແນວໂຮມຕະຫຼອດຮອດພໍ່ແມ່ປະຊາຊົນ 7 ບ້ານຂ້າງເຂົ້າຮ່ວມ.

ໃນພິທີທ່ານເລຂາພັກບ້ານພາໃຕ້ ຂື້ນກ່າວເປີດພິທີຢ່າງເປັນທາງການ, ຈາກນັ້ນທ່ານ ບຸນຕຸຍ ປະທານແນວລໂຮມບ້ານ ທັງຕາງໜ້າໃຫ້ຄະນະຮັບຜິດຊອບຂະບວນການສ້າງຄອບຄົວ ແລະບ້ານສາມັກຄີປອງດອງຂອງ 7 ບ້ານໄດ້ຂຶ້ນຜ່ານບົດສະຫຼູບການສ້າງຄອບຄົວ ແລະ ບ້ານສາມັກຄີປອງດອງໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ. ໃນນີ້ທ່ານໄດ້ຍົກໃຫ້ເຫັນເຖີງ ການຈັດຕັ້ງປະຕິບັດວຽກງານໃນໄລຍະຜ່ານມາ, ເຊີ່ງໄດ້ເອົາໃຈໃສ່ສຶກສາອົບຮົມ, ການເມືອງແນວຄິດ ໃຫ້ປະຊາຊົນມີຄວາມຮັກແພງ, ຊ່ວຍເຫຼືອເຊີ່ງກັນ ແລະ ກັນ, ຮັກສາມູນເຊື້ອອັນດີງາມຂອງເຜົ່າ ເຮັດໃຫ້ບັນດາໜ້າວຽກໄດ້ຮັບຜົນສຳເລັດໃນຫຼາຍໆດ້ານ ໂດຍສະເພາະແມ່ນການຈັດຕັ້ງປະຕິບັດຂໍ້ແຂ່ງຂັນການສ້າງຄອບຄົວ ແລະ ບ້ານສາມັກຄີປອງດອງຢ່າງເປັນຂະບວນການ. ຈາກນັ້ນ, ໃນພິທີໄດ້ມອບຮັບໃບຢັ້ງຢືນຄອບຄົວ ແລະ ບ້ານສາມັກຄີປອງດອງ ໃຫ້ແກ່ອຳນາດການປົກຄອງບ້ານ 7 ບ້ານ ແລະຄອບຄົວຜ່ານການຮັບຮອງ. ໂດຍການເປັນກຽດຂຶ້ນມອບໂດຍທ່ານ ທ່ານ ສຸດໃຈ ສີປະເສີດ ແລະ ທ່ານ ດຳດີ ນັນທະວົງ.

ໃນຕອນທ້າຍຂອງພິທີຍັງໄດ້ຮັບຟັງການໂອ້ລົມຂອງທ່ານ ດຳດີ ນັນທະວົງ ເຊີ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການຈັດຕັ້ງປະຕິບັດຂອງ 7 ບ້ານທີ່ຍາດມາໄດ້ ແລະ ໄດ້ປະກາດເປັນຄອບຄົວ ແລະ ບ້ານສາມັກຄີໃນຄັ້ງນີ້ ເຊີ່ງທ່ານໄດ້ກ່າວວ່າ: ພິທີມອບ-ຮັບໃບຢັ້ງຢືນຄັ້ງນີ້ເປັນໃບໜ້າທີ່ສຳຄັນຂອງແຂວງຊຽງຂວາງເວົ້າລວມ, ເວົ້າສະເພາະກໍ່ແມ່ນຂອງ7 ບ້ານເມືອງຜາໄຊ, ເຊີ່ງໄດ້ມີຄວາມໜາຍຄວາມສໍາຄັນເປັນ 7 ບ້ານທໍາອິດຂອງເມືອງທີ່ໄດ້ປະກາດເປັນບ້ານສາມັກຄີປອງດອງ, ເປັນການຜັນຂະຫຍາຍແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ແຜນພັດທະນາເສດຖະກິດສັງຄົມແຫ່ງລັດ ແລະ ມະຕິກອງປະຊຸມໃຫຍ່ຜູ້ແທນແນວລາວສ້າງຊາດທົ່ວປະເທດ ແຕ່ລະໄລຍະໃຫ້ປະກົດຜົນເປັນຈີງ, ເປັນການປຸກລະດົມກຳລັງແຮງທົ່ວປວງຊົນ ເຂົ້າຮ່ວມປະຕິບັດສອງໜ້າທີ່ຍຸດທະສາດ ຄືການປົກປັກຮັກສາ ແລະ ສ້າງສາພັດທະນາປະເທດຊາດ, ເປັນການຫັດແໜ້ນຄວາມສາມັກຄີ, ຄວາມເປັນເອກະພາບຂອງປະຊາຊຊົນລາວບັນດາເຜົ່າ, ຊັ້ນຄົນ, ສາສະໜາ,ເພດ-ໄວ ໂດຍເລີ່ມຈາກຄອບຄົວ ແລະ ຮາກຖານບ້ານ ເຊີ່ງມັນເປັນປັດໃຈໃນການເສີມສ້າງສະຖຽນລະພາບ ແລະ ແກ້ໄຂຄວາມທຸກຍາກ ເພື່ອຄວາມມັ່ງຄັ່ງເຂັ້ມແຂງຂອງຊາດລາວເຮົາ ຄຽງຄູ່ກັນນັ້ນທ່ານຍັງໄດ້ຮຽກຮ້ອງໃຫ້ ບັນດາຄອບຄົວຕະຫຼອດຮອດອຳນາດການປົກຄອງບ້ານ, ຈົ່ງພ້ອມກັນຮັກສານາມມະຍົດນີ້ໃຫ້ຍືນຍົງ, ເພີ່ມທະວີຄວາມສາມັກຄີ ຮັກແພງຊ່ວຍເຫຼືອເຊີ່ງກັນແລະກັນຕະຫຼອດໄປ, ສືບຕໍ່ພ້ອມກັນຮັກສາມູນເຊື້ອຂອງຄອບຄົວ ແລະ ບ້ານສາມັກຄີປອງດອງໃນປີຕໍ່ໆໄປ ເພື່ອຜັນຂະຫຍາຍ ແລະເຮັດໃຫ້ກາຍເປັນເມືອງສາມັກຄີໃນຕໍ່ໜ້າ.

ພາບ-ຂ່າວ: ທ ເບ່ຕ່າ ໄຊປັນຍາ( ແນວລາວສ້າງຊາດແຂວງຊຽງຂວາງ).
Medialaos xiengkhouang