ໃນຕອນເຊົ້າວັນທີ 30 ຕຸລາ 2019 ຢູ່ທີ່ຫ້ອງປະຊຸມຫ້ອງວ່າການປົກຄອງແຂວງສະຫວັນນະເຂດ ໄດ້ຈັດກອງປະຊຸມ ປະຈຳປີ 2019 ລະຫວ່າງຄະນະຜູ້ແທນກຳມະການຊາຍແດນ ແຂວງສະຫວັນນະເຂດແຫ່ງ ສປປ ລາວ ແລະ ຄະນະຜູ້ແທນຊາຍແດນແຂວງ ກວາງບິ່ງ ແຫ່ງ ສສ ຫວຽດນາມ ໂດຍການເຂົ້າຮ່ວມ ທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ, ທ່ານ ຫງວຽນ ຕ໋ຽນ ຮວ່າງ ຮອງປະທານຜູ້ປະຈໍາການຄະນະກຳມະການປະຊາຊົນແຂວງກວາງບິ່ງ, ທ່ານ ຫວູ ແອັງ ຢູ໋ງ ກົງສູນໃຫຍ່ ແຫ່ງ ສສຫວຽດນາມ ປະຈໍາແຂວງສະຫວັນນະເຂດ ພ້ອມດ້ວຍບັນດາຄະນະນຳທັງສອງຝ່າຍເຂົ້າຮ່ວມ

ທ່ານ ໂພໄຊ ໄຊຍະສອນ ກໍ່ໄດ້ກ່າວຕ້ອນຮັບ ແລະ ທັງລາຍງານສະພາບລວມຂອງແຂວງສະຫວັນນະເຂດ ພ້ອມທັງຕີລາຄາການຈັດຕັ້ງປະຕິບັດເນື້ອໃນບົດບັນທຶກໃນປີ 2019 ທີ່ຜ່ານມາ ເຊິ່ງສອງແຂວງໄດ້ປະຕິບັດສາຍພົວພັນຮ່ວມມືໃນຂົງເຂດວຽກງານປ້ອງການຊາດ, ປ້ອງກັນຄວາມສະຫງົບ ຕາມຊາຍແດນລະຫວ່າງອຳນາດການປົກຄອງທ້ອງຖິ່ນແຕ່ລະຂັ້ນ ກໍ່ຄືບັນດາກຳລັງເຈົ້າໜ້າທີ່ທະຫານຊາຍແດນຂອງສອງແຂວງໄດ້ເປັນຢ່າງດີ ຮັກສາການພົບປະປະຈຳປີຂັ້ນແຂວງກໍ່ຄືກຳລັງເຈົ້າໜ້າທີ່ທີ່ກ່ຽວຂ້ອງໂດຍຜັດປ່ຽນກັນເປັນເຈົ້າພາບ, ໄດ້ໂຄສະນາ ແລະ ເຜີຍແຜ່ ລະບຽບກົດໝາຍຊາຍແດນຍົກສູງຄວາມຮັບຮູ້ຂອງພະນັກງານປະຊາຊົນສອງແຂວງຢູ່ຂົງເຂດຊາຍແດນເປັນແຕ່ລະໄລຍະ, ພ້ອມນັ້ນກໍ່ໄດ້ປະຕິບັດຕາມລະບຽນກົດໝາຍຂອງແຕ່ລະປະເທດທີ່ລັດຖະບານທັງສອງຝ່າຍໄດ້ວາງອອກເປັນຢ່າງດີ, ກຳລັງເຈົ້າໜ້າທີ່ແຂວງ ປະສານສົມທົບກັນເປັນຢ່າງດີໃນການເດີນສຳຫຼວດຝ່າຍດຽວ,ສອງຝ່າຍ ເພື່ອປົກປັກຮັກສາຊາຍແດນ ແລະ ຫຼັກໝາຍຊາຍແດນ, ອຳນາດການປົກຄອງຂອງແຕ່ລະຂັ້ນໄດ້ສ້າງແຜນການໂຄງການໃນການກໍ່ສ້າງພື້ນຖານໂຄງລ່າງ ໃນການພັດທະນາເສດຖະກິດສັງຄົມ, ລົບລ້າງຄວາມທຸກຍາກຕາມບໍລິເວນຂົງເຂດຊາຍແດນ.

ນອກຈາກນີ້ກໍ່ໄດ້ວາງທິດທາງການຮ່ວມມືໃນຕໍ່ໜ້າຂອງສອງຝ່າຍໂດຍຈະສືບຕໍ່ຜັນຂະຫຍາຍສາຍພົວພັນຮ່ວມມືຢ່າງສະໜິດແໜ້ນ, ພົບປະກັນຢ່າງເປັນປະຈຳໃນທຸກປີ ແລະ ມີປະສິດທິຜົນສູງລະຫວ່າງອຳນາດການປົກຄອງ ແລະ ອົງການຈັດຕັ້ງຄຸ້ມຄອງແຕ່ລະຂັ້ນ, ປົກປັກຮັກສາຊາຍແດນ ແລະ ຫຼັກໝາຍຊາຍແດນຂອງສອງແຂວງ, ສືບຕໍ່ເສີມສ້າງກົນໄກການພົບປະສາມັນ ແລະ ວິສາມັນ ພົບປະແລກປ່ຽນຂໍ້ມູນຂ່າວສານເປັນປະຈຳລະຫວ່າງອຳນາດການປົກຄອງແຕ່ລະຂັ້ນ, ອົງການຈັດຕັ້ງ, ພະແນກການ, ທ້ອງຖິ່ນ ແລະ ກຳລັງປົກປັກຮັກສາຊາຍແດນຂອງສອງແຂວງ, ຖ້າມີເຫດການໃດໜຶ່ງທີ່ເກີດຂຶ້ນຢູ່ບໍລິເວນ ຊາຍແດນ ບັນດາອົງການຈັດຕັ້ງທີ່ກ່ຽວຂ້ອງຕ້ອງປະສານສົມທົບ ແລ້ວ ຂໍທິດຊີ້ນຳໃນການແກ້ໄຂບັນຫາຕາມລະບຽບ ແລະ ກົດໝາຍຂອງສອງປະເທດ.
ຈາກນັ້ນ ການນຳທັງສອງຝ່າຍກໍ່ຮ່ວມກັນເຊັນບົດບັນທຶກຊ່ວຍຈຳ ໃນການສືບຕໍ່ສາຍພົວພັນຮ່ວມມືຢ່າງສະໜິດແໜ້ນ, ຮັກສາການພົບປະສາມັນ ແລະ ວິສາມັນ ແລກປ່ຽນຂໍ້ມູນຂ່າວສານເປັນປະຈຳ ລະຫວ່າງ ອຳນາດການປົກຄອງ, ອົງການຈັດຕັ້ງ, ພະແນກການ, ທ້ອງຖິ່ນ ແລະ ກຳລັງປົກປັກຮັກສາຊາຍແດນແຕ່ລະຂັ້ນຂອງສອງແຂວງ ແລະ ດ້ານອື່ນໆ. ເຊິ່ງຝ່າຍລາວ ນຳໂດຍທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ ແລະ ຝ່າຍຫວຽດນາມ ແມ່ນທ່ານ ຫງວຽນ ຕ໋ຽນ ຮ່ວາງ ຮອງປະທານຄະນະກຳມະການປະຊາຊົນແຂວງ ກວາງບິ່ງ ໂດຍການເປັນສັກຂີພິຍານຂອງການນຳທັງສອງຝ່າຍ.

savannakhet medialaos