ເພື່ອເປັນການທົບທວນຄືນການຈັດຕັ້ງປະຕິບັດວຽກງານປະເມີນຜົນລັດຖະກອນ ຕາມດໍາລັດ ສະບັບ ເລກທີ 300/ລບ, ລົງວັນທີ 13 ກັນຍາ 2017 ໃຫ້ປະກົດຜົນເປັນຈິງ ແລະ ເຂົ້າສູ່ລວງເລິກ, ສະນັ້ນມາໃນຕອນບ່າຍຂອງວັນທີ 30 ຕຸລາ 2019 ທີ່ຜ່ານມາ ທີ່ສະໂມສອນ ຂອງຫ້ອງວ່າການປົກຄອງເມືອງໄຊພູທອງ ແຂວງ ສະຫວັນນະເຂດ ໄດ້ຈັດກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານປະເມີນຜົນລັດຖະກອນປະຈໍາປີ 2019 ພາຍໃຕ້ການເປັນປະທານຂອງທ່ານ ຫ່ວນ ຮັງບົວສອນ ຮອງເລຂາພັກເມືອງ ຮອງເຈົ້າເມືອງ.

ທ່ານ ເກີດມີ ຈັນທິລາດ ຄະນະປະຈໍາພັກເມືອງ ຫົວໜ້າຫ້ອງການພາຍໃນເມືອງ ໄດ້ຂຶ້ນລາຍງານສະພາບການຈັດຕັ້ງປະຕິບັດວຽກງານປະເມີນຜົນປະຈໍາປີ 2018 ຕໍ່ກອງປະຊຸມໃຫ້ຮູ້ວ່າ: ຜ່ານການຈັດຕັ້ງປະຕິບັດວຽກງານປະເມີນຜົນການປະຕິບັດວຽກງານຂອງພະນັກງານ-ລັດຖະກອນ ໃນໄລຍະ 01 ປີ ຜ່ານມເມືອງພາຍໃນເມືອງໄຊພູທອງ ໄດ້ເອົາໃຈໃສ່ ແລະ ເຫັນໄດ້ຄວາມໝາຍ, ຄວາມສໍາຄັນຂອງການປະເມີນຜົນລັດຖະກອນ ຊຶ່ງໄດ້ປະຕິບັດວຽກງານ ຕາມຫຼັກການ, ຂັ້ນຕອນຢ່າງເຂັ້ມງວດ ບົນພື້ນຖານລະບຽບການ, ຖືກຕ້ອງສອດຄ່ອງທາງດ້ານເນື້ອໃນ ແລະ ການປະກອບສໍານວນເອກະສານຕ່າງໆທີ່ໄດ້ກໍານົດໄວ້ ພ້ອມທັງຮັບປະກັນຄວາມໂປ່ງໃສ່, ຍຸຕິທໍາ ແລະ ກວດສອບໄດ້ ເພື່ອນໍາເອົາຜົນຂອງການປະເມີນຜົນໄປນໍາໃຊ້ເຂົ້າໃນການວາງແຜນບຸກຄະລາກອນ, ຝຶກອົບຮົມ, ພັດທະນາລັດຖະກອນ, ປະຕິບັດນະໂຍບາຍຍ້ອງຍໍ ແລະ ວາງມາດຕະການຕໍ່ຜູ້ທີ່ລະເມີດລະບຽບວິໄນຢ່າງເຂັ້ມງວດ. ນອກຈາກນີ້, ຜູ້ເຂົ້າຮ່ວມກອງປະຊຸມຍັງໄດ້ລາຍງານສະພາບການຈັດຕັ້ງປະຕິບັດວຽກງານການປະເມີນຜົນລັດຖະກອນຂອງແຕ່ລະຫ້ອງການຕົນ ພ້ອມທັງປະກອບຄໍາຄິດເຫັນຕໍ່ກອງປະຊຸມດ້ວຍບັນຍາກາດຝົດຝືນສ້າງສັນ ເຊິ່ງໄດ້ຍົກໃຫ້ເຫັນຜົນງານ, ຂໍ້ຫຍຸ້ງຍາກ, ບົດຮຽນທີ່ຖອດຖອນໄດ້ ແລະ ກໍານົດທິດທາງແຜນການໃນຕໍ່ໜ້າຂອງຂະແໜງການທີ່ຕົນຮັບຜິດຊອບ.

ໃນຕ້ອນທ້າຍຂອງກອງປະຊຸມທ່ານ ຫ່ວນ ຮັງບົວສອນ ໄດ້ໂອ້ລົມຕໍ່ກອງປະຊຸມ ໂດຍໄດ້ເນັ້ນໜັກໃຫ້ບັນດາແຕ່ລະຫ້ອງການອອ້ມຂ້າງເມືອງໃຫ້ເອົາໃຈໃສ່ປະຕິບັດວຽກງານປະເມີນຜົນລັດຖະກອນດ້ວຍຄວາມຮັບຜິດຊອບສູງ ເພື່ອເຮັດໃຫ້ການປະເມີນຜົນລັດຖະກອນເປັນບ່ອນອີງໃນການຄັດເລືອກບຸກຄະລາກອນທີ່ດີເດັ່ນເປັນແບບຢ່າງໃຫ້ແກ່ພະນັກງານ-ລັດຖະກອນ ແລະ ການຈັດຕັ້ງໃນການການວາງແຜນບຸກຄະລາກອນ, ພັດທະນາລັດຖະກອນ, ປະຕິບັດນະໂຍບາຍຍ້ອງຍໍຕ່າງໆຕາມຄວາມເໝາະສົມ.

ຂ່າວ: ພາບ ພັນທະມິດ ວົງສຸທິ
savannakhet medialaos