ຫຼາຍພາກສ່ວນທົ່ວເມືອງອຸທຸມພອນ ຮ່ວມກັນສ້າງຂະບວນການອະນາໄມລວມ

0
212

ໃນວັນທີ 30 ຕຸລາ 2019 ບັນດາອົງການຈັດຕັ້ງອ້ອມຂ້າງ, ຫ້ອງການ, ກອງບັນຊາການ, ບ້ານ, ລັດວິສາຫະກິດ, ໂຮງຮຽນ ແລະ ຂະແໜງການກ່ຽວຂ້ອງທັງພາກລັດ ແລະ ເອກະຊົນ ທົ່ວເມືອງອຸທຸມພອນ ໄດ້ສ້າງຂະບວນການອອກແຮງງານເຮັດອະນາໄມລວມ ພ້ອມກັນຫຼາຍຈຸດ ເພື່ອເປັນການສ້າງຂະບວນການກະກຽມສະເຫຼີມສະຫຼອງ ວັນຊາດ ທີ 2 ທັນວາ ຄົບຮອບ 44 ປີ ໃຫ້ເປັນຂະບວນການຟົດຟື້ນ ແລະ ທັງເປັນການສ້າງຂະບວນການກະກຽມກອງປະຊຸມໃຫຍ່ 3 ຂັ້ນຂອງພັກເວົ້າລວມ ເວົ້າສະເພາະ ກໍ່ຄືກອງປະຊຸມໃຫຍ່ ຄັ້ງທີ VIII ຂອງອົງຄະນະພັກເມືອງອຸທຸພອນ ທີ່ຈະໄດ້ໄຂຂຶ້ນໃນມໍ່ໆນີ້.

ສຳລັບໜ້າວຽກອະນາໄມຂອງແຕ່ລະພາກສ່ວນແມ່ນ ຕັດຫຍ້າໃນບໍລິເວນທີ່ຮົກເຮື້ອ, ຊວ້ານດິນຕາມຮ້ອງລະບາຍນ້ຳ, ປັດກວາດຕາມເສັ້ນທາງ ແລະ ເກັບສິ່ງເສດເຫຼືອຕ່າງໆ ຕາມຂອບເຂດຄວາມຮັບຜິດຊອບຂອງໃຜລາວ. ໂດຍສະເພາະ ຈຸດວົງວຽນເຊໂນ ແລະ ຈຸດພັກລົດທາງແບ່ງເຊໂນ ທ່ານ ປະສົງສິນ ຈະເລີນສຸກ ເຈົ້າເມືອງອຸທຸມພອນ ກໍ່ໄດ້ນຳພາພະນັກງານ-ລັດຖະກອນອ້ອມຂ້າງເມືອງ ສົມທົບກັບອຳນາດການປົກຄອງບ້ານ ແລະ ພໍ່ແມ່ປະຊາຊົນ ເຮັດອະນາໄມລວມຢ່າງເປັນຂະບວນຟົດຟື້ນ. ທັງນີ້ເພື່ອເຮັດໃຫ້ຖະໜົນຫົນທາງ ແລະ ຈຸດດັ່ງກ່າວມີຄວາມສະອາດຈົບງາມ ເປັນອັນປະທັບໃຈໃຫ້ກັບແຂກຄົນທີ່ເຂົ້າໃຊ້ບໍລິການ ແລະ ຜ່ານກາຍໄປກາຍມາ.

ນັກຂ່າວເມືອງອຸທຸມພອນ
ພອນປະເສີດ ແຜນພັກດີ
savanakhet medialaos