ໃນຕອນເຊົ້າຂອງວັນທີ 31 ຕຸລາ 2019 ນີ້. ຢູ່ທີ່ວັດບ້ານນາໂພ ເມືອງອຸທຸມພອນ ທ່ານ ປະສົງສິນ ຈະເລີນສຸກ ເຈົ້າເມືອງອຸທຸມພອນ ພ້ອມຄະນະ ໄດ້ລົງພົບປະໂອ້ລົມອຳນາດການປົກຄອງ ແລະ ປະຊາຊົນເຂດກຸ່ມບ້ານດັ່ງກ່າວ.
ໂອກາດນີ້ ທ່ານ ສົມມາ ແກ້ວຄຳມະນີ ເລຂາຄະນະພັກຮາກຖານກຸ່ມບ້ານນາໂພ ກໍ່ໄດ້ລາຍງານ ສະພາບໂດຍລວມ ຂອງກຸ່ມບ້ານນາໂພວ່າ: ກຸ່ມບ້ານນາໂພ ເມືອງອຸທຸມພອນ ຕັ້ງຫ່າງຈາກເທດສະບານເມືອງໄປທາງທິດເໜືອ ປະມານ 25 ກິໂລແມັດ ມີເຂດແດນຕິດຈອດກັບຫຼາຍກຸ່ມບ້ານຄື: ທິດເໜືອຕິດກັບກຸ່ມບ້ານດົງທ່າ, ທິດໃຕ້ຕິດກັບກຸ່ມບ້ານໂພນເດື່ອ, ທິດຕາເວັນອອກຕິດກັບກຸ່ມບ້ານໂພນຜາງ ເມືອງອາດສະພອນ ແລະ ທິດຕາເວັນຕົກຕິດກັບກຸ່ມບ້ານນາຄູ, ກຸ່ມບ້ານນາໂພ ປະກອບມີ 6 ບ້ານຂຶ້ນກັບຄື: ບ້ານນາໂພ, ບ້ານນາເກັງ, ບ້ານນາປົ່ງ, ບ້ານປ່າໜາມ, ບ້ານເອ້ ແລະ ບ້ານໂນນອຸດົມ. ມີ 925 ຫຼັງຄາເຮືອນ, ມີ 900 ຄອບຄົວ, ມີພົນລະເມືອງທັງໝົດ 6.060 ຄົນ, ຍິງ 2.025 ຄົນ, ປະຊາຊົນສ່ວນຫຼາຍມີອາຊີບເຮັດນາເປັນຕົ້ນຕໍ, ປູກຝັງ-ລ້ຽງສັດ ແລະ ຄ້າຂາຍເປັນສຳຮອງ. ປະຈຸບັນພາຍໃນກຸ່ມບ້ານມີເນື້ອທີ່ນາທັງໝົດ 1.220 ກວ່າເຮັກຕາ, ສະເລ່ຍສະມັດຕະພາບການຜະລິດເຂົ້ານາປີໄດ້ 3,5 ໂຕນ/ເຮັກຕາ.

ຈາກນັ້ນ ບັນດາທ່ານໃນຄະນະທີມງານຂອງທ່ານເຈົ້າເມືອງ ກໍ່ໄດ້ຜັດປ່ຽນກັນປະກອບຄຳເຫັນຊີ້ນຳໃນແຕ່ລະຂົງເຂດວຽກງານ ເປັນຕົ້ນ ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານພັດທະນາພື້ນຖານໂຄງລ່າງ, ວຽກງານເສດຖະກິດ-ການເງິນ ແລະ ວຽກງານຂະບວນການກະກຽມກອງປະຊຸມໃຫຍ່ ຄັ້ງທີ VIII ຂອງອົງຄະນະພັກເມືອງອຸທຸມພອນ. ທ່ານ ປະສົງສິນ ຈະເລີນສຸກ ເຈົ້າເມືອງອຸທຸມພອນ ຍັງໃຫ້ຮູ້ວ່າ ການພັດທະນາ ຊົນນະບົດ ຫລື ການຫັນເສດຖະກິດ ທໍາມະຊາດ ໄປສູ່ເສດຖະກິດສິນຄ້າ ແມ່ນບາດກ້າວ ບຸກທະລຸ ໃນການແກ້ໄຂ ຄວາມທຸກຍາກ ຂອງປະຊາຊົນ ດ້ວຍການຂຸດຄົ້ນ ແລະ ສຸມແຫຼ່ງທຶນຕ່າງໆ, ຊຶ່ງທັງໝົດນີ້ ແມ່ນໜ້າທີ່ ແລະ ຄວາມຮັບຜິດຊອບ ຂອງທົ່ວພັກ, ທົ່ວລັດ ແລະ ທົ່ວປວງຊົນ, ຂອງສະມາຊິກພັກ, ພະນັກງານ, ທະຫານ, ຕໍາຫລວດ, ຕະຫລອດຮອດນັກທຸລະກິດ, ນັກພັດທະນາກອນ ແລະ ປະຊາຊົນບັນດາເຜົ່າທຸກເພດ, ທຸກໄວ. ເຊິ່ງປະຈຸບັນ ໃນທ່າມກາງ ບັນຍາກາດ ທີ່ທົ່ວພັກ, ທົ່ວລັດ ແລະ ທົ່ວປວງຊົນ ພວກເຮົາ ກໍາລັງສຸມໃສ່ ປະຕິບັດວຽກງານ ໄລຍະທ້າຍຂອງການ ຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ແຜນພັດທະນາ ເສດຖະກິດ-ສັງຄົມ 5 ປີ ຄັ້ງທີ VIII ແລະ ກໍແມ່ນໄລຍະ ທີ່ທຸກຂະແໜງການ ທັງສູນກາງ ແລະ ທ້ອງຖິ່ນ ກໍາລັງຈະດໍາເນີນ ກອງປະຊຸມໃຫຍ່ 3 ຂັ້ນ ເພື່ອກະກຽມ ໃຫ້ແກ່ກອງປະຊຸມ ຄັ້ງທີ XI ຂອງພັກ. ໂດຍສະເພາະແມ່ນ ກອງປະຊຸມໃຫຍ່ ຄັ້ງທີ VIII ຂອງອົງຄະນະພັກເມືອງອຸທຸມພອນ ພວກເຮົາ ທີ່ຈະໄດ້ໄຂຂຶ້ນໃນມໍ່ໆນີ້ ພ້ອມນັ້ນທ່ານກໍ່ໄດ້ຮຽກຮ້ອງ ມາຍັງ ບັນດາ ຜູ້ປະກອບການ ທຸກພາກສ່ວນ ເສດຖະກິດ, ຜູ້ມີປະສົບການ, ມີກໍາລັງແຮງ, ມີທຶນຮອນ, ມີນ້ຳໃຈ ເສຍສະຫລະ, ລວມທັງ ປະຊາຊົນ ບັນດາເຜົ່າ ທຸກຊັ້ນຄົນ ປະກອບສ່ວນ ເຂົ້າຮ່ວມ ໃນຂະບວນການກະກຽມກອງປະຊຸມໃຫຍ່ ຄັ້ງທີ VIII ຂອງອົງຄະນະພັກເມືອງອຸທຸມພອນ ໃຫ້ໄດ້ຮັບຜົນສຳເລັດຢ່າງຈົບງາມ.

ນັກຂ່າວເມືອງອຸທຸມພອນ
ພອນປະເສີດ ແຜນພັກດີ
savannakhet medialaos