ໃນວັນທີ 1 ພະຈິກ ປີ 2019 ນີ້ໜ່ວຍພັກ ບໍລິສັດ ລາວໂທລະຄົມມະນາຄົມ ມະຫາຊົນ ສາຂາ ແຂວງສາລະວັນໄດ້ສຳເລັດການປ່ອຍບັດຄັດເລືອກເອົາເລຂາ, ເລຂາໜ່ວຍພັກຊຸດໃໝ່ ເຊິ່ງກອງປະຊຸມດັ່ງກ່າວໄດ້ຈັດຂື້ນຢູ່ທີ່ຫ້ອງປະຊຸມຂອງ ບໍລິສັດ ລລທ ໂດຍການເປັນປະທານ ຂອງທ່ານ ວຽງໄຊ ສີສຸລາດ ເລຂາໜ່ວຍພັກ ບໍລິສັດ ລາວໂທລະຄົມມະນາຄົມ ມະຫາຊົນ ສາຂາສາລະວັນ ເປັນກຽດຮ່ວມຂອງສະຫາຍ ຂັນໄຊ ລັດຖະເຮົ້າ ກໍາມະການພັກແຂວງ. ເລຂາຄະນະພັກຮາກຖານ ພະແນກ ໄປສະນີ ໂທລະຄົມມະນາຄົມ ແລະ ການສື່ສານ ແຂວງສາລະວັນ, ມີພະນັກງານສະມາຊິກພັກສົມບູນ ແລະສຳຮອງ, ພ້ອມດ້ວຍແຂກຖືກເຊິນຈາກພາກສ່ວນຕ່າງໆທີ່ກ່ຽວຂ້ອງເຂົ້າຮວ່ມ.

ກອງປະຊຸມຄັ້ງນີ້ກໍ່ໄດ້ຮັບຟັງການຜ່ານບົດລາຍງາຍການເມືອງ, ບົດສະຫຼຸບຕີລະຄາການເຄື່ອນໃຫວວຽກງານ ແລະບົດສຳຫຼວດການນຳພາລວມໃນໄລຍະ 5 ປີຜ່ານມາ, ຊື່ງຈະໄດ້ພ້ອມກັນທົບທວນຄືນ, ຕີລາຄາການຈັດຕັ້ງປະຕິບັດວຽກງານໃນໄລຍະສະໄໝຜ່ານມາ, ພ້ອມກັນຄົ້ນຄວ້າເສີມຂະຫຍາຍຈຸດດີ, ຂໍ້ຄົງຄ້າງ ທີ່ຕ້ອງດັດແກ້, ປັບປຸງ ແລະ ຖອດຖອນເອົາບົດຮຽນອັນດີທີ່ເປັນແບບຢ່າງ ເພື່ອສືບຕໍ່ຈັັດຕັ້ງປະຕິບັດໃຫ້ບັນລຸຄາດໝາຍຕ່າງໆໃນຕໍ່ໜ້າ. ໃນໄລຍະຜ່ານມາໜ່ວຍພັກບໍລິສັດ ລາວໂທລະຄົມມະນາຄົມ ມະຫາຊົນ ສາຂາແຂວງສາລະວັນກໍ່ໄດ້ເອົາໃສ່ໃນການຜັນຂະຫຍາຍມະຕິກອງປະຊຸມໃຫຍ່ຄັ້ງ X ຂອງສູນກາງພັກ, ມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງ ແລະມະຕິກອງປະຊຸມສະພາແຫ່ງຊາດຊຸດທີ VIII, ພ້ອມດ້ວຍມະຕິຄຳສັງຕ່າງໆຂອງຂັ້ນເທິງ ແລະຂັ້ນຕົນວາງອອກໃນແຕ່ລະໄລຍະຢ່າງເປັນຂະບວນ ແລະກວ້າງຂວາງ,

ພ້ອມກັນນັ້ນກໍ່ໄດ້ເອົາໃສ່ສຶກສາອົບຮົມການ ເມືອງແນວຄິດໃຫ້ແກ່ພະນັກງານ-ລັດຖະກອນສະມາຊິພັກພາຍໃນໄດ້ຮັບຮູ້ເຂົ້າໃຈເຊື່ອມຊືມກຳແໜັ້ນຕໍ່ກັບແນວທາງແຜນ ການນະໂຍບາຍຂອງພັກ-ລັດວາງອອກ, ເອົາໃຈໃສ່ໃນວຽກງານວິຊາສະເພາະຂອງຕົ້ນ, ວຽກງານອົງການຈັດຕັ້ງກຳມະບານ, ຊາວໜຸ່ມ ແລະແມ່ຍິງເພື່ອເຮັດໃຫ້ວຽກງານອົງການຈັດຕັ້ງໄດ້ມີການເຄື່ອນໃຫວຕາມພະລະບົດບາດ, ສິດ ແລະໜ້າທີ່ຕາມຄວາມຮັບຜິດຊອບ, ໜ່ວຍພັກ ບໍລິສັດ ລາວໂທລະຄົມມະນາຄົມ ມະຫາຊົນ ສາຂາແຂວງສາລະວັນມີສະມາຊິກພັກທັງໝົດ 17 ສະຫາຍ, ຍິງ 2 ສະຫາຍ, ສະມາຊິກພັກສົມບູນ 2 ສະຫາຍ, ຍິງ 0 ສະຫາຍ

ຈາກນັ້ນໜ່ວຍພັກ ລລທ ແຂວງສາລະວັນຊຸດເກົ່າກໍ່ໄດ້ກ່າວລາໜ້າທີ່, ພ້ອມທັງຜ່ານມາດຖານເງື່ອນໄຂຜູ້ທີ່ຈະສະໜັກເຂົ້າໃນໂຄງປະກອບຂອງໜ່ວຍພັກຊຸດໃໝ່ເຊິ່ງມີຜູ້ສະໜັກ 5 ສະຫາຍ, ເລືອກເອົາ 3 ສະຫາຍ, ຜ່ານການປ່ອນບັດຄັດເລືອກ ແລະຜົນຂອງກອງປະຊຸມປະຖົມມະລຶກໄດ້ຕົກລົງເຫັນດີເປັນເອກະພາບແຕ່ງຕັ້ງສະຫາຍ ຖາວອນ ກິ່ງສັກດາ ເປັນເລຂາໜ່ວຍພັກ ບໍລິສັດ ລາວໂທລະຄົມມະນາຄົມ ມະຫາຊົນ ສາຂາແຂວງສາລະວັນ ແລະ ແຕ່ງຕັ້ງສະຫາຍ ສຸກສະຫວັດ ທົງສະອອນ ເປັນຮອງເລຂາໜ່ວຍພັກ ບໍລິສັດ ລາວໂທລະຄົມມະນາຄົມ ມະຫາຊົນ ສາຂາແຂວງສາລະວັນ ແລະ ສະຫາຍ ບຸນຍະເນັ່ງ ທອງສະຫວັນ ເປັນຄະນະໜ່ວຍພັກບໍລິສັດ ລາວໂທລະຄົມມະນາຄົມ ມະຫາຊົນ ສາຂາແຂວງສາລະວັນ ຊຸດໃໝ່.

ພາບ-ຂ່າວ: ກິນດາວັນ
medialaos salavan