ເມືອງຫາງໂຈ ແຂວງເຈີ້ຈຽງ ເປັນເມືອງທີ່ມີຄວາມເກົ່າແກ່ 1 ໃນ 6 ຂອງຈີນ, ມີຄວາມສຳຄັນທາງດ້ານເສດຖະກິດທີ່ຕິດອັນດັບ 4 ຂອງປະທດ, ມີວັດທະນະທຳທີ່ຍາວນານ, ເປັນເມືອງທີ່ມີທັດສະນີຍະພາບສວຍງາມ, ມີຄວາມຈະເຈີນຮຸ່ງເຮືອງດ້ານອຸດສາຫະກຳ ແລະ ມີປະຊາກອນອາໃສ 10 ລ້ານກວ່າຄົນ.

ຈະພາທ່ານໄປຮູ້ຈັກກັບທັດສະນີຍະພາບທີ່ສວຍງາມຂອງເມືອງຫາງໂຈ ເຊິ່ງພື້ນທີ່ສ່ວນໃຫຍ່ຂອງເມືອງຫາງໂຈແມ່ນຖືກລ້ອມຮອບດ້ວຍພູເຂົາ ທີ່ມີທະເລຊີຫູ (Xihu) ຕັ້ງຢູ່ໃຈກາງ ເປັນສັນຍາລັກຂອງເມືອງ, ໃນສະໄໝກ່ອນ ຫາງໂຈຖືເປັນສູນກາງການຄ້າ, ມີການຂຸດຄອງເຊື່ອມຕໍ່ລະຫວ່າງປັກກິ່ງຮອດຫາງໂຈທີ່ມີຄວາມຍາວປະມານ 1.700 ກິໂລແມັດ ທີ່ໃຊ້ເປັນເສັ້ນທາງການຂົນສົ່ງສິນຄ້າ ໃນນັ້ນຜ້າໄໝແມ່ນສິນຄ້າຫຼັກຂອງຫາງໂຈທີ່ໄດ້ນຳສົ່ງອອກຂາຍຕ່າງປະເທດໃນສະໄໝນັ້ນ ແລະ ໃນປະຈຸບັນນອກຈາກອຸດສາຫະກຳແລ້ວ ຜ້າໄໝ ແລະ ໃບຊາ ກໍ່ຍັງເປັນສິນຄ້າຫຼັກສົ່ງອອກທີ່ມີຊື່ສຽງໂດ່ງດັງໄປທົ່ວໂລກ.

ທະເລສາບຊີຫູເປັນແຫຼ່ງທ່ອງທ່ຽວທີ່ນັກທ່ອງທ່ຽວໃຫ້ຄວາມສົນໃນຫຼາຍ ເຊິ່ງເປັນສະຖານທີ່ເໝາະແກ່ການຜັກຜ່ອນ, ໂດຍມີກິດຈະກຳການຂີ່ເຮືອຊົມທິວທັດອ້ອມຮອບທະເລດ້ວຍເຮືອທີ່ຕົກແຕ່ງຢ່າງສວຍງາມ, ມີທັງເຮືອຈັກ ແລະ ເຮືອທີ່ໃຊ້ແຮງງານຄົນພາຍ ທີ່ເຂົ້າກັບບັນຍາກາດໃນທະເລຊາບທີ່ມີລົມພັດເຢັນຊຸ່ມຊື່ມຕະຫຼອດເວລາ. ອີກຝາກໜຶ່ງຂອງທະເລແມ່ນຄວາມຈະເລີນສີວິໄລ ແລະ ສິ່ງອຳນວຍຄວາມສະດວກ, ມີຕຶກສູງ, ມີທັງສະໜນາມບິນ, ທາງດ່ວນ, ທາງລົດໄຟ, ຫ້າງຊັບພະສິນຄ້າ ທັງຍັງເປັນທີ່ຕັ້ງສຳນັກງານໃຫຍ່ຂອງບໍລິສັດ ອາລີບາບາ ຫຼືທີ່ຮູ້ຈັກກັນດີໃນຊື່ ແຈ໊ກມ່າ ນັກທຸລະກິດຊື່ດັງຂອງຈີນ ແລະ ຍັງມີມະຫາວິທະຍາໄລເຈີ້ຈຽງ ທີ່ມີຊື່ສຽງໂດ່ງດັງ. ນອກນີ້ຫາງໂຈຍັງເປັນແຫຼ່ງຜະລິດສິນຄ້າຫຼາຍທີ່ສຸດໃນຈີນ ໂດຍສະເພາະຜະລິດຕະພັນຕົກແຕ່ງເຮືອນ, ເຄື່ອງໃຊ້ໃນຊີວິດປະຈຳວັນ ທີ່ມີການສົ່ງອອກຫຼາຍທີ່ສຸດໃນປະຈຸບັນ.

Medialaos khammouanenews.com