ທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີ ກະຊວງໄປສະນີ, ໂທລະຄົມມະນາຄົນ ແລະ ການສື່ສານ ພ້ອມດ້ວຍຫົວໜ້າ, ຮອງກົມອ້ອມຂ້າງ ໄດ້ເຄື່ອນໄຫວເຮັດວຽກຢູ່ແຂວງຄຳມ່ວນ ໃນວັນທີ 31 ຕຸລາ 2019 ເຊິ່ງໃຫ້ການຕ້ອນຮັບຄະນະດັ່ງກ່າວໂດຍທ່ານ ໄທຍະພອນ ສິງທອງ ຫົວໜ້າ ພະແນກໄປສະນີ, ໂທລະຄົມມະນາຄົມ ແລະ ການສື່ສານແຂວງຄຳມ່ວນ, ມີບັນດາພະນັກງານວິຊາການ, ອຳນວຍການບໍລິສັດທີ່ໃຫ້ການບໍລິການດ້ານ ໂທລະຄົມມະນາຄົມ ແລະ ສື່ສານພາຍໃນແຂວງເຂົ້າຮ່ວມ.

ທ່ານ ໄທຍະພອນ ສິງທອງ ໄດ້ລາຍງານການຈັດຕັ້ງປະຕິບັດວຽກງານໃນຂົງເຂດ ປທສ ແຂວງໃຫ້ຄະນະທ່ານ ຮອງລັດຖະມົນຕີຮັບຊາບວ່າ: ພະແນກ ປທສ ແຂວງຄຳມ່ວນ ປະກອບມີ 4 ຂະແໜງການ ແລະ 1 ຫ້ອງການ ປະຈຳເມືອງ, ມີພະນັກງານວິຊາການທັງໝົດ 33 ຄົນ. ເຊິ່ງພາຍໃນແຂວງມີບໍລິສັດທີ່ໃຫ້ການບໍລິການດ້ານໂທລະຄົມ ມະນາຄົມ ແລະ ສື່ສານຈຳນວນ 6 ບໍລິສັດຄື: ສາຂາບໍລິສັດ ລັດວິສາຫະກິດລາວໂທລະຄົມ, ສາຂາບໍລິສັດອີທີແອວ ມະຫາຊົນ, ສາຂາບໍລິສັດສະຕາໂທລະຄົມ, ໜ່ວຍບໍລິການບໍລິສັດວິວເປວຄອມ, ສາຂາບໍລິສັດສະກາຍໂທລະຄົມ ແລະ ສາຂາບໍລິສັດລາວສັດ, ໃນທົ່ວແຂວງມີຜູ້ໃຊ້ບໍລິການໂທລະສັບຕັ້ງໂຕະ ແລະ ມືຖືທັງໝົດ 307.243 ເລກໝາຍ ເພີ່ມຂຶ້ນ 0,14% ທຽບໃສ່ປີຜ່ານມາ ສະເລ່ຍເທົ່າກັບ 76,22 ເລກໝາຍຕໍ່ປະຊາກອນ 100 ຄົນ, ມີຜູ້ລົງທະບຽນ ນຳໃຊ້ອິນເຕີເນັດ 107.165 ເລກໝາຍ ເພີ່ມຂຶ້ນ 0,3%, ມີລະບົບສາຍໄຍແກ້ວນຳແສງ 5.581 ກິໂລແມັດ, ກວມເອົາພື້ນທີ່ທັງ 10 ຕົວເມືອງໃນທົ່ວແຂວງ, ມີເສົາສົ່ງສັນຍານໂທລະສັບທຸກລະບົບຈຳນວນ 508 ເສົາ ສາມາດ ຄວບຄຸມສັນຍານໂທລະສັບ ມືຖືທັງ 10 ຕົວເມືອງ ແລະ ກວມເອົາ 88% ຂອງຈຳນວນບ້ານໃນທົ່ວແຂວງ, ມີການໃຫ້ບໍລິການອິນເຕີເນັດ ຄວາມໄວສູງ (Broadband 4G) ຄວບຄຸມໃນເຂດເທສະບານ 10 ຕົວເມືອງ. ສະເພາະໃນໄລຍະ 09 ເດືອນຜ່ານມາ ສາມາດຕໍ່ໃບອະນຸຍາດດຳເນີນທຸລະກິດຮ້ານຂາຍ, ຕິດຕັ້ງ ແລະ ສ້ອມແປງ ອຸປະກອນໂທລະຄົມ, ຄອມພິວເຕີຈຳນວນ 39 ຮ້ານ, ອອກໃບອະນຸຍາດໃໝ່ 01 ຮ້ານ ແລະ ໃນປະຈຸບັນ ມີຮ້ານທີ່ປະກອບກິດຈະການດັ່ງກ່າວຈຳນວນ 52 ຮ້ານ.

ໂອກາດດັ່ງກ່າວ ທ່ານຮອງລັດຖະມົນຕີ ກະຊວງ ປທສ ກໍ່ໄດ້ໂອ້ລົມຕໍ່ພະນັກງານຫຼັກແຫຼ່ງຂົງເຂດ ປທສ ແຂວງຄຳມ່ວນ ໂດຍໃຫ້ສືບຕໍ່ເອົາໃຈໃສ່ດ້ານວຽກງານສຶກສາອົບຮົມການເມືອງ-ແນວຄິດສະມາຊິກພັກ-ພະນັກງານໃຫ້ມີ ຄວາມໜັກແໜ້ນ, ປັບປຸງລະບົບການຈັດຕັ້ງໃຫ້ມີຄວາມເໝາະສົມ ແລະ ເຂັ້ມແຂງ, ປັບປຸງການຈັດຕັ້ງປະຕິບັດ ວຽກງານໃຫ້ເຂົ້າສູ່ກັບນິຕິກຳຕົວຈິງ, ສືບຕໍ່ພັດທະນາລະບົບໂທລະຄົມມະນາຄົມ ແລະ ສື່ສານໃຫ້ມີການຂະຫຍາຍຕົວ ແລະ ທັນກັບສະພາບການ ເພື່ອກ້າວໄປສູ່ຍຸກຂໍ້ມູນຂ່າວສານທີ່ທັນສະໄໝໃນອະນາຄົດ, ການແຂ່ງຂັນຂອງບັນ ດາຫົວໜ່ວຍວິສາຫະກິດແມ່ນໃຫ້ຢູ່ໃນລະບຽບການ ແລະ ມີຄວາມເໝາະສົມທັງດ້ານປະລິມານ ແລະ ຄຸນນະພາບ ເພື່ອໃຫ້ມີຄວາມເປັນທຳລະຫວ່າງຜູ້ໃຫ້ບໍລິການ ແລະ ຜູ້ຊົມໃຊ້.

Medialaos khammouane