ໃນທ້າຍເດືອນຕຸລາຜ່ານມານີ້, ທະນາຄານບ້ານແທ່ນຄຳ ເມືອງຫົງສາ ແຂວງໄຊຍະບູລີ ໄດ້ຈັດກອງປະຊຸມສະຫຼຸບຜົນການຈັດຕັ້ງປະຕິບັດປະຈຳປີ 2019 ຂຶ້ນ. ຢູ່ທີ່ຫ້ອງປະຊຸມທະນາຄານບ້ານດັ່ງກ່າວ, ໂດຍການເປັນປະທານຮ່ວມຂອງທ່ານ ນາງ ດາວວິນ ລາດຊະກິດ ຮອງເຈົ້າເມືອງຫົງສາ, ທ່ານ ຄໍາພຽງ ຄຳມຸງຄຸນ ປະທານທະນາຄານບ້ານແທ່ນຄຳ ພ້ອມດ້ວຍຄະນະ, ມີຜູ້ອຳນວຍການສະຖາບັນການເງິນຈຸລະພາກທີ່ບໍ່ຮັບເງິນຝາກ ເມືອງຫົງສາ-ເມືອງເງິນ ແຂວງໄຊຍະບູລີ ແລະ ພ້ອມດ້ວຍສະມາຊິກຈຳນວນໜຶ່ງເຂົ້າຮ່ວມ.

ໃນກອງປະຊຸມຄັ້ງນີ້, ທ່ານ ຄຳພຽງ ຄຳມຸງຄຸນ ກໍ່ໄດ້ຜ່ານບົດສະຫຼຸບຜົນການຈັດຕັ້ງປະຕິບັດປະຈຳປີຂອງທະນາຄານບ້ານໂດຍຫຍໍ້ໃຫ້ຮູ້ວ່າ: ທະນາຄານບ້ານແທ່ນຄຳ ສ້າງຕັ້ງຂຶ້ນແຕ່ທ້າຍປີ 2007 ຈົນເຖິງປະຈຸບັນ ລວມໄດ້ 12 ປີ. ເຊິ່ງມີຄະນະກໍາມະການ 07 ທ່ານ ຍິງ 03 ທ່ານ, ມີສະມາຊິກທັງໝົດ 585 ຄົນ. ມີເງິນຝາກຂອງສະມາຊິກ ຈຳນວນ 4.879 ລ້ານກວ່າກີບ, ສາມາດປ່ອຍເງິນໃຫ້ສະມາຊິກກູ້ຍືມ 940 ລ້ານກວ່າກີບ. ປະຈຸບັນ, ທະນາຄານບ້ານ ມີເງິນທຶນທັງໝົດ 5.405 ລ້ານກວ່າກີບ. ໃນນີ້, ມີເງິນປະກອບຮຸ້ນນໍາສະຖາບັນການເງິນຈຸລະພາກທີ່ບໍ່ຮັບເງິນຝາກ ຈຳນວນ 100 ລ້ານກີບ. ໄດ້ຮັບເງິນປັນຮຸ້ນທ້າຍປີຈາກສະຖາບັນ ໄດ້ 44 ລ້ານກວ່າກີບ ແລະ ສ້າງຫ້ອງການທະນາຄານບ້ານໄດ້ 1 ຫຼັງ ມູນຄ່າ 100 ລ້ານກວ່າກີບ.

ຜ່ານການຈັດຕັ້ງປະຕິບັດໃນໜຶ່ງປີຜ່ານມາ ເຫັນໄດ້ວ່າ: ມີຜົນກຳໄລທັງໝົດ 424 ລ້ານກວ່າກີບ (ທຽບໃສ່ປີ 2018 ເພີ່ມຂຶ້ນ 93 ລ້ານກວ່າກີບ) ແລະ ສາມາດປັນຜົນໄດ້ຕາມສັດສ່ວນຄື: ແບ່ງໃຫ້ສະມາຊິກ 70%, ແບ່ງໃຫ້ຄະນະກຳມະການ 20%, ຫັກເຂົ້າຄັງເກັບໄວ້ສໍາຮອງທົ່ວໄປ 5% ແລະ ຫັກເຂົ້າຄັງສຳຮອງໜີ້ເສຍ 5%. ຈາກນັ້ນ, ກໍ່ໄດ້ປັບປຸງກົດລະບຽບພາຍໃນຂອງທະນາຄານບ້ານ ເພື່ອໃຫ້ແທດເໝາະ ແລະ ຖືກຕ້ອງສອດຄ່ອງ ພ້ອມທັງຮັບຮອງເອົາ. ພ້ອມນີ້, ທ່ານ ຈ່າຍຄຳ ລໍບັນລິດ ອຳນວຍການສະຖາບັນການເງິນຈຸລະພາກທີ່ບໍ່ຮັບເງິນຝາກ ເມືອງຫົງສາ-ເມືອງເງິນ ແຂວງໄຊຍະບູລີ ກໍ່ໄດ້ກ່າວເພີ່ມວ່າ: ສະຖາບັນການເງິນຈຸລະພາກຂອງພວກເຮົາ ມີໜ້າທີ່ບໍລິການດ້ານເງິນກູ້, ເງິນຝາກຂອງບັນດາຂາຮຸ້ນ, ການໂອນເງິນດ່ວນ ແລະ ສາມາດບໍລິການໄດ້ທົ່ວເຖິງ ດ້ວຍຄວາມວ່ອງໄວທັນໃຈໃນການໂອນ ແລະ ການຮັບ ອັນໄດ້ສ້າງຄວາມສົນໃຈໃຫ້ແກ່ລູກຄ້າ ທີ່ມາບໍລິການນັບມື້ນັບເພີ່ມຂຶ້ນ.

ໃນໂອກາດທີ່ມີຄວາມໝາຍ-ຄວາມສຳຄັນນີ້, ທ່ານ ນາງ ດາວວິນ ລາດຊະກິດ ຮອງເຈົ້າເມືອງຫົງສາ ກໍ່ໄດ້ສະແດງຄວາມຍ້ອງຍໍຊົມເຊີຍ ຕໍ່ກັບຜົນສຳເລັດຂອງທະນາຄານບ້ານແທ່ນຄຳ ແລະ ສະຖາບັນການເງິນຈຸລະພາກທີ່ບໍ່ຮັບເງິນຝາກ ເມືອງຫົງສາ-ເມືອງເງິນ ແຂວງໄຊຍະບູລີ ທີ່ໄດ້ກະຕຸກຊຸກຍູ້, ສົ່ງເສີມໃຫ້ປະຊາຊົນມີລາຍຮັບເພີ່ມຂຶ້ນ ແລະ ເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນເປັນກ້າວໆ.

ພາບ-ຂ່າວ: ກິດຕິສັກ ບົວໄລ.
Medialaos xayaboury