ເມືອງຫາງໂຈ ເປັນເມືອງທີ 3 ທີ່ຄະນະທີມງານຊື່ມວນຊົນລາວໄດ້ເດີນທາງໄປຢ້ຽມຊົມ ໃນໂຄງການທັດສະນະສຶກສາເກັບກຳຂໍ້ມູນ ເພື່ອໂຄສະນາສົ່ງເສີມການທ່ອງທ່ຽວຈີນ ໃນລະຫວ່າງວັນທີ 13-23 ຕຸລາ 2019 ເຊິ່ງເມືອງຫາງໂຈ ແຂວງເຈີ້ຈຽງ ເປັນເມືອງເສດຖະກິດທີ່ສຳຄັນຂອງຈີນ ທີ່ໄດ້ຮັບການພັດທະນາສູງ, ມີວັດທະນະທຳທີ່ຍາວນານ, ເປັນເມືອງທີ່ມີທັດສະນີຍະພາບສວຍງາມ, ຈະເຈີນສີວິໄລດ້ວຍອຸດສາຫະກຳ ແລະ ສະຖາບັນສີລະປະທີ່ຫຼາກຫຼາຍ.

ນອກຈາກເສດຖະກິດມີຄວາມຈະເລີນສີວິໄລ ແລະ ຄວາມທັນສະໄໝ ການທ່ອງທ່ຽວກໍ່ແມ່ນໜຶ່ງໃນຫຼາຍດ້ານທີ່ນັກທ່ອງທ່ຽວໃຫ້ຄວາມສົນໃຈ ເນື່ອງຈາກຫາງໂຈ ເປັນເມືອງທີ່ມີທັດສະນີຍະພາບສວຍງາມ ດັ່ງຄຳສຸພາສິດຈີນທີ່ເວົ້າວ່າ “ຢູ່ບົນຟ້າມີສະຫວັນ ບົນພື້ນດິນມີຊູ ຫາງ” (ຊູ ແມ່ນມາຈາກຄຳວ່າຊູໂຈ ແລະ ຫາງ ມາຈາກຫາງໂຈ) ຫາງໂຈມີແຫຼ່ງທ່ອງທ່ຽວຫຼາຍແຫ່ງທີ່ມີຊື່ສຽງໂດ່ງດັງ ໃນນີ້ຈະພາທ່ານໄປຮູ້ຈັກກັບບັນດາແຫຼ່ງທ່ອງທ່ຽວທີ່ຄະນະສື່ມວນຊົນລາວໄດ້ເດີນທາງໄປເກັບກຳຂໍ້ມູນໂດຍເລີ່ມຕົ້ນຈາກທະເລສາບ ຊີຫູ ເປັນສັນຍາລັກຂອງເມືອງ, ມີນໍ້າໃສສະອາດ ຢູ່ອ້ອມຮອບມີທັງພູເຂົາ, ຕຶກຕົວເມືອງ ແລະ ມີເກາະຢູ່ໃຈກາງ, ມີເຮືອທີ່ຄອຍໃຫ້ບໍລິການແກ່ນັກທ່ອງທ່ຽວນັ່ງຊົມທິວທັດບໍລິເວນອ້ອມຮອບ ບໍ່ວ່າຈະເປັນເຮືອຈັກທີ່ມີການຕົກແຕ່ງສວຍງາມ ແລະ ເຮືອທີ່ໃຊ້ແຮງງານຄົນພາຍທີ່ເຂົ້າກັບບັນຍາກາດດີ.

ໃນທະເລສາບແຫ່ງນີ້ຍັງເປັນທີ່ມາຂອງຕໍານານ “ນາງພະຍາງູຂາວ” ເມື່ອລ່ອງເຮືອໄປຈະເຫັນເຈດີ ເຫຼຍເຟິງ ຫຼືເຈດີນາງພະຍາງູຂາວ ເປັນເຈດີ 8 ຫຼ່ຽມ, ສູງ 5 ຊັ້ນ ທີ່ຕັ້ງຢູ່ຍອດພູທາງທິດໄຕ້ຂອງທະເລສາບ ເຊິ່ງເປັນຕຳນານແຫ່ງຄວາມຮັກອັນລືຊື່ລະຫວ່າງຊາຍໜຸ່ມຮູບຮ່າງງາມ ກັບຍິງທີ່ແປງກາຍມາຈາກງູຂາວ. ມາຕໍ່ທີ່ຖະໜົນ Qinghefang ເປັນເຂດທີ່ທາງການຂອງຫາງໂຈກຳນົດເປັນເຂດເສດຖະກິດ, ວັດທະນະທຳ ໂດຍເລີ່ມເປີດບໍລິການໃນປີ 2002 ສະຖານທີ່ນີ້ຈະປະກອບມີຮ້ານຄ້າ, ຮ້ານອາຫານແບບດັ້ງເດີມ, ເສື້ອຜ້າ, ຮ້ານຊາ ແລະ ຮ້ານຂາຍເຄື່ອງຂອງທີ່ລະນຶກຕ່າງໆ ໂດຍຖະໜົນມີຄວາມຍາວປະມານ 1,8 ກິໂລແມັດ ສາມາດຍ່າງຊົມໄດ້ຢ່າງເພີນຕາ ແລະ ຍັງສາມາດຊີມເຂົ້າໜົມທີ່ເປັນເອກະລັກຂອງທີ່ນີ້ໄດ້. ວັດຫຼິງຢິນ ເປັນວັດທີ່ເກົ່າແກ່ ແລະ ມືຊື່ສຽງທີ່ສຸດຂອງຈີນ ທີ່ມີອາຍຸປະມານ 1.700 ປີ ໃນບໍລິເວນວັດຈະແບ່ງອອກເປັນ 2 ໂຊນຄື:

ໂຊນເຂດນອກວັດຈະເປັນພູເຂົາ, ມີຖ້ຳ ແລະ ພະພຸດທະຮູບແກະສະລັກຈາກຫີນແຈກຢາຍຢູ່ຈຸດຕ່າງໆ ເຊິ່ງແຕ່ລະຮູບຈະມີປະຫວັດຄວາມເປັນມາທີ່ແຕກຕ່າງກັນ ສ່ວນໂຊນເຂດໃນວັດຈະເຕັມໄປດ້ວຍສະຖານທີ່ສຳລັບກາບໄຫວ້ບູຊາ, ມີພະພຸດທະຮູບແກະສະລັກດ້ວຍໄມ້ຫຼາຍຮ້ອຍອົງ, ມີຮູບແຕ້ມທີ່ສະແດງໃຫ້ເຫັນເຖິງປະຫວັດຄວາມເປັນມາ ແລະ ສ່ອງແສງເຖິງການປ່ຽນແປງໃນແຕ່ລະສະໄໝ ໃນອ້ອມຮອບກໍ່ຈະເຕັມໄປດ້ວຍປ່າໄມ້ທີ່ມີທິວທັດສວຍງາມ. ຫາງໂຈຍັງເປັນເມືອງທີ່ມີຊື່ສຽງເລື່ອງໃບຊາ ເຊິ່ງຊາຫຼົງຈິ່ງ ເປັນຊາທີ່ໂດ່ງດັງທີ່ສຸດໃນຈີນ ທີ່ມີປະຫວັດຄວາມເປັນມາຫຼາຍກວ່າ 6 ພັນປີ, ຊາຫຼົງຈິ່ງເຄີຍໄດ້ຮັບລາງວັນຊາທີ່ດີທີ່ສຸດໃນປີ 1915 ໃນການເຂົ້າປະກວດທີ່ປະເທດ ປານາມາ ຖ້າຫາກທ່ານໃດສົນໃຈແມ່ນສາມາດເຂົ້າຊົມໄດ້ທີ່ຫໍພິພິທະພັນຊາ ເມືອງຫາງໂຈ ເຊິ່ງຫໍພິພິທະພັນດັ່ງກ່າວແມ່ນຈະນຳເອົາບັນດາຊາໂດ່ງດັງມາວາງສະແດງໃຫ້ໄດ້ຊົມຫຼາຍຊະນິດ.

ມາຕໍ່ກັນອີກ 1 ສະຖານທີ່ ທີ່ບໍ່ຄວນພາດໂອກາດເມື່ອໄປທ່ຽວທີ່ຫາງໂຈ ຄືເຈດີຫຼິວເຫີ້ຖາງ ທີ່ຕັ້ງຢູ່ແຄມແມ່ນ້ຳສຽນຖາງ, ເປັນເຈດີ 13 ຊັ້ນ, ສູງ 47 ແມັດ ແລະ ມີອາຍຸ ປະມານ 1.100 ປີ, ເມື່ອຂຶ້ນໄປເທິງເຈດີຈະແນມເຫັນ ຄວາມສວຍງາມຂອງຕຶກຕົວເມືອງຫາງໂຈ ທີ່ຕັ້ງຢູ່ອີກຝາກຂອງແມ່ນ້ຳ, ມີຂົວທີ່ຕັດຜ່ານຈາກຝາກໜຶ່ງໄປສູ່ອີກຝາກ ຖືເປັນວິວທີ່ມີຕຶກຕົວເມືອງກົມກືນກັບແມ່ນ້ຳທີ່ໄຫຼຜ່ານສວຍງາມ ແລະ ໜ້າປະທັບໃຈຫຼາຍ ແຕ່ຖ້າທ່ານໃດຕ້ອງການຈະເຫັນວິວງາມໆແບບນີ້ຕ້ອງກຽມພ້ອມທາງດ້ານຮ່າງກາຍໜ້ອຍໜຶ່ງ ເພາະເລີ່ມແຕ່ຊັ້ນລຸ່ມຂຶ້ນຮອດເທິງສຸດຂອງເຈດີຈະຕ້ອງໄດ້ຍ່າງຜ່ານຂັ້ນໄດເຖິງ 200 ກວ່າຂັ້ນ.