ອຸທຸມພອນ ສັງເກດຄືນຜົນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກເມືອງຜ່ານມາ ແຕ່ປີ 2015-2019

0
247

ຕາມການລາຍງານຂອງ ສະຫາຍ ປະສົງສິນ ຈະເລີນສຸກ ກຳມະການພັກແຂວງ ເລຂາຄະນະບໍລິຫານງານ ພັກເມືອງ ເຈົ້າເມືອງອຸທຸມພອນ ຕໍ່ກອງປະຊຸມດຳເນີນຊີວິດການເມືອງ ຄົບຄະນະບໍລິຫານງານພັກເມືອງອຸທຸມພອນເປີດກວ້າງ ທ້າຍສະໄໝ ໄດ້ໃຫ້ຮູ້ວ່າ: ໃນ 5 ປີຜ່ານມານີ້ ເມືອງພວກເຮົາ ຍັງຮັກສາໄດ້ສະຖຽນລະພາບທາງດ້ານການ ເມືອງ, ລະບົບເສດຖະກິດຍັງຂະຫຍາຍຕົວໝັ້ນທ່ຽງ, ລະດັບຊີວິດການເປັນ ຢູ່ຂອງປະຊາຊົນຍັງຢູ່ໃນທວງທ່າທີ່ດີຂຶ້ນເປັນກ້າວໆ, ບັນດາອິດທິກໍາລັງປໍລະປັກ ຍັງສືບຕໍ່ດໍາເນີນນະໂຍບາຍຫັນປ່ຽນ ໂດຍສັນຕິ, ພວກກຸ່ມຄົນບໍ່ດີຍັງສືບຕໍ່ເຄື່ອນໄຫວມ້າງເພແນວທາງນະໂຍບາຍຂອງພັກ-ລັດ ດ້ວຍຫຼາຍຮູບແບບ ຫຼາຍວິທີ ເປັນຕົ້ນ:

ໂຄສະນາບິດເບືອນໃສ່ຮ້າຍປ້າຍສີທາງອິນເຕີເນັດ ແລະ ສື່ສັງຄົມອອນລາຍ, ບາງປະກົດການຫຍໍ້ທໍ້ໃນສັງຄົມ ຍັງບໍ່ທັນໄດ້ຮັບການແກ້ໄຂໃຫ້ໝົດໄປ ເປັນຕົ້ນ: ບັນຫາຢາເສບຕິດ, ຂີ້ລັກງັດແງະ, ການປຸ້ນຈີ້, ອຸປະຕິເຫດຕາມທ້ອງຖະຫນົນ, ການຖິ້ມຂີ້ເຫຍື້ອຊະຊາຍ ຍັງມີລັກສະນະເພີ່ມຂຶ້ນ; ລາຄາສິນຄ້າໝວດສະບຽງອາຫານບາງປະເພດເໜັງຕີງເພີ່ມຂຶ້ນ, ບັນຫາໄພທໍາມະຊາດ ທີ່ເກີດຂຶ້ນໃນທຸກປີ, ແຕ່ເຖິງຢ່າງໃດກໍ່ຕາມ ພາຍໃຕ້ການຊີ້ນໍາ-ນໍາພາຂອງອົງຄະນະພັກເມືອງ, ການຈັດຕັ້ງທຸກຂັ້ນ ແລະ ປະຊາຊົນບັນດາເຜົ່າພາຍໃນເມືອງພວກເຮົາ ກໍ່ສາມາດຜ່ານຜ່າອຸປະສັກ ແລະ ຍາດໄດ້ຜົນສໍາເລັດຫຼາຍດ້ານ ໂດຍສະເພາະວຽກປ້ອງກັນຊາດ-ປ້ອງກັນຄວາມສະຫງົບ ໄດ້ເພີ່ມທະວີການຊີ້ນໍາ-ນໍາພາຕໍ່ວຽກ ງານປ້ອງກັນຊາດ-ປ້ອງກັນຄວາມສະຫງົບຢ່າງແຂງແຮງ, ສຶກສາອົບຮົມ ນໍາພາແນວຄິດ ໃຫ້ພະນັກງານນັກຮົບ, ສະມາຊິກພັກ, ປະຊາຊົນບັນດາເຜົ່າ ໃຫ້ເປັນເຈົ້າການເຂົ້າຮ່ວມຈັດຕັ້ງປະຕິບັດ ແນວທາງປ້ອງກັນຊາດ-ປ້ອງກັນ ຄວາມສະຫງົບທົ່ວປວງຊົນຮອບດ້ານ ເຊິ່ງສະແດງອອກໃນການປະກອບສ່ວນພັນທະເຂົ້າ 20 ກິໂລ ແລະ ອື່ນໆ ເພີ່ມຂຶ້ນ 22,95%, ຝຶກແອບສີລະປະຍຸດ, ຍຸດທະວິທີ ແລະ ວິຊາສະເພາະໃຫ້ກໍາລັງ ປກຊ-ປກສ ຮັບປະກັນໄດ້ທັງປະລິມານ ແລະ ຄຸນນະພາບ ເຊິ່ງສະແດງອອກຈໍານວນກອງຫຼອນ ກວມ 0,85% ຖ້າທຽບໃສ່ພົນລະເມືອງ ເພີ່ມຂຶ້ນ 0,06%, ຫັນພະນັກງານນັກຮົບລົງກໍ່ສ້າງຮາກຖານການເມືອງ ຊຶ່ງພວກເຮົາສາມາດທັບມ້າງ ກົນອຸບາຍຫັນປ່ຽນ ໂດຍສັນຕິຂອງສັດຕູ ແລະ ການເຄື່ອນໄຫວຂອງບັນດາ ອິດທິກໍາລັງປໍລະປັກລົງໄດ້ເປັນກ້າວໆ; ປະກົດການຫຍໍ້ທໍ້ໃນສັງຄົມຫຼາຍອັນໄດ້ຮັບການແກ້ໄຂ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍດີຂຶ້ນ;

ໄດ້ສຸມໃສ່ສ້າງບ້ານປ້ອງກັນຊາດເຂັ້ມແຂງ ເຊິ່ງສາມາດຮັບຮອງເປັນບ້ານດັ່ງກ່າວໄດ້ແລ້ວ 62 ບ້ານເທົ່າກັບ 88,57%, ມີຄອບຄົວປ້ອງກັນຊາດເຂັ້ມແຂງ 13.776 ຄອບຄົວເທົ່າກັບ 91,09%, ປະກາດສ້າງບ້ານປອດຢາເສບຕິດໄດ້ 70 ບ້ານ ໃນນີ້ ໄດ້ຮັບຮອງແລ້ວ 4 ບ້ານເທົ່າກັບ 5,71%; ສ້າງບ້ານປ້ອງກັນຄວາມສະຫງົບດີໄດ້ 70 ບ້ານກວມ 100%, ມີຄອບຄົວປ້ອງກັນຄວາມສະຫງົບດີ 12.184 ຄອບຄົວ ກວມ 91,07%; ປະຊາຊົນໄດ້ເປັນເຈົ້າການປະກອບສ່ວນທາງດ້ານວັດຖຸຈິດໃຈຕໍ່ວຽກງານດັ່ງກ່າວນັບມື້ຫຼາຍຂຶ້ນ, ທົ່ວເມືອງມີຄວາມສະຫງົບ ແລະ ເປັນ ລະບຽບຮຽບຮ້ອຍດີ. ສຳລັບວຽກງານພັດທະນາເສດຖະກິດ ແລະ ແກ້ໄຂຄວາມທຸກຍາກຂອງປະຊາຊົນ ຜົນງານທີ່ພົ້ນເດັ່ນໃນໄລຍະທີ່ຜ່ານມາ ແມ່ນເສດຖະກິດຂອງເມືອງຍັງສືບຕໍ່ຂະຫຍາຍຕົວຕໍ່ເນື່ອງ ດ້ວຍອັດຕາການຂະຫຍາຍ ຕົວຢູ່ໃນລະດັບ 8%/ປີ, ລວມຍອດຜະລິດຕະພັນພາຍໃນບັນລຸ 1.777 ຕື້ກວ່າກີບ ເພີ່ມຂຶ້ນ 58,71% ສະເລ່ຍລາຍຮັບຕໍ່ຫົວຄົນ 18 ລ້ານກວ່າກີບ ຫຼື 2 ພັນກວ່າໂດລາ/ຄົນ/ປີ ເພີ່ມຂຶ້ນ 53,96%. ໃນນີ້ ຂະແຫນງກະສິກໍາ-ປ່າໄມ້ ກວມ 44,77%, ຂະແຫນງອຸດສາຫະກໍາ-ຫັດຖະກໍາ ກວມ 41,75%, ຂະແຫນງບໍລິການ ກວມ 13,48%. ສ່ວນດ້ານການພັດທະນາພື້ນຖານໂຄງລ່າງ ໄດ້ເອົາໃຈໃສ່ນໍາພາປະຊາຊົນຟື້ນຟູ ແລະ ພັດທະນາພື້ນຖານໂຄງລ່າງ ແຕ່ລະບ້ານໃຫ້ໄປມາໄດ້ສະດວກ, ຫົນທາງຫຼາຍເສັ້ນໄດ້ຮັບການບູລະນະສ້ອມແປງ ແລະ ກໍ່ສ້າງຄືນໃໝ່ ເຊິ່ງໄດ້ເຮັດໃຫ້ເສັ້ນທາງຫຼາຍເສັ້ນສາມາດໄປມາໄດ້ສະດວກ ລະຫວ່າງບ້ານຕໍ່ບ້ານ ແລະ ແຕ່ບ້ານຫາເທດສະບານເມືອງ, ຢູ່ບໍລິເວນເດີ່ນ 3 ລ່ຽມທາງແບ່ງປິ້ງໄກ່ເຊໂນ ກໍ່ໄດ້ຮັບການພັດທະນາ ສ້າງໃຫ້ກາຍເປັນຈຸດພັກລົດລະດັບພາກພື້ນ, ອັນພົ້ນເດັ່ນ ແມ່ນການກໍ່ສ້າງເສັ້ນທາງ ເລກທີ 10 ເຊິ່ງໃນຕໍ່ຫນ້າຈະກາຍເປັນບາດລ້ຽວໃໝ່ຂອງຊາວເມືອງອຸທຸມພອນພວກເຮົາ. ການປັບປຸງລະບົບຕົວເມືອງໄດ້ຫັນໄປຕາມແຜນຜັງເມືອງທີ່ມີແລ້ວ, ລະບົບນ້ໍາປະປາ-ບາດານ ໄດ້ຮັບການຂະຫຍາຍຕົວ ຈາກເຂດເທດສະບານເມືອງອອກສູ່ເຂດນອກເມືອງ, ຄອບຄົວຊົມໃຊ້ເພີ່ມຂຶ້ນ 2,37%. ບັນດາໂຄງການລົງທຶນ ບູລິມະສິດທີ່ນອນໃນແຜນພັດທະນາເສດຖະກິດ-ສັງຄົມ ມີທັງຫມົດ 132 ໂຄງການ ສາມາດປະຕິບັດໄດ້ 84 ໂຄງການ ມູນຄ່າ 466 ຕື້ກວ່າກີບ ໃນນີ້ :

ທຶນລັດ 449 ຕື້ກວ່າກີບ, ທຶນປະຊາຊົນ 2 ຕື້ກວ່າກີບ, ທຶນຕ່າງປະເທດ 14 ຕື້ກວ່າກີບ. ການຈັດເກັບລາຍຮັບ ກໍ່ໄດ້ເພີ່ມຂຶ້ນໃນແຕ່ລະປີ ເຊິ່ງສາມາດປະຕິບັດ ໄດ້ 23,382 ຕື້ກີບ ເພີ່ມຂຶ້ນ 46,76% ແລະ ການຄຸ້ມຄອງລາຍຈ່າຍງົບປະມານ ປະຕິບັດໄດ້ 30,679 ຕື້ກີບ ເພີ່ມຂຶ້ນ 33,65%. ບັນດາໜ່ວຍບໍລິການທີ່ເປັນຕົວແທນໃຫ້ທະນາຄານຕ່າງໆ ກໍ່ໄດ້ເອົາໃຈໃສ່ໃນການບໍລິການເຮັດທຸລະກໍາທາງດ້ານການເງິນ ເຊັ່ນ: ເງິນຝາກເປັນສະກຸນເງິນຕ່າງໆ, ການປ່ອຍສິນເຊື່ອ, ບັດ ATM ໄດ້ເພີ່ມຂຶ້ນຢ່າງກ້ວາງຂວາງ, ນອກນີ້ກໍ່ຍັງມີການບໍລິການຂອງສະຫະກອນສິນເຊື່ອ ແລະ ກອງທຶນພັດທະນາບ້ານທີ່ເຄື່ອນໄຫວໄດ້ດີສົມຄວນ. ເຊິ່ງກອງປະຊຸມດຳເນີນຊີວິດການເມືອງ ຄົບຄະນະບໍລິຫານງານພັກເມືອງອຸທຸມພອນເປີດກວ້າງ ທ້າຍສະໄໝ ໄດ້ຈັດຂຶ້ນໃນຕອນເຊົ້າຂອງວັນທີ 4 ພະຈິກ 2019 ຢູ່ທີ່ສະໂມສອນຂອງເມືອງ ໂດຍການເປັນປະທານຂອງ ສະຫາຍ ກົງຈັກ ໜໍ່ແກ້ວ ກຳມະການປະຈຳພັກແຂວງ ຫົວໜ້າພະແນກການເງິນແຂວງ, ມີບັນດາສະຫາຍ ຄະນະບໍລິຫານງານພັກເມືອງ, ນາຍ ແລະ ພົນທະຫານ, ນາຍ ແລະ ພົນຕຳຫຼວດ, ຫົວໜ້າ-ຮອງຫົວໜ້າ ຫ້ອງການ, ເລຂາຄະນະຮາກຖານ ແລະ ເລຂາໜວຍພັກ, ນາຍບ້ານໃນທົ່ວເມືອງເຂົ້າຮ່ວມ ແລະ ຈະໄດ້ດໍາເນີນເປັນ ເວລາ 03 ວັນ ວັນທີ 4-6 ພະຈິກ 2019 ຈຶ່ງຈະສິ້ນສຸດລົງ.

ຂ່າວ ພອນປະເສີດ ແຜນພັກດີ
savannakhet medialaos