ພະແນກ ແຮງງານ ແລະ ສະຫວັດດີການສັງຄົມແຂວງ ໄຊຍະບູລີລົງເຜີຍແຜ່ເອກະສານກຽ່ວກັບການເຄື່ອນຍ້າຍແຮງງານແບບປອດໄພ ແລະ ການນໍາໃຊ້ເວບໄຊສາທາລະນະຊົນຢູ່ບ້ານໂພນສະອາດ ເມືອງ ໄຊຍະບູລີ ວັນທີ 11 ພະຈີກ 2019 ນີ້ທີ່ຫ້ອງປະຊຸມຂອງບ້ານດັ່ງກ່າວ. ໂດຍການໃຫ້ກຽດເຂົ້າຮ່ວມຂອງທ່ານ ໜູພອນ ໄຊປັນຍາຈິດ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ, ມີທ່ານ ຈານລິດ ຈັນທະວົງ ເລຂາໜ່ວຍພັກ ນາຍບ້ານໂພນສະອາດ, ມີຂະແໜງການທີ່ກ່ຽວຂ້ອງຂອງແຂວງ, ຮອງຫົວໜ້າຫ້ອງການຂອງເມືອງ, ຂະແໜງການຂອງບ້ານ, ຫົວໜ້າໜ່ວຍ, ຕະຫຼອດຮອດພໍ່ແມ່ປະຊາຊົນບ້ານດັ່ງກ່າວເຂົ້າຮ່ວມ 80 ກວ່າຄົນ.

ໃນພິທີທ່ານ ໜູພອນ ໄຊປັນຍາຈິດ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມແຂວງໄຊຍະບູລີໄດ້ກ່າວວ່າ: ຈຸດປະສົງຂອງການລົງເຜີຍແຜ່ເອກະສານກຽ່ວກັບການເຄື່ອນຍ້າຍແຮງງານແບບປອດໄພ ແລະ ການນໍາໃຊ້ເວບໄຊສາທາລະນະຊົນຢູ່ບ້ານໂພນສະອາດ ເມືອງ ໄຊຍະບູລີ ໃນຄັ້ງນີ້ກໍ່ແມ່ນເພື່ອເຮັດໃຫ້ຜູ້ເຂົ້າຮ່ວມໄດ້ຮັບຮູ້, ສະພາບລວມກ່ຽວກັບການເຄື່ອນຍ້າຍແຮງງານ ແລະ ວິທີການເຄື່ອນທີ່, ຜົນດີ ແລະ ຜົນສ່ຽງຂອງການເຄື່ອນຍ້າຍແຮງງານ, ສິດຂອງແຮງງານເຄື່ອນຍ້າຍ, ຄວາມສຳຄັນຂອງສັນຍາແຮງງານ, ຮູບແບບຂອງການເຂົ້າອອກເມືອງ, ສະພາບຂອງການເຮັດວຽກ ແລະ ການດຳລົງຊີວິດຂອງການເຄື່ອນຍ້າຍແຮງງານ, ບັນຫາ ແລະ ສີ່ງທ້າທາຍຂອງແຮງງານເຄື່ອນຍ້າຍ, ປະເພດອາຊີບ ແລະ ຂົງເຂດທີ່ຫ້າມສົ່ງແຮງງານລາວໄປເຮັດວຽກຢູ່ຕ່າງປະເທດ, ການຂໍຄວາມຊ່ວຍເຫຼືອຕ່າງໆຢູ່ລາວ ແລະ ໄທຂອງແຮງງານເຄື່ອນຍ້າຍ. ນຳສະເໜີກ່ຽວກັບຈຸດບໍລິການຫາງານ, ນຳສະເໜີການນຳໃຊ້ເວບໄຊສາທາລະນະຊົນຢູ່ ສປປລາວ ທັງນີ້ກໍ່ເພື່ອເຮັດໃຫ້ຜູ້ເຂົ້າຮ່ວມຮັບຮູ້ ແລະ ນຳໄປຈັດຕັ້ງປະຕິບັດໃຫ້ຖືກຕ້ອງຕາມລະບຽບຫຼັກການ.

ໂດຍ: ສົມພົງ ສີສະຫວັດ.
Medialaos xayaboury