ໃນຕອນເຊົ້າຂອງວັນທີ 12 ພະຈິກ 2019, ທີ່ຫ້ອງປະຊຸມໃຫຍ່ເມືອງ ໄຊສະຖານ ແຂວງ ໄຊຍະບູລີ ໄດ້ຈັດກອງປະຊຸມ ສະຫຼຸບຂະບວນການແຂ່ງຂັນຮັກຊາດ ແລະ ພັດທະນາຂຶ້ນ, ເປັນກຽດເຂົ້າຮ່ວມມີ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ, ມີ ທ່ານ ກອງສີ ວົງສີ ເຈົ້າເມືອງ ໄຊສະຖານ, ມີແຂກຮັບເຊີນຈາກແຂວງ, ມີຫົວໜ້າ, ຮອງຫົວໜ້າຫ້ອງການ, ມີກໍາລັງປະກອບອາວຸດ, ຕະຫຼອດເຖິງອໍານາດກອນປົກຄອງແຕ່ລະບ້ານ ແລະ ນັກທຸລະກິດ-ຜູ້ປະກອບການພາຍໃນເມືອງເຂົ້າຮ່ວມຢ່າງຫຼວງຫຼາຍ.

ທ່ານ ສົມນືກ ພອນວິຈິດ ຮອງເຈົ້າເມືອງໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດຂະບວນການແຂ່ງຂັນຮັກຊາດ ແລະ ພັດທະນາ ວ່າ: ເພື່ອຜັນຂະຫຍາຍແນວທາງຂອງພັກ-ລັດໃຫ້ເຂົ້າສູ່ຊີວິດຕົວຈີງ, ໂດຍສະເພາະແມ່ນແຜນພັດທະນາເສດຖະກິດ-ສັງຄົມຂອງເມືອງວາງອອກໃນຂົງເຂດວຽກງານຕ່າງໆ ແລະ ເພື່ອເປັນການສ້າງຂະບວນການຮອບດ້ານກະກຽມໃຫ້ແກ່ການດໍາເນີນກອງປະຊຸມອົງຄະນະພັກເມືອງໃຫ້ມີເນື້ອໃນສົມບູນ ແລະ ຄົບຖ້ວນ, ອົງການປົກຄອງເມືອງຈຶ່ງໄດ້ເປີດຂະບວນການຮັກຊາດ ແລະ ພັດທະນາຂຶ້ນ, ໂດຍເລີ່ມຈາກບຸກຄົນ, ຄອບຄົວ, ໜ່ວຍຄຸ້ມຄອງ, ຈຸງານ, ໜ່ວຍງານ, ບ້ານ, ຫ້ອງການ, ອົງການ ແລະ ກົມກອງອ້ອມຂ້າງເມືອງ, ໂດຍໄດ້ຖືເອົາຂໍ້ແຂ່ງຂັນເປັນໄມ້ຫຼາວັດແທກ ແລະ ປະເມີນຜົນຕາມ 4 ເນື້ອໃນ 4 ຄາດໝາຍ, ຜ່ານການແຂ່ງຂັນເຫັນວ່າແຕ່ລະຄອບຄົວແມ່ນມີການຜະລິດເປັນສິນຄ້າ, ມີຄວາມສາມັກຄີປອງດອງ, ບໍ່ລະເມີດກົດໝາຍ, ມີການສືກສາດີ, ໄດ້ຢັ້ງຢືນເປັນຄອບຄົບແບບຢ່າງແມ່ຍິງ 3 ດີ ຈໍານວນ 1.198 ຄອບຄົບ, ແບບຢ່າງປະຕິບັດກົດໝາຍ 2.133 ຄອບຄົວ, ຢຸດຕິການຖາງປ່າເຮັດໄຮ່ 1.984 ຄອບຄົວ, ປ້ອງກັນຄວາມສະຫງົບດີ, 2.618 ຄອບຄົວ, ປ້ອງກັນຊາດເຂັ້ມແຂງ 2.106 ຄອບຄົວ, ສາທາລະນະສຸກແບບຢ່າງ 987 ຄອບຄົວ, ປອດຢາເສບຕິດ 2.698 ຄອບຄົບ, ຄອບຄົວວັດທະນະທໍາ 1.880 ຄອບຄົວ ແລະ ຄອບຄົວພັດທະນາ 297 ຄອບຄົວ, ມີການຈັດຕັ້ງໜັກແໜ້ນ ແລະ ເຂັ້ມແຂງປະຕິບັດໄດ້ 89%, ມີຫົວຄິດປະດິດສ້າງ ແລະ ມີຂະບວນການຕໍ່ເນື່ອງໄດ້ 95%, ມີຄວາມສາມັກຄີປອງດອງພາຍໃນ ແລະ ພາຍນອກໄດ້ 90%, ບໍ່ສວຍໂອກາດເພື່ອຫາຜົນປະໂຫຍດສ່ວນຕົວ ແລະ ການຈັດຕັ້ງໄດ້ 85%, ບໍ່ລະເມີດລະບຽບກົດໝາຍໄດ້ 80% ແລະ ມີສ່ວນຮ່ວມໃນການພັດທະນາຕົວເມືອງສີຂຽວສະອາດໄດ້ 80%, ສາມາດແບ່ງປະເພດຂອງຄອບຄົວຊາວກະສິກອນໄດ້ປະເພດ I ມີ 1.234 ຄອບຄົວ, ປະເພດ II ມີ 890 ຄອບຄົວ, ປະເພດ III ມີ 278 ຄອບຄົວ ແລະ ບໍ່ແບ່ງ 9 ຄອບຄົວ, ຄອບຄົວນັກທຸລະກິດ ແລະ ຜູ້ປະກອບການໄດ້ປະເພດ I ມີ 25 ຄອບຄົວ, ປະເພດ II ມີ 4 ຄອບຄົວ, ຄອບຄົວພະນັກງານໄດ້ປະເພດ I ມີ 132 ຄອບຄົວ, ປະເພດ II ມີ30 ຄອບຄົວ, ໃນກອງປະຊຸມຍັງໄດ້ມີການມອບໃບຍ້ອງຍໍຂັ້ນແຂວງໃຫ້ບຸນຄົນທີ່ມີຜົນງານດີເດັ່ນໃນການແຂ່ງຂັນຮັກຊາດ ແລະ ພັດທະນາ ຈໍານວນ 9 ທ່ານ, ຂັ້ນເມືອງຈໍານວນ 9 ທ່ານ ແລະ 3 ບໍລະສັດ, ໃຫ້ກຽດມອບໂດຍແມ່ນ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ແລະ ທ່ານ ກອງສີ ວົງສີ ເຈົ້າເມືອງ ໄຊສະຖານ.

ໂດຍ: ອຸ່ນເຮືອນ ໂພທິລັກ.
Medialaos xayaboury