ໃນວັນທີ 11 ພະຈິກ 2019 ນີ້; ຢູ່ທີ່ໂຮງຮຽນ ມັດທະຍົມປາຍດົງເຫັນໄດ້ຈັດພິທີເປີດການແຂ່ງຂັນກິລາປະຈໍາປີ 2019 ຂຶ້ນຢ່າງຄຶກຄື້ນມ່ວນຊື່ນ. ໂດຍພາຍໃຕ້ການເຂົ້າຮ່ວມໃນພິທີຂອງທ່ານ ສຸລິໂຍ ສີລາວົງ ຮອງເຈົ້າເມືອງ ອາດສະພັງທອງ, ມີທ່ານ ຄໍາຮູ້ ພູມມະລາດ ຮອງຫົວໜ້າຫ້ອງການສຶກສາທິການ ແລະ ກິລາ ເມືອງ ອາດສະພັງທອງ,ພ້ອມມີຄະນະພັດທະນາການສຶກສາບ້ານດົງກິໂລແລະຄູອາຈານພາຍໃນໂຮງຮຽນຕະຫຼອດຮອດນ້ອງນັກຮຽນເຂົ້າຮ່ວມ ຢ່າງຄຶກຄື້ນມ່ວນຊື່ນ.

ຕາມການໃຫ້ລາຍງານຂອງທ່ານ ຄໍາພຸກ ບຸດຕະໂຄດ ຜູ້ອໍານວຍການໂຮງຮຽນມັດທະຍົມປາຍດົງເຫັນໄດ້ເປີດເຜີຍໃຫ້ຮູ້ວ່າ: ໂຮງຮຽນມັດທະຍົມປາຍດົງເຫັນ ເປັນໂຮງຮຽນໜຶ່ງທີ່ຂຶ້ນກັບເມືອງ ອາດສະພັງທອງ ແຂວງ ສະຫວັນນະເຂດ ໃນປະຈຸບັນມີຄູອາຈານທັງໝົດ 37 ຄົນ, ຍິງ 28 ຄົນ, ມີນັກຮຽນທັງໝົດ 356 ຄົນ, ຍິງ 211 ຄົນ, ແບ່ງອອກເປັນ 3 ຊັ້ນຮຽນຄື: ມໍ 5, ມໍ 6 ແລະ ຊັ້ນມໍ 7, ມີ 15 ຫ້ອງຮຽນແຕ່ລະຊັ້ນແບ່ງອອກເປັນ 5 ຫ້ອງຮຽນ. ສໍາຫຼັບການຈັດການແຂ່ງຂັນກິລາພາຍໃນໂຮງຮຽນປະຈໍາສົກປີ 2019 ຫາ 2020 ແມ່ນໄດ້ປະຕິບັດກັນມາເປັນປີທີ 4 ຕິດຕໍ່ກັນແລ້ວເຊິ່ງໃນປີນີ້;ມີ2ປະເພດກິລາທີ່ຈະໄດ້ທໍາການແຂ່ງຂັນຄື: ກິລາບານສົ່ງຍິງ, ຊາຍ ແລະ ກິລາບານເຕະຍິງຊາຍໃນນັ້ນ; ແບ່ງອອກເປັນ 4 ສາຍຂອງການແຂ່ງຂັນ,ທ່ານຍັງເປີດເຜີຍໃຫ້ຮູ້ຕື່ມອີກວ່າການຈັດການແຂ່ງຂັນກິລາໃນປີນີ້ແມ່ນເພື່ອການພັດທະນາກິລາພາຍໃນໂຮງຮຽນໃຫ້ມີຄວາມເຂັ້ມແຂງ, ເພື່ອຂັດເລືອກເອົາຕົວນັກກິລາ ແລະ ເພື່ອປະຕິບັດຕາມກົດໝາຍກົດລະບຽບຂອງພັກ – ລັດກໍ່ຄືກະຊວງສຶກສາທິການແລະກິລາວາງອອກໃນການຮໍ່າຮຽນແລະສິດສອນນັ້ນຕ້ອງໄປຄຽງຄູ່ກັບການສຶກສາຮໍ່າຮຽນໃນ 5 ຫຼັກມູນຂອງການສຶກສາຄື: ປັນຍາສຶກສາ, ຄຸນສົມບັດສຶກສາ, ສິນລະປະສຶກສາ, ກໍາມະສຶກສາ ແລະ ແຮງງານສຶກສາ. ດັ່ງນັ້ນໂຮງຮຽນມັດທະຍົມປາຍດົງເຫັນຈຶ່ງໄດ້ຈັດການແຂ່ງຂັນກິລາໃນຄັ້ງນີ້ຂຶ້ນ.ທັງເປັນການສ້າງບຸກຄະລາກອນທາງດ້ານກິລາໃຫ້ມີການພັດທະນາໄປສູ່ສາກົນເທື່ອລະກ້າວ.

ພ້ອມດຽວກັນນີ້;ໃນພິທີດັ່ງກ່າວລູກສິດເກົ່າທີ່ຮຽນຈົບຈາກໂຮງຮຽນມັດທະຍົມປາຍດົງເຫັນກໍ່ໄດ້ນໍາເຄື່ອງກິລາຈໍານວນ 15ຊຸດແລະບານເຕະ1ໜ່ວຍມາມອບໃຫ້ແກ່ໂຮງຮຽນມັດທະຍົມປາຍເພື່ອນໍາໃຊ້ເຂົ້າໃນການແຂ່ງຂັນຕື່ມອີກດ້ວຍ.
ທັງນີ້ກໍ່ເພື່ອເປັນການສ້າງຄວາມສາມັກຄີຂອງນ້ອງນັກຮຽນລະຫວ່າງຊັ້ນຕໍ່ຊັ້ນ, ຫ້ອງຕໍ່ຫ້ອງ ແລະ ລະຫວ່າງຄູ – ອາຈານກັບນ້ອງນັກຮຽນໃຫ້ມີຄວາມແໜ້ນແຟ້ນຂຶ້ນຕື່ມ ແລະທັງເປັນການສ້າງຂະບວນການເພື່ອຂໍ່ານັບຮັບຕອນແກ່ວັນສໍາຄັນຕ່າງໆຂອງຊາດຂອງພັກເປັນຕົ້ນກໍ່ແມ່ນຄື: ວັນທີຊາດທີ 2 ທັນວາຄົບຮອບ 44 ປີທີ່ຈະໄດ້ໝູນວຽນມາບັນຈົບຄົບຮອດອີກວາລະໜຶ່ງໃຫ້ເຕັມໄປດ້ວຍຜົນງານທີ່ຍິງໃຫ່ຍກວ່າປີທີຜ່ານມາ.

ພາບ ແລະ ຂ່າວໂດຍ
ສາຍສະໝຸດ ສິມພະລີວົງ
ນັກຂ່າວ ເມືອງ ອາດສະພັງທອງ
savannakhet  medialaos