ພິທີສັກຢາປ້ອງກັນພະຍາດສັດແຫ່ງຊາດ 11 ພະຈິກ ໄດ້ຈັດຂຶ້ນໃນວັນທີ 11 ພະຈິກ 2019 ນີ້ຢູ່ທີ່ໂຮງຮຽນປະຖົມບ້ານນາເດື່ອ ເມືອງອາດສະພອນ ແຂວງສະຫວັນນະເຂດ ໂດຍການເຂົ້າຮ່ວມເປັນປະທານຂອງ ທ່ານ ສີພັນ ສຸວັນນະສານ ຮອງເລຂາພັກເມືອງ ຮອງເຈົ້າເມືອງອາດສະພອນ, ມີທ່ານ ຄຳຈັນ ສີລາວົງ ຮອງຫົວໜ້າພະແນກກະສິກຳ ແລະ ປ່າໄມ້ແຂວງສະຫວັນນະເຂດ, ມີບັນດາທ່ານການນຳເມືອງອາດສະພອນ, ມີແຂກຖືກເຊິນຈາກ 13 ເມືອງ 1 ນະຄອນ, ພ້ອມດ້ວຍປະຊາຊົນ ແລະ ນ້ອງນ້ອຍນັກຮຽນເຂົ້າຮ່ວມ.

ໂອກາດນີ້ ທ່ານ ສີວິໄລ ສີທຳມະວັນ ກຳມະການພັກເມືອງ ຫົວໜ້າຫ້ອງການກະສິກຳ ແລະປ່າໄມ້ເມືອງອາດສະພອນ ກໍໄດ້ລາຍງານໂດຍຫຍໍ້ກ່ຽວກັບວັນສັກຢາປ້ອງກັນພະຍາດສັດແຫ່ງຊາດ 11 ພະຈິກນີ້ ເຊິ່ງເປັນວັນທີ່ມີຄວາມໝາຍສຳຄັນ ເປັນຍ່າງຍິ່ງ ເຊິ່ງເປັນການສ້າງຂະບວນການຕ້ອນຮັບວັນສຳຄັນທາງປະຫວັດສາດຂອງຊາດ ຄືວັນຊາດທີ 2 ທັນວາ ຄົບຮອບ 44 ປີ ແລະທັງເປັນການຜັນຂະຫຍາຍຄວາມຮູ້ດ້ານວິຊາການ ລົງສູ່ຮາກຖານຂັ້ນທ້ອງຖິ່ນໃຫ້ເປັນຂະບວນການຟົດຟື້ນເວົ້າລວມເວົ້າສະເພາະຄະນະນຳຂອງເມືອງອາດສະພອນ, ພະນັກງານ-ລັດຖະກອນ, ກໍາລັງປ້ອງກັນຊາດ-ປ້ອງກັນຄວາມສະຫງົບ, ກໍ່ໄດ້ເອົາໃຈໃສ່ອອກແຮງແຂ່ງຂັນ ເພື່ອຄໍານັບຮັບຕ້ອນກອງປະຊຸມໃຫຍ່ ຄັ້ງທີ VI ຂອງອົງຄະພັກເມືອງທີ່ຈະໄດ້ໄຂຂຶ້ນໃນມໍ່ໆນີ້;

ເມືອງອາດສະພອນມີທັງໝົດ 70 ບ້ານ, ມີ12.352 ຄອບຄົວ, ມີ 10.581 ຄອບຄົວ, ມີພົນລະເມືອງທັງໝົດ 64.702 ຄົນ, ປະຊາຊົນປະກອບອາຊີບປູກຝັງລ້ຽງສັດເປັນຕົ້ນຕໍ ແລະ ຄ້າຂາຍເປັນສຳຮອງ, ທົ່ວເມືອງມີເນື້ອທີ່ນາທັງໝົດ 19.500 ເຮັກຕາ, ສະມັດຕະພາບ 4,17 ໂຕນ/ເຮັກຕາ, ໃຊ້ແນວພັນປັບປຸງ 99%, ມີຊົນລະປະທານນຳໃຊ້ໄດ້ 9 ແຫ່ງ ສາມາດຕອບສະໜອງນ້ຳໃຫ້ແກ່ການຜະລິດໃນເນື້ອທີ່163,47 ເຮັກຕາ, ມີສັດລ້ຽງປະເພດ ຄວາຍ 19.486 ໂຕ, ງົວ 19.942 ໂຕ, ໝູ 13.712 ໂຕ, ແບ້ 11.720, ສັດປີກ 141.892 ໂຕ, ແຕ່ລະປີສັກຢາປ້ອງກັນພະຍາດສັດໄດ້ 65%, ຕໍ່ຝູງສັດ(ສຳລັບສັດໃຫຍ່), ທົ່ວເມືອງມີໜອງສະ 1.531 ໜອງລວມທັງໜອງທຳມະຊາດ ແລະຝາຍ, ມີວັງສະຫງວນ 12 ແຫ່ງ ປ່ອຍປາໄດ້ທັງໝົດ 2 ລ້ານກວ່າໂຕຕໍ່ປີ, ຈາກນັ້ນໃນພິທີ ກໍ່ໄດ້ມີການລັ່ນຄ້ອງ 9 ບາດ, ພ້ອມທັງຮ່ວມສັກຢາກັນພະຍາດສັດ.

ທັງນີ້ກໍ່ເພື່ອຜັນຂະຫຍາຍກົດໝາຍວ່າດ້ວຍການລ້ຽງສັດ ແລະສັດຕະວະແພດທີ່ໄດ້ກຳນົດເອົາ ວັນທີ 11 ພະຈິກຂອງທຸກໆປີເປັນວັນສັກຢາປ້ອງກັນພະຍາດສັດແຫ່ງຊາດ ແລະທັງເປັນການປູກຈິດສໍານຶກໃຫ້ພໍ່ແມ່ປະຊາຊົນຊາວກະສິກອນ, ນັກຮຽນຮູ້ປັນຍາຊົນ ໃຫ້ຮູ້ເຖິງຄວາມໝາຍຄວາມສໍາຄັນຂອງການສັກຢາປ້ອງກັນພະຍາດສັດ, ແນໃສ່ຫຼຸດຜ່ອນການຕາຍຂອງສັດລ້ຽງ ເຮັດໃຫ້ສັດມີສຸຂະພາບແຂງແຮງດີ, ມີການຈະເລີນເຕີບໂຕ ແລະ ແຜ່ພັນ.

ພາບ ແລະ ຂ່າວ: ສົມຈິດ ແກ້ວສີຖາທິລາດ
savannakhet medialaos