ດາລາຊື່​ດັງ​ຈາກ​ປະເທດ ສ. ເກົາຫຼີ, ທ່ານ ຊີ​ວອນ ຈອຍ (Siwon Choi) ໄດ້​​ຖືກແຕ່ງຕັ້ງເປັນ ທູດ​ສັນຕະວະໄມຕີຄົນ​ໃໝ່

0
93

ວັນ​ຈັນ ທີ 11 ພະຈິກ 2019: ທ່ານ ຊີ​ວອນ ຊອຍ, ດາລາ​ຈາກ ວົງ​ນັກ​ຮ້ອງ​ຊາຍ ຊູ​ເປີ​ຈູ​ເນຍ ຂອງ ສ.ເກົາຫຼີ ໄດ້​ຖືກແຕ່ງຕັ້ງໃຫ້ເປັນທູດສັນຕະວະໄມຕີ ​ປະຈຳ​ພາກ​ພື້ນ ອາຊີ​ຕາເວັນ​ອອກ ແລະ ປາ​ຊີ​ຟິກ ຂອງ​ອົງການຢູນີເຊັບ (UNICEF) ເຊິ່ງ​ການ​ເປີດຕົວ​ຄັ້ງ​ນີ້​ແມ່ນ​ຢູ່​ທີ່ ສ​ປ​ປ ລາວ ໃນ​ງານ​ສະເຫຼີມສະຫຼອງ ວັນ​ຄົບຮອບ​ຄັ້ງ​ທີ 30 ຂອງ ສົນ​ທີ​ສັນຍາ​ວ່າ​ດ້ວຍ​ສິດທິ​ຂອງ​ເດັກ.

ຕະຫຼອດ 4 ປີ​ທີ່​ຜ່ານ​ມາ ທ່ານ ຊີ​ວອນ ຈອຍ ໄດ້​​ເອົາໃຈໃສ່​ບັນຫາ​ທີ່​ກ່ຽວ​ກັບ​ເດັກ ໂດຍ​ຜ່ານ​ບົດບາດ​ຂອງ​ເພິ່ນ​ທີ່​ເປັນ ຜູ້ຕາງໜ້າ​ພິເສດ​ສຳລັບ ອົງການຢູນີເຊັບ ໃນ ສ. ເກົາຫຼີ. ໃນ​ບົດບາດ​ດັ່ງກ່າວ, ທ່ານ ຊີ​ວອນ ຊອຍ ໄດ້​ເດີນທາງ​ໄປ​ທົ່ວ​ພາກ​ພື້ນ ໂດຍ​ຄັ້ງ​ລ່າ​ສຸດ​ແມ່ນ​ທີ່ ປະເທດ​ຫວຽດນາມ ທີ່​ເພິ່ນ​ໄດ້​ໃຫ້ການ​ສະໜັບສະໜຸນ ໂຄງການ ຢຸດ​ການ​ຂົ່ມເຫັງ ເພື່ອ​ເພີ່ມ​ຄວາມ​ຮັບ​ຮູ້​ກ່ຽວ​ກັບຜົນຮ້າຍຂອງ​ການ​ຂົ່ມເຫັງ ແລະ ໃຫ້​ໄວ​ໜຸ່ມ​ມີ​ສ່ວນ​ຮ່ວມ​ໃນ​ການ​ຄິດ​ຄົ້ນ​ວິທີ​ການ​ເພື່ອ​ຢຸດ​ບັນຫາ​ດັ່ງ​ກ່າວ.

ທ່ານ​ນາງ ຄາ​ຣິນ ຮູນ​ຊັອບ ຜູ້ອຳນວຍການໃຫຍ່ ອົງການຢູນີເຊັບ ​ປະຈຳ​ພາກ​ພື້ນ​ອາຊີ​ຕາເວັນ​ອອກ ແລະ ປາ​ຊີ​ຟິກ ໄດ້ກ່າວວ່າ: “ຂ້າພະເຈົ້າ​ມີ​ຄວາມ​ຍິນດີ​ທີ່​ຈະແຈ້ງ​ວ່າ ທ່ານ ຊີ​ວອນ ຈອຍ ຖືກແຕ່ງຕັ້ງເປັນເປັນ​ທູດສັນຕະວະໄມຕີ ​ປະຈຳ​ພາກ​ພື້ນ​ຄົນ​ໃໝ່​ຂອງ​ເຮົາ. ລາວມີ​ຄວາມຫ​ມຸ່ງ​ໝັ້ນ​ອັນ​ແຮງ​ກ້າ​ຕໍ່​ເດັກນ້ອຍ, ​ຕ້ອງການ​ການ​ປົກ​ປ້ອງ​ຈາກ​ຄວາມ​ຮຸນ​ແຮງ, ການ​ກົດ​ຂີ່ ແລະ ການ​ເອົາ​ປຽບ, ລາວ​ເປັນ​ຕົວ​ແທນ​ທີ່​ເໝາະ​ສົມ​ທີ່ສຸດ ໃນ​ການໂຄສະນາ​ບັນຫາ​ທີ່​ສົ່ງ​ຜົນ​ກະທົບ​ຕໍ່​ເດັກນ້ອຍ​ໃນ​ພາກ​ພື້ນ​ນີ້. ຄວາມຫມຸ້ງຫມັ້ນຢ່າງອັນແນ່ນອນ ຂອງລາວ ຕໍ່ເດັກ ແລະ ຊື່ສຽງຂອງລາວ ຈະຊ່ວຍໃຫ້ອົງການ ຢູນີເຊັບ ສົ່ງຂໍ້ຄວາມອັນມິພະລັງ ທີ່ຈະເຂົ້າເຖິງຫົວໃຈ ແລະ ຄວາມຄິດ ຂອງຜູ້ຄົນທົ່ວໂລກ”.
ການ​ປະກາດໃນ​ມື້ນີ້​ແມ່ນ​ໄດ້​ຈັດ​ຂຶ້ນ​ທີ່ ກອງປະຊຸມ ຄົນລາວລຸ້ນປີ 2030 (Lao Generation 2030 Forum) ທີ່ ວຽງ​ຈັນ. ກອງ​ປະຊຸມ​ດັ່ງກ່າວ​ແມ່ນ​ກອງ​ປະຊຸມ​ລະດັບ​ສູງ​ກ່ຽວ​ກັບ​ສິດທິ​ເດັກ ຮ່ວມ​ກັບ​ຜູ້ຕາງໜ້າ​ຈາກ​ລັດຖະບານ, ເດັກນ້ອຍ ແລະ ໄວ​ໜຸ່ມ, ຄູ່​ຮ່ວມ​ພັດທະນາ, ສະ​ຖາ​ບັນ​ການ​ສຶກສາ ແລະ ພາກ​ເອກະ​ຊົນ ທີ່​ໄດ້​ຈັດ​ຂຶ້ນ​ເພື່ອ​ປະ​ເມີນ​ຄວາມ​ກ້າວໜ້າ​ຕໍ່​ການຈັດຕັ້ງ​ປະຕິບັດ CRC ແລະ ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ Sustainable Development Goals (SDGs) ແລະ ປຶກສາ​ຫາລື​ກ່ຽວ​ກັບ​ຄວາມ​ພະຍາຍາມ​ໃນ​ອາ​ນະ​ຄົດ​ທີ່​ ຈະເປີດໂອກາດໃຫ້ ເດັກນ້ອຍ ແລະ ໄວ​ໜຸ່ມ​ໃນ ສ​ປ​ປ ລາວ ໄດ້ນໍາໃຊ້ຄວາມສາມາດອັນບົ່ມຊ້ອນທີ່ບໍ່ມີຂີດຈໍາກັດຢ່າງເຕັມສ່ວນ.

ໂດຍ​ເປັນ​ສ່ວນ​ໜຶ່ງ​ຂອງ​ກອງ​ປະຊຸມ ແລະ ການຮັບ​ບົດບາດ​ທຳອິດ​ຂອງ​ລາວໃນ​ຖານະ ທູດ​ປະຈຳ​ພາກ​ພື້ນ, ທ່ານ ຊີ​ວອນ ຈອຍ ຈະ​ໄດ້​ເຂົ້າ​ຮ່ວມ​ໃນ​ການສົນທະນາ ປຶກສາ​ຫາລື ຖາມຕອບ ​ຂອງ​ຄະນະ​ໄວ​ໜຸ່ມ (Youth Talk Panel Discussion) ຮ່ວມ​ກັບ​ກຸ່ມ​ໄວ​ໜຸ່ມ​ທີ່​ໄດ້​ເຮັດ​ສິ່ງ​ມະຫັດສະຈັນ​ຫຼາຍ​ຢ່າງ​ເພື່ອ​ຄວາມ​ກ້າວໜ້າ​ຂອງ​ສິດທິ​ເດັກ. ລາວ​ຈະ​ໄດ້​ຍົກ​ໃຫ້​ເຫັນ​ເຖິງ​ຄວາມ​ສຳຄັນ​ຂອງ​ການ​ລົງທຶນ​ຢ່າງ​ຕໍ່​ເນື່ອງ​ເພື່ອ ເປີດໂອກາດໃຫ້ເຂົາເຈົ້າ ໄດ້ພັດທະນາ​ໂຕເອງ ໃນປັດຈຸບັນ ແລະ ປີ 2030, ເມື່ອ​ເປົ້າ​ໝາຍການ​ພັດທະນາ​ແບບ​ຍືນ​ຍົງ​ຮອດ​ກຳນົດທີ່ຈະຕ້ອງບັນລຸ. ໃນ​ຂະນະ​ທີ່​ເພິ່ນ​ເຮັດວຽກຢູ່​ລາວ ເພິ່ນ​ຈະ​ໄດ້​ລົງ​ຢ້ຽມຢາມ​ໂຮງຮຽນ ແລະ ນັກຈັດລາຍການ​ວິທະຍຸ​ທີ່​ນຳ​ໂດຍ​ໄວ​ໜຸ່ມອີກດ້ວຍ​.

ທ່ານ ຊີ​ວອນ ຊອຍ, ທູດ​ປະຈຳ​ພາກ​ພື້ນ​ຂອງ​ອົງການຢູນີເຊັບໄດ້ກ່າວວ່າ: “ຂ້າພະເຈົ້າ​ມີ​ອາຍຸ​ພຽງ 2 ປີ ເມື່ອ​ສົນທິສັນຍາ​ໄດ້​ຖືກຮັບ​ການ​ຮັບຮອງ, ຂ້າພະເຈົ້າ​ມີ​ຄວາມ​ພູມໃຈ​ທີ່​ໄດ້​ຮັບ​ການ​ແຕ່ງຕັ້ງ​ເປັນ​ໜຶ່ງ​ໃນ​ທູດ​ປະຈຳ​ພາກ​ພື້ນ​ຄົນ​ໃໝ່ ຂອງ​ອົງການຢູນີເຊັບ ໃນ​ວາລະ​ຄົບຮອບ 30 ປີ. ຂ້າພະເຈົ້າ​ໂຊກ​ດີ​ທີ່​ໄດ້​ເຫັນ​ບົດບາດ​ຂອງ​ອົງການ ຢູນີເຊັບ ແລະ ຜົນ​ກະທົບ​ທີ່​ໄດ້​ມີ​ຕໍ່​ຊີວິດ​ຂອງ​ເດັກນ້ອຍ ແລະ ຂ້າພະເຈົ້າ​ຫວັງ​ຢ່າງ​ຍິ່ງ​ທີ່​ຈະ​ໄດ້​ສືບຕໍ່​ເຮັດ​ວຽກ​ກັບ​ອົງການຢູນີເຊັບ”.

ໂດຍ​ເນັ້ນ​ໃສ່ ການ​ສົ່ງເສີມ ແລະ ປົກ​ປ້ອງ​ສິດທິ​ເດັກ​ໃນ​ລະບົບ​ອອນ​ລາຍ ໃນ​ພາກ​ພື້ນ​ເປັນ​ພິເສດ, ທ່ານ ຊີ​ວອນ ຊອຍ ໄດ້​ຮ່ວມ​ກັບ ທ່ານ​ນາງ ແອັກ​ເນສ ແຈນ (Ms. Agnes Chan) ທີ່ເປັນ​ສ່ວນ​ໜຶ່ງ​ຂອງ ທີ​ມ​ທູດ​ປະຈຳ​ພາກ​ພື້ນ​ອາຊີ​ຕາເວັນ​ອອກ ແລະ ປາ​ຊີ​ຟິກ. ທູດ​ປະຈຳ​ພາກ​ພື້ນ​ແມ່ນ​ບັນດາ​ບຸກຄົນ​ທີ່​ໂດດ​ເດັ່ນ​ຈາກ​ຂະແໜງ ສິນລະປະ, ວິທະຍາສາດ, ວັນນະກຳ, ການ​ບັນເທີງ, ກິລາ ແລະ ອື່ນໆ​ຈາກ​ພາກ​ສາທາລະນະ ທີ່​ໄດ້​ສະແດງ​ຄວາມ​ຕ້ອງການ​ທີ່​ຈະ​ປະກອບສ່ວນ​ເຂົ້າ​ໃນ​ການ​ເພີ່ມ​ຄວາມ​ຮັບ​ຮູ້​ກ່ຽວ​ກັບ​ເປົ້າ​ໝາຍ, ວັດຖຸ​ປະສົງ ແລະ ບູ​ລິ​ມະ​ສິດ​ຂອງ ອົງການ UNICEF ເພື່ອ​ສື່ສານ​ຂໍ້ຄວາມ​ກ່ຽວ​ກັບ​ກິດຈະກຳ ແລະ ຂະຫຍາຍ​ຂອບ​ເຂດ​ການ​ເຂົ້າ​ເຖິງ​ສູ່​ສາ​ທາ​ລະ​ນະ.

medialaos