ຕອນເຊົ້າຂອງວັນທີ 08 ພະຈິກ 2019 ຢູ່ທີ່ກ້ອງຝາຍນ້ຳແກນ 1 ບ້ານແທ່ນຄຳ ເມືອງຫົງສາ ໂດຍເປັນກຽດເຂົ້າຮ່ວມຂອງທ່ານ ນາງ ດາວວິນ ລາດຊະກິດ ຮອງເຈົ້າເມືອງຫົງສາ, ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ກົມກອງທະຫານ-ຕຳຫຼວດ, ບໍລິສັດ, ລັດວິສາຫະກິດ ແລະ ອຳນາດການປົກຄອງບ້ານ ຕະຫຼອດຮອດປະຊາຊົນພາຍໃນບ້ານດັ່ງກ່າວເຂົ້າຮ່ວມ.

ເມືອງຫົງສາ ເປັນເມືອງໜຶ່ງທີ່ປະຊາຊົນສ່ວນຫຼາຍຍັງຢຶດຖືອາຊີບປູກຝັງ ແລະ ລ້ຽງສັດເປັນຫຼັກ. ເຊິ່ງຍາມໃດພັກ-ລັດ ກໍ່ໄດ້ເອົາໃຈໃສ່ລົງທຶນເຂົ້າໃນການກໍ່ສ້າງຊົນລະປະທານຢ່າງມະຫາສານ ໂດຍສະເພາະຢູ່ເມືອງຫົງສາ ມີຊົນລະປະທານທັງໝົດ 115 ແຫ່ງ. ໃນນີ້, ຖາວອນ 49 ແຫ່ງ ແລະ ປະຖົມປະຖານ 65 ແຫ່ງ. ສາມາດຕອບສະໜອງນໍ້າເຂົ້າເນື້ອທີ່ນາໃນລະດູຝົນ 1.476,17 ເຮັກຕາ ແລະ ລະດູແລ້ງຈະໄດ້ 749 ເຮັກຕາ. ສົກປີ 2019-2020 ເມືອງໄດ້ວາງແຜນການສູ້ຊົນຜະລິດພືດລະດູແລ້ງໃຫ້ໄດ້ທັງໝົດ 1.030 ເຮັກຕາ. ໃນນີ້, ນາແຊງໃຫ້ໄດ້ 25 ເຮັກຕາ ( ໂດຍຊຸມປີຜ່ານມາແມ່ນບໍ່ບັນລຸຕາມແຜນ ເນື່ອງຈາກນ້ຳບົກແຫ້ງ).

ນອກຈາກນັ້ນ, ພາກລັດ ຍັງຊຸກຍູ້ສົ່ງເສີມຢ່າງຮອບດ້ານໃນວຽກງານການລ້ຽງສັດ ເປັນຕົ້ນແມ່ນ ວຽກງານປ້ອງກັນພະຍາດສັດ ເຊິ່ງໄດ້ຂະຫຍາຍຕາໜ່າງສັດຕະວະແພດຢ່າງກວ້າງຂວາງ ແລະ ຄວບຄຸມທຸກໆ ບ້ານ ໂດຍວິທີການຝຶກອົບຮົມໃຫ້ເປັນສັດຕະວະແພດບ້ານ, ສະໜອງອຸປະກອນເຄື່ອງມືຕ່າງໆ ແລະ ຢາ ພ້ອມທັງສ້າງກອງທຶນສັດຕະວະແພດຢູ່ຫຼາຍບ້ານ. ເຊິ່ງໃນປີນີ້, ມີສັດລ້ຽງເຈັບ ແລະ ຕາຍທັງໝົດ 2.651 ໂຕ. ໃນນີ້, ມີງົວ 12 ໂຕ, ຄວາຍ 16 ໂຕ, ໝູ 115 ໂຕ, ແບ້ 8 ໂຕ ແລະ ສັດປີອີກ ຈຳນວນ 2.500 ໂຕ. ໃນທົ່ວເມືອງມີສັດລ້ຽງທັງໝົດ 283.066 ໂຕ. ໃນນີ້, ມີຊ້າງ 18 ໂຕ, ງົວ 11.559 ໂຕ, ຄວາຍ 2.583 ໂຕ, ແບ້ 3.073 ໂຕ, ໝູ 12.360 ໂຕ ແລະ ສັດປີກ 253.433 ໂຕ. ໄລຍະຜ່ານມາໄດ້ຮັບການສັກຢາວັກຊີນແລ້ວ 16.788 ໂຕ ເທົ່າກັບ 7% ຂອງສັດທັງໝົດ ແລະ ສືບຕໍ່ລົງຊຸກຍູ້ຕິດຕາມການສັກຢາກັນພະຍາດສັດທີ່ຍັງເຫຼືອໃຫ້ສຳເລັດ ແລະ ພ້ອມທັງຊຸກຍູ້ສົ່ງເສີມຂະບວນການຜະລິດລະດູແລ້ງໃຫ້ໄດ້ຕາມແຜນການທີ່ວາງໄວ້. ຈາກນັ້ນ, ບັນດາທ່ານທີ່ໄດ້ເຂົ້າຮ່ວມພິທີດັ່ງກ່າວ ກໍ່ໄດ້ພ້ອມກັນລົງສັກຢາກັນພະຍາດໃຫ້ກັບສັດລ້ຽງຂອງປະຊາຊົນຢູ່ພາຍໃນບ້ານດັ່ງກ່າວນຳອີກ.

ພາບ-ຂ່າວ: ກິດຕິສັກ ບົວໄລ.
Medialaos xayabiury