ທ່ານ ນາງ ວິໄລວັນ ຈັນທະວົງ ປະທານກຸ່ມບໍລິສັດທ່ອງທ່ຽວແຂວງສະຫວັນນະເຂດໄດ້ໃຫ້ສຳພາດຕໍ່ນັກຂ່າວຂອງພວກເຮົາກ່ຽວກັບງານເທດສະການສະຫວັນສຸກສັນຫັນສາວ່າ: ຈຸດປະສົງຂອງການຈັດງານກໍ່ເພື່ອສົ່ງເສີມການທ່່ອງທ່ຽວເພື່ອໂປໂໝດຕົວເມືອງເກົ່າຂອງນະຄອນໄກສອນພົມວິຫານ ເພື່່ອໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດໄດ້ຮັບຮູ້, ເພາະຜ່ານມາແມ່ນຍັງບໍ່ເຄີຍມີການຈັດງານແບບນີ້ມາກ່ອນ ສະນັ້ນທາງກຸ່ມທຸລະກິດທ່ອງທ່ຽວໄດ້ເຫັນຄວາມສຳຄັນ ແລະ ໄດ້ເຫັນຄວາມງາມຂອງຕົວເມືອງເກົ່າຈຶ່ງ ໄດ້ຮ່ວມມືກັນກັບພະແນກ ຖວທແຂວງ, ນະຄອນໄກສອນພົມວິຫານ ແລະ ພາກສ່ວນທີ່ກ່ຽວຂ້ອງໄດ້ຈັດງານເທສະການສຸກສະຫວັນຫັນສາທີ່ຈະມີຂຶ້ນໃນວັນທີ 22-24 ພະຈິກ 2019ນີ້

ເຊິ່ງເປັນງານທີ່ຈັດເປັນຄັ້ງທໍາອິດ ແລະ ເປັນສິ່ງທີ່ທ້າທາຍເພາະຢາກໃຫ້ຕົວເມືອງຂອງແຂວງສະຫວັນນະເຂດເວົ້າລວມເວົ້າສະເພາະກໍ່ແມ່ນນະຄອນໄກສອນພົມວິຫານ,ໄດ້ເປັນທີ່ຮັບຮູ້ຂອງຜູ້ຄົນຫຼາຍຂຶ້ນເຊິ່ງໃນງານແມ່ນຈະໄດ້ມີກິດຈະກຳຫຼາຍຢ່າງ, ທີ່ເປັນການຢ້ອນຍຸກ ແລະ ກິດຈະກໍາທີ່ຈະຈັດເແມ່ນເວທີໃຫຍ່ຕໍ່ໜ້າໂບດເດີ່ນຕະຫຼາດສະຫວັນກາງຄືນ, ພ້ອມທັງມີການສະແດງສິລະປະພື້ນບ້ານ, ມີດົນຕີທັງສາກົນ ແລະ ພາຍໃນປະເທດສົມທົບກັນ, ໃນງານຈະມີການວາງສະແດງຮູບພາບ, ປະກວດເກົ້າຜົມງາມ ແລະ ການແຕ້ມຮູບເໝືອນ, ການວາງສະແດງຂາຍສິນຄ້າພຶ້ນເມືອງຂອງພາຍໃນແຂວງ ແລະ ຕ່າງປະເທດ, ມີໂຊນຂາຍເຄື່ອງ, ໂຊນອາຫານ ແລະ ໂຊນຂາຍເຄື່ອງທົ່ວໄປ ເຊິ່ງໃນການຈັດໂຊນ ແມ່ນມີຢູ່100 ບຸດ ຈາກນັ້ນຍັງໄດ້ເຊີນຊວນຜູ້ຄົນທັງພາຍໃນ ແລະ ຕ່າງປະເທດ,ຢາກໃຫ້ມາສຳພັດເບິ່ງ,ມາທ່ຽວຊົມເຂດຕົວເມືອງເກົ່ານະຄອນໄກສອນພົມວິຫານແຂວງສະຫວັນນະເຂດຂອງພວກເຮົາໃນມື້ງານວັນທີ 22-24ພະຈິກ2019ນີ້.

ໂອກາດນີ້ ທ່ານ ນາງ ວິໄລວັນ ຈັນທະວົງ ກໍ່ຍັງໄດ້ຮຽກຮ້ອງມາຍັງປະຊາຊົນໃນເຂດຕົວເມືອງເກົ່າຈົ່ງຮັກສາອານາໄມບໍລິເວນໜ້າເຮືອນຂອງຕົນໃຫ້ສະອາດງາມຕາ, ເພື່ອໃຫ້ນັກ ທ່ອງທ່ຽວທີ່ເຂົ້າມາທ່ຽວຕົວເມືອງເກົ່າໄດ້ເຫັນຄວາມສວຍງາມ.

ຂ່າວ: ວິລັດດາ ດວງຈັນທາ
savannakhet medialaos