ໃນຕອນເຊົ້າວັນທີ 13 ພະຈິກ 2019 ຢູ່ທີ່ຫ້ອງປະຊຸມພະແນກ ຖະແຫຼງຂ່າວ ວັດທະນະທຳ ແລະ ທ່ອງທ່ຽວ ແຂວງສະຫວັນນະເຂດ ທາງກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ຈັດຝຶກອົບຮົມວຽກງານຫ້ອງການ ໃນຫົວຂໍ້ ຖານຂໍ້ມູນ ເອກະສານທາງການ ໃຫ້ກັບບັນດາພະນັກງານຂອງພະແນກ ຖວທ ທີ່ມາຈາກ 9 ແຂວງພາກກາງ ແລະ ພາກໃຕ້ ໂດຍມີ ນະຄອນຫລວງວຽງຈັນ, ແຂວງໄຊສົມບູນ, ບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ, ເຊກອງ, ຈຳປາສັກ ແລະ ແຂວງອັດຕະປື ໃຫ້ກຽດ ເປັນປະທານຂອງທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງ ຖວທ ມີບັນດາ ຫົວໜ້າພະແນກ, ຮອງຫົວໜ້າພະແນກ, ພະນັກງານຫ້ອງການ ຈາກ ພະແນກ ຖວທ ທັງ 9 ແຂວງພາກກາງ ແລະ ພາກໃຕ້ເຂົ້າຮ່ວມ.

ທ່ານ ບົວເງິນ ຊາພູວົງ ໄດ້ກ່າວວ່າ: ຊຸດຝຶກອົບຮົມຄັ້ງນີ້ມີຄວາມໝາຍຄວາມສຳຄັນຫຼາຍເພາະຖານຂໍ້ມູນທາງເອກະສານທາງການນັ້ນເປັນວຽກງານທີ່ທາງກະຊວງ, ກົມກອງ, ຂະແໜງການ, ໜ່ວຍງານຕ່າງໆຕ້ອງໄດ້ຫັນມານຳໃຊ້ເຂົ້າໃນວຽກງານນັບມື້ນັບຫຼາຍຂຶ້ນ ແລະ ເປັນວຽກທີ່ ຈຳເປັນຕ້ອງໄດ້ເຮັດ, ຕ້ອງມີການພັດທະນາໄປຕາມສັງຄົມທີ່ທັນສະໄໝກັບຍຸກດີຈີຕ໋ອນ ໂດຍສະເພາະແມ່ນຫ້ອງການທີ່ປະຕິບັດໜ້າທີ່ເປັນເສນາທິການ, ເຮັດໜ້າທີ່ປະສານງານ, ບໍລິຫານ-ບໍລິການ ສ້າງສິ່ງອຳນວຍຄວາມສະດວກ, ເຮັດໜ້າທີ່ປະສານງານອຳນວຍຄວາມສະດວກລະຫວ່າງຂັ້ນລຸ່ມກັບຂັ້ນເທິງ, ຂັ້ນເທິງກັບຂັ້ນລຸ່ມ ສາມາດປະສານສົມທົບໃຫ້ວຽກງານມີຄວາມຄ່ອງຕົວ ແລະ ໄດ້ຮັບຜົນສຳເລັດ ທັງເປັນການຮັບປະກັນໃນການຕົກເຮ່ຍເສຍຫາຍຂອງເອກະສານອີກດ້ວຍ ພ້ອມນັ້ນບັນດາກົມກອງຕ່າງໆກໍ່ລ້ວນແຕ່ມີຄວາມຈຳເປັນ ຕ້ອງຫັນເຂົ້າສູ່ວຽກງານທີ່ທັນສະໄໝນໍາໃຊ້ລະບົບເຕັກໂນໂລຊີ ເຂົ້າໃນການໃຊ້ງານ.
ໃນການຝຶກອົບຮົມຄັ້ງນີ້ຜູ້ເຂົ້າຮ່ວມແມ່ນຈະໄດ້ຮຽນຮູ້ ການເຂົ້າສູ້ຖານຂໍ້ມູນຕົວຈິງ ແລະ ການຕິດຕັ້ງລະບົບແຈ້ງເຕືອນອັດຕະໂນມັດ, ການເພີ່ມຜູ້ແຈ້ງເຕືອນສໍາລັບຖານຂໍ້ມູນ,ການຮັບ-ສົ່ງເອກະສານຜ່ານຖານຂໍ້ມູນ, ການນໍາໃຊ້ລະບົບຂໍ້ມູນເອເລັກໂຕນິກເຂົ້າໃນວຽກງານຄົ້ນຄວ້າສັງລວມ ແລະ ການສື່ສານທາງ WhatesApp ຈາກສໍາມະນາກອນຂອງກະຊວງ ຖວທ ແລະ ຊຸດຝຶກອົບຮົມວຽກງານຫ້ອງການໃນ ຫົວຂໍ້ ຖານຂໍ້ມູນເອກະສານທາງການ ຈະດຳເນີນເປັນເວລາ 2 ວັນຈຶ່ງຈະສຳເລັດ.

savannakhet medialaos