ທ່ານ ສັນຕິພາບ ພົມວິຫານ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ ໃຫ້ກຽດເຂົ້າຮ່ວມເປັນປະທານໃນກອງປະຊຸມເຜີຍແຜ່ນິຕິກຳກ່ຽວກັບວຽກງານກໍ່ສ້າງຮາກຖານການເມືອງ, ພັດທະນາຊົນນະບົດແກ້ໄຂຄວາມທຸກຍາກ ແລະ ວຽກງານ 3 ສ້າງຂອງແຂວງ ຊຶ່ງໄດ້ຈັດຂຶ້ນໃນວັນທີ 11 ພະ-ຈິກຜ່ານມາ ທີ່ຫ້ອງວ່າການປົກຄອງແຂວງ ໂດຍມີຮອງເລຂາພັກແຂວງ, ຄະນະປະຈຳພັກແຂວງ, ກຳມະການພັກແຂວງ, ເລຂາພັກນະຄອນເມືອງ, ເຈົ້າເມືອງ, ຄະນະພັກຮາກຖານ ແລະ ພາກສ່ວນກ່ຽວຂ້ອງເຂົ້າຮ່ວມ.

ໂອກາດນີ້, ໃນກອງປະຊຸມ ກໍໄດ້ຜ່ານຫຼາຍເອກະສານສຳຄັນຄື: ມະຕິຂອງຄະນະປະຈຳພັກແຂວງ ສະບັບເລກທີ 1304/ຄປພຂ, ລົງວັນທີ 11 ກັນຍາ 2019 ວ່າດ້ວຍການແຕ່ງຕັ້ງຄະນະຮັບຜິດຊອບຊີ້ນຳໆພາການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ, ພັດທະນາຊົນນະບົດແກ້ໄຂຄວາມທຸກຍາກ ແລະ ວຽກງານ 3 ສ້າງ, ຜ່ານແຜນດຳເນີນງານຂອງຄະນະຮັບຜິດຊອບຊີ້ນຳໆພາການຈັດຕັ້ງປະຕິບັດວຽກງານດັ່ງກ່າວ, ເຜີຍແຜ່ແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ, ສະບັບເລກທີ 1862/ຫສນຍ, ລົງວັນທີ 18 ຕຸລາ 2019 ເລື່ອງການສືບຕໍ່ຊີ້ນຳຂະບວນການແຂ່ງຂັນຮັກຊາດ, ສ້າງບ້ານພັດທະນາ ແລະ ຜັນຂະຫຍາຍວຽກງານ 3 ສ້າງເຂົ້າສູ່ລວງເລິກໃນຂອບເຂດທົ່ວປະເທດ.

ພ້ອມນີ້, ທ່່ານເຈົ້າແຂວງ ຍັງໄດ້ຊີ້ນຳ ແລະ ໃຫ້ກຽດເຜີຍແຜ່ເຊື່ອມຊຶມຄຳສັ່ງຂອງທ່ານເຈົ້າແຂວງສະຫວັນນະເຂດ ສະບັບເລກທີ 1710/ຈຂ.ສຂ, ລົງວັນທີ 8 ຕຸລາ 2019 ວ່າດ້ວຍການເພີ່ມທະວີໃນການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ, ວຽກງານພັດທະ ນາຊົນນະບົດແກ້ໄຂຄວາມທຸກຍາກ ແລະ ວຽກງານ 3 ສ້າງຂອງແຂວງ ຈາກນັ້ນ, ບັນດາທ່ານທີ່ເຂົ້າຮ່ວມໃນພິທີຍັງໄດ້ມີການປະກອບຄຳຄິດຄຳເຫັນຕໍ່ກັບວຽກງານດັ່ງກ່າວຕື່ມອີກ ແນໃສ່ເພື່ອເຮັດໃຫ້ການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດແກ້ໄຂຄວາມທຸກຍາກ ແລະ ວຽກງານ 3 ສ້າງຂອງແຂວງ ມີປະສິດທິພາບ ແລະປະສິດທິຜົນດີຍິ່ງໆຂຶ້ນ.

Medialaos Massmedia