ກອງປະຊຸມໃຫຍ່ຜູ້ແທນອົງຄະນະພັກນະຄອນປາກເຊຄັ້ງທີ 7 ໄຂຂຶ້ນຢ່າງເປັນທາງການ ໃນວັນທີ 14 ພະຈິກ 2019 ນີ້ ຢູ່ທີ່ສະໂມສອນຂອງນະຄອນດັ່ງກ່າວ. ໂດຍການໃຫ້ກຽດເຂົ້າຮ່ວມຂອງສະຫາຍ ປອ ບຸນຖອງ ດີວິໄຊ ກຳມະການສູນກາງພັກ ເລຂາພັກແຂວງ ເຈົ້າແຂວງໆຈຳປາສັກ, ສະຫາຍ ນິພອນ ວຽງປະເສີດ ຮອງເລຂາພັກແຂວງ,ຫົວໜ້າຄະນະຈັດຕັ້ງແຂວງ, ບັນດາຄະນະບໍລິຫານງານພັກແຂວງ, ສະຫາຍເລຂາພັກນະຄອນ, ເຈົ້ານະຄອນ, ບັນດາຄະນະປະຈຳພັກນະຄອນ, ກຳມະການພັກນະຄອນ, ຄະນະພັກເມືອງ 9 ເມືອງ, ພະແນກການກົມກອງອ້ອມຂ້າງແຂວງ,ພະນັກງານປະຕິວັດອາວຸໂສ,ບໍານານ ເຂົ້າຮ່ວມທັງໝົດ 218 ສະຫາຍ.ໃນນັ້ນຜູ້ແທນສົມບູນຕົວແທນຮາກຖານພັກທົ່ວນະຄອນປາກເຊ 157 ສະຫາຍ.

ໃນວາລະດຳເນີນກອງປະຊຸມ ສະຫາຍ ສຸລິວັນ ສະຫວັດທະສິນ ຄະນະປະຈໍາພັກແຂວງ ເລຂາພັກນະຄອນ ເຈົ້ານະຄອນປາກເຊ ໄດ້ກ່າວໄຂກອງປະຊຸມຢ່າງເປັນທາງການໂດຍກ່າວວ່າ: ການດຳເນີນກອງປະຊຸມໃຫຍ່ ຄັ້ງທີ 7 ຂອງອົງຄະນະພັກນະຄອນປາກເຊ ແມ່ນໄດ້ຈັດຕັ້ງປະຕິບັດກົດລະບຽບຂອງພັກກໍຄືຫຼັກການ ແລະ ທິດນຳໃນການກໍ່ສ້າງພັກໃຫ້ມີຄວາມເຕີບໃຫຍ່ເຂັ້ມແຂງກ້າວຂຶ້ນຢ່າງບໍ່ຢຸດຢັ້ງ. ຜູ້ແທນກອງປະຊຸມໃຫຍ່ ຈະໄດ້ພ້ອມກັນສະຫຼຸບຕີລາຄາຜົນງານການນຳພາຂອງອົງຄະນະພັກໃນສະໃໝທີ 6​ ທີ່ຜ່ານມາຄົ້ນຄ້ວາຮັບຮອງເອົາເອກະສານສຳຄັນທີ່ເປັນຍຸດທະສາດຂອງຄະນະບໍລິຫານງານພັກນະຄອນສະໄໝທີ 7 , ຄັດເລືອກເອົາຄະນະບໍລິຫານງານພັກເມືອງຊຸດໃໝ່ ເພື່ອເປັນແກນນຳຂອງອົງຄະນະພັກທີ່ຈະນຳພາຜັນຂະຫຍາຍມະຕິຂອງພັກ ແລະ ປະຕິບັດແຜນພັດທະນາເສດຖະກິດ-ສັງຄົມຕະຫຼອດສະໄໝທີ 7 (ແຕ່ປີ 2020-2024) ໃຫ້ປະກົດຜົນເປັນຈິງ, ນໍາພານະຄອນປາກເຊກ້າວຂຶ້ນເປັນເມືອງມີຄວາມສະຫງົບ, ສະອາດສວຍງາມ, ມີສິ່ງແວດລ້ວມທີ່ດີເປັນເມືອງສີຂຽວ,​ເປັນໃຈກາງສູນລວມໃຫ້ແກ່ການພັດທະນາເສດຖະກິດ,​ວັດທະນະທຳ,​ສັງຄົມຂອງບັນດາແຂວງພາກໄຕ້.

ຈາກນີ້ ສະຫາຍ ສຸລິວັນ ສະຫວັດທະສິນ ເລຂາພັກນະຄອນ ເຈົ້ານະຄອນປາກເຊ ຍັງໄດ້ຜ່ານບົດລາຍງານການເມືອງທັງສອງພາກຍົກໃຫ້ເຫັນຜົນງານຜ່ານມາຂອງອົງຄະນະພັກນະຄອນປາກເຊໃນໄລຍະ 5 ປີທີ່ຜ່ານມາ 2015-2019 ໂດຍຍົກໃຫ້ເຫັນທົ່ວເມືອງມີຄວາມເປັນສະຖຽນລະພາບທາງດ້ານການເມືອງ, ຮັບປະກັນຄວາມສະຫງົບໂດຍພື້ນຖານ,ດ້ານເສດຖະກິດ-ສັງຄົມ ສືບຕໍ່ຂະຫຍາຍຕົວຕໍ່ເນື່ອງ ໂດຍສະເລ່ຍໃນລະດັບ 10,23% ລວມຍອດຜະລິດຕະພັນ 5 ປີ ປະຕິບັດໄດ້ 1 ໝື່ນ 1 ພັນ 800 ກ່ວາຕື້ກີບ ສະເລ່ຍໃສ່ພົນລະເມືອງ 29 ລ້ານກ່ວາກີບ ຫຼື 3000 ກ່ວາໂດລາຕໍ່ຄົນຕໍ່ປີທຽບໄສ່ແຜນການເພີ່ມຂື້ນ 25 ກ່ວາສ່ວນຮອຍ ການລະດົມທຶນເພື່ອພັດທະນາຂອງເມືອງ ປະຕິບັດໄດ້ 5 ພັນ 300 ຕື້ກວ່າກີບ ເຊິ່ງລື່ນແຜນການທີ່ວາງໄວ້ 62 ກ່ວາສ່ວນຮອຍ. ເຮັດໃຫ້ໂຄງປະກອບເສດຖະກິດຂອງເມືອງຫັນປ່ຽນໄປຕາມທິດທີ່ຕັ້ງໜ້າຕາມທ່າແຮງບົ່ມຊ້ອນຂອງທ້ອງຖິ່ນ.

ໃນກອງປະຊຸມຄັ້ງນີ້ ສະຫາຍ ອ່ອນແກວ ເພັດພູມີ ຮອງເຈົ້ານະຄອນປາກເຊ ຍັງໄດ້ຜ່ານບົດສະຫຼຸບແຜນພັດທະນະເສດຖະກິດ-ສັງຄົມ 5 ຜ່ານມາ ແລະ ທິດທາງແຜນການ ພັດທະນາເສດຖະກິດ-ສັງຄົມ 5 ປີຕໍ່ໜ້າ 2020-2024 ການປະກອບຄຳຄິດຄຳເຫັນຂອງພາກສ່ວນຕ່າງໆເຊັ່ນ: ການນຳພາຂອງພັກຕໍ່ການພັດທະນາພື້ນຖານໂຄງລ່າງຕິດພັນກັບການຄຸມຄອງສິ່ງແວດລອມ ແລະ ສາງເປັນຕົວເມືອງສີຂຽວ ,ການນຳພາຂອງພັກຕໍ່ການຈັດເກັບລາຍຮັບເຂົ້າງົບປະມານ,ການກໍ່ສາງຮາກຖານ ຕິດພັນກັບວຽກງານສາມສາງ,ຈາກນີ້ແມ່ນການປະກອບຄຳເຫັນຂອງຮາກຖານພັກດີເດັ່ນໃນການຊີ້ນໍານຳພາ,ຫົວໜ່ວຍທຸລະກິດການຜະລິດ,ບໍລິການ,ປູກຝັງລ້ຽງສັດ ຄອບຄົວຕົວແບບດ້ານອື່ນໆ ຕະຫຼອດຮອດອົງການຈັດຕັ້ງຕ່າງໆເຮັດໃຫ້ບັນຍາກາດການດໍາເນີນກອງປະຊຸມໃຫຍ່ຜູ້ແທນອົງຄະນະພັກນະຄອນປາກເຊຄັ້ງທີ 7 ນີ້ ມີເນື້ອໃນອຸດົມສົມບູນ,ກ້ວາງຂວາງເລິກເຊິ່ງ. ກອງປະຊຸມໃຫຍ່ຄັ້ງນີ້ ຈະໄດ້ດຳເນີນໄປເປັນເວລາ 2 ວັນຈິ່ງຈະໄດ້ອັດລົງ.

medialaos
ສື່ມວນຊົນແຂວງຈຳປາສັກ
ຂຽນ: ນ. ປະພິດ ສີສົມບູນ