4 ຫ້ອງການທີ່ຂຶ້ນກັບເມືອງ ອາດສະພັງທອງ ລົງເຄື່ອນໄຫວວຽກງານຢູ່ກຸ່ມບ້ານສາມັກຄີໄຊ

0
204

ໃນວັນທີ 12 ພະຈິກ 2019 ນີ້; 4 ຫ້ອງການທີ່ຂຶ້ນກັບເມືອງ ອາດສະພັງທອງຄື: ຫ້ອງການແນວລາວສ້າງຊາດ, ສາທາລະນະສຸກ, ສຶກສາທິການ ແລະ ກິລາ ແລະ ຫ້ອງການສະຫະພັນແມ່ຍິງເມືອງ. ເຊິ່ງນໍາໂດຍທ່ານ ສີສະຫວັນ ແກ້ວຄໍາວິໄລທອງ ຮອງປະທານແນວລາວສ້າງຊາດເມືອງພ້ອມດ້ວຍພະນັກງານວິຊາການພາຍໃນ 4ຫ້ອງການ ແລະ ພະນັກງານວິຊາການທີ່ກ່ຽວຂ້ອງຂອງຫ້ອງສາທາລະນະສຸກ, ສຶກສາທິການ ແລະ ກິລາ ແລະ ຫ້ອງການສະຫະພັນແມ່ຍິງເມືອງໄດ້ລົງເຄື່ອນໄຫວວຽກງານຢູ່ກຸ່ມບ້ານສາມັກຄີໄຊ. ໂດຍພາຍໃຕ້ການຕ້ອນຮັບຢ່າງອົບອຸ່ນຂອງເລຂາພັກບ້ານ,ນາຍບ້ານ ແລະ ປະຊາຊົນພາຍໃນກຸ່ມບ້ານກໍ່ໄດ້ຕ້ອນຮັບເປັນຈໍານວນຫຼວງຫຼາຍ.

ໃນພິທີທ່ານ ສີສະຫວັນ ແກ້ວຄໍາວິໄລທອງ ຮອງປະທານແນວລາວສ້າງຊາດເມືອງ ກໍ່ໄດ້ໃຫ້ກຽດຂຶ້ນຜ່ານຂໍ້ຕົກລົງຂອງສູນກາງແນວລາວສ້າງຊາດສະບັບເລກທີ 127/ສນຊ ວ່າດ້ວຍມາດຕະຖານຄອບຄົວ ແລະ ບ້ານສາມັກຄີປອງດອງເຊິ່ງມີຈຸດປະສົງແມ່ນເພື່ອຜັນຂະຫຍາຍນະໂຍບາຍແນວໂຮມຂອງພັກ, ເສີມຂະຫຍາຍມູນເຊື້ອຄວາມສາມັກຄີປອງດອງປະຊາຊົນລາວບັນດາເຜົ່າທີ່ມີແຕ່ດົນນານເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ເພີ່ມທະວີຄວາມສາມັກຄີປອງດອງປະຊາຊົນບັນດາເຜົ່າໃນຄອບຄົວໃຫ່ຍແຫ່ງຊາດລາວໃຫ້ໜັກແໜ້ນປະຕິບັດຄວາມສະເໝີພາບສ້າງສະຕິຊາດອັນໜຶ່ງອັນດຽວ, ສຶກສາອົບຮົມປຸກລະດົມ ແລະ ເສີມຂະຫຍາຍເປັນເຈົ້າປະເທດຊາດເປັນເຈົ້າຕົນເອງຂອງປະຊາຊົນລາວບັນດາເຜົ່າເຂົ້າຮ່ວມຂະບວນການຕ່າງໆຂອງພັກ – ລັດ ແນ່ໃສ່ແກ້ໄຂຄວາມທຸກຍາກຂອງຄອບຄົວ ແລະ ນໍາພາປະເທດຊາດຫຼຸດພົ້ນຈາກສະຖານະພາບຄວາມດ້ອຍພັດທະນາໃນປີ 2020 ການສ້າງຄອບຄົວ ແລະ ບ້ານສາມັກຄີປອງດອງ ແມ່ນເຕົ້າໂຮມຄວາມສາມັກຄີປອງດອງທົ່ວປວງຊົນ ໂດຍເອົາຫົວນ່ວຍຄອບຄົວ ແລະ ຮາກຖານບ້ານເປັນໃຈກາງເຊິ່ງມີມາດຕະຖານເພື່ອເປັນບ່ອນອີງໃຫ້ແກ່ອົງການແນວລາວສ້າງຊາດແຕ່ລະຂັ້ນຊີ້ນໍາ – ນໍາພາຈັດຕັ້ງປະຕິບັດໃຫ້ເປັນເອກະພາບກັນໃນຂອບເຂດທົ່ວປະເທດ.

ຈາກນັ້ນ; ພະນັກງານວິຊາການຫ້ອງການສາທາລະນະສຸກກໍ່ໄດ້ຂຶ້ນເຜີຍແຜ່ເອກະສານວ່າດ້ວຍວຽກງານໂພສະນາການ, ການສັກຢາກັນພະຍາດ ແລະ ການເຮັດສຸຂະອານາໄມ, ຕໍ່ຈາກນັ້ນ; ພະນັກງານວິຊາການຫ້ອງການສຶກສາທິການ ແລະ ກິລາກໍ່ໄດ້ເຜີຍແຜ່ເອກະສານວ່າດ້ວຍການສຶກສາເດັກກ່ອນໄວຮຽນ ແລະ ຕໍ່ຈາກນັ້ນ; ພະນັກງານວິຊາການຫ້ອງການສະຫະພັນແມ່ຍິ່ງກໍ່ໄດ້ເຜີຍແຜ່ເອກະສານວ່າດ້ວຍການໃຊ້ຄວາມຮຸນແຮງຕໍ່ເດັກນ້ອຍ ແລະ ການຄ້າມະນຸດຕື່ມອີກດ້ວຍ.
ທັງນີ້ກໍ່ເພື່ອເຮັດໃຫ້ປະຊາຊົນໃນກຸ່ມບ້ານສາມັກຄີໄຊ ໄດ້ຮັບຮູ້ ແລະ ເຂົ້າໃຈກ່ຽວກັບການປະຕິບັດວຽກງານໃນ 4 ຫ້ອງການທີ່ຂຶ້ນກັບເມືອງ ອາດສະພັງທອງ ແລະ ນໍາເອົາບົດຮຽນໄປໝູນໃຊ້ໃນການໃຊ້ຊີວິດເປັນຢູ່ໃຫ້ດີຍິງຂຶ້ນ.

ຂ່າວ: ສາຍສະໝຸດ ສິມພະລີວົງ