ໃນວັນທີ 13 ພະຈິກ 2019 ນີ້; ການນໍາຂັ້ນເມືອງ ອາດສະພັງທອງ ເຊິ່ງນໍາໂດຍທ່ານ ອຸໄພວັນ ໄຊຍະວົງ ເຈົ້າເມືອງ ອາດສະພັງທອງ ພ້ອມດ້ວຍການນໍາທຸກຂັ້ນຂອງເມືອງ ແລະ ພະນັກງານ ກັບນັກທຸລະກິດ ເມືອງ ອາດສະພັງທອງ ເຊິ່ງນໍາໂດຍທ່ານ ກໍລະຍົກ ກວນເມືອງຈັນ ໄດ້ສ້າງກິດຈະກໍາແຂ່ງຂັນກິລາເພື່ອສຸຂພາບ. ຢູ່ທີ່ເດິນໂຮງຮຽນມັດທະຍົມຕົ້ນດົງເຫັນ.

ການແຂ່ງຂັນໃນຄັ້ງນີ້; ແມ່ນເພື່ອຮັດແໜ້ນຄວາມສາມັກຄີລະຫວ່າງການນໍາຂັ້ນເມືອງ ແລະ ນັກທຸລະກິດພາຍໃນເມືອງ ເພື່ອເປັນການອອກກໍາລັງກາຍຜ່ອນຄາຍພາຍຫຼັງທີ່ໄດ້ປະຕິບັດວຽກງານຢ່າງຕັ້ງໜ້າ. ໂດຍຜົນການແຂ່ງຂັນໃນເຄິ່ງເວລາທໍາອິດແມ່ນທັງສອງທິມໄດ້ປ່ຽນກັນບຸກໃສ່ກັນຢ່າງຕັ້ງໜ້າ ແລະ ດຸເດືອດ.ເພື່ອຈະທໍາສະກໍຂຶ້ນນໍາ ໃນນັ້ນ; ທິມການນໍາຂັ້ນເມືອງແມ່ນໄດ້ປະຕູນໍາຂຶ້ນກ່ອນຈາກການຍິງຈຸດໂທດຂອງທ່ານເຈົ້າເມືອງ ແລະ ຈາກນັ້ນ; ຝ່າຍທິມນັກທຸລະກິດກໍ່ໄດ້ປະຕູຕີສະເໝີໂດຍເຄິ່ງທໍາອິດແມ່ນສະເໝີກັນ 1 ປະຕູຕໍ່ 1.

ມາໃນເຄິ່ງຫຼັງຝ່າຍທິມການນໍາຂັ້ນເມືອງແມ່ນໄດ້ນໍາຂຶ້ນອີກເປັນ 2 ປະຕູຕໍ່ 1 ເຊິ່ງຍິງເຂົ້າໂດຍທ່ານເຈົ້າເມືອງໂດຍໃນນັດນີ້ທ່ານໄດ້ໂຊຟອມຍິງໄປເຖິງ 2 ປະຕູ. ຈາກນັ້ນທິມນັກທຸລະກິດກໍ່ຕີສະເໝີໄດ້ໂດຍການແຂ່ງຂັນທໍາຖ້າຈະສະເໝີກັນແຕ່ໃນທ້າຍເກມແມ່ນທິມການນໍາຂັ້ນເມືອງແມ່ນໄດ້ວາງກົນລະຍຸດ ແລະ ສົ່ງກອງໜ້າລົງໄປເພື່ອຈະບຸກໃສທິມນັກທຸລະກິດ ແລະ ກໍ່ໄດ້ປະຕູປິດທ້າຍເປັນ 3 ປະຕູຕໍ່ 2 ຈົບການແຂ່ງຂັນແມ່ນທິມການນໍາຂັນເມືອງ ອາດສະພັງທອງ ສາມາດເອົາຊະນະໄປໄດ້ 3 ປະຕູຕໍ່ 2 ໃນການແຂ່ງຂັນນີ້; ແມ່ນໄດ້ພົບກັນເປັນຄັ້ງນັດທີ 2 ແລ້ວ ໂດຍນັດທີ 1 ແມ່ນຈັດຂຶ້ນຢູ່ທີ່ເດີນໂຮງຮຽນມັດທະຍົມປ່າຍດົງເຫັນ ແລະ ຈະມີນັດທີ 3 ອີກບໍ່ດົນນີ້.
ທັງນີ້; ກໍ່ເພື່ອເປັນການສ້າງກິດຈະກໍາແຂ່ງຂັນກິລາເພື່ອສຸຂພາບ ແລະ ຮັດແໜ້ນຄວາມສະມັກຄີກັນ ແລະ ທັງເປັນການສ້າງຂະບວນການເພື່ອຂໍ່ານັບຮັບຕ້ອນແກ່ກອງປະຊຸມໃຫ່ຍຄັ້ງທີ VIII ຂອງອົງຄະນະພັກເມືອງທີ່ຈະເປີດຂຶ້ນໃນມໍ່ໆນີ້ໃຫ້ເຕັມໄປດ້ວຍຜົນງານທີ່ຍິງໃຫ່ຍຕື່ມອີກດ້ວຍ.

ພາບຂ່າວ: ສາຍສະໝຸດ ສິມພະລີວົງ
ນັກຂ່າວເມືອງ: ອາດສະພັງທອງ.
savannakhet medialaos