ເມືອງໜອງບົກເກັບກ່ຽວເຂົ້ານາປີໄດ້ແລ້ວ 90%

0
204

ທ່ານ ຄຳມອນ ພົມພິພັກ ຫົວໜ້າຫ້ອງການກະສິກຳ ແລະ ປ່າໄມ້ ເມືອງໜອງບົກ ແຂວງຄຳມ່ວນໃຫ້ສຳພາດຕໍ່ນັກຂ່າວທ້ອງຖິ່ນ ໃນວັນທີ 14 ພະຈິກ ກ່ຽວກັບການເກັບກ່ຽວເຂົ້ານາປີ 2019 ຂອງຊາວກະສິກອນເມືອງໜອງບົກ ວ່າ: ແຜນການຜະລິດເຂົ້ານາປີ ໃນທົ່ວເມືອງແມ່ນ 15.670 ເຮັກຕາ, ຕົວຈິງປະຕິບັດໄດ້ 15.880 ເຮັກຕາ ເທົ່າກັບ 101,34% ຂອງແຜນການປີ.

ແຕ່ມາຮອດຕົ້ນເດືອນສິງຫາ ແມ່ນໄດ້ຖືກໄພພິບັດນໍ້າຖ້ວມເສຍຫາຍຈຳນວນ 4.750 ເຮັກຕາ ຍັງເຫຼືອພື້ນທີ່ເກັບກ່ຽວຕົວຈິງແມ່ນ 11.130 ເຮັກຕາ, ປະຈຸບັນແມ່ນເກັບກ່ຽວໄດ້ແລ້ວປະມານ 90% ຂອງເນື້ອທີ່ທັງໝົດ, ຄາດຄະເນສະມັດຕະພາບ 3,8 ໂຕ່ນຕໍ່ເຮັກຕາ, ຜົນຜະລິດ 42 ພັນກວ່າໂຕ່ນ ແລະ ຄາດວ່າຈະໃຫ້ສຳເລັດການເກັບກ່ຽວ 100% ໃນທ້າຍ ເດືອນພະຈິກ.

ນອກນີ້ຍັງໄດ້ກະກຽມຄວາມພ້ອມເຂົ້າສູ່ການຜະລິດເຂົ້ານາແຊງ ເຊິ່ງຊາວກະສິກອນກໍ່ໄດ້ຂຸ້ນຂ້ຽວສ້ອມແປງຟື້ນຟູລະບົບຊົນລະປະທານ ໂດຍສະເພາະແມ່ນການສັບໄຟລົງໃສ່ຈັກສູບນ້ຳ, ສ້ອມແປງຈັກສູບນ້ຳ, ຄອງເໝືອງທີ່ມີການເປ່ເພ ເຊິ່ງໃນປີນີ້ຍັງໄດ້ຮັບທຶນຈາກໂຄງການແມ່ນ້ຳຂອງເພື່ອກໍ່ສ້າງຄອງດິນຈີ່ ຈຳນວນ 3 ໂຄງການຄື: ໂຄງການບ້ານສອກເບາະ, ໂຄງການບ້ານດົງຜັກເຜື້ອ ແລະ ໂຄງການບ້ານນາວາງທົ່ງ ໃນນີ້ບາງໂຄງການແມ່ນໄດ້ເລີ່ມລົງມືຈັດຕັ້ງປະຕິບັດແລ້ວ ແລະ ໂຄງການທີ່ເຫຼືອກໍ່ໄດ້ຕອບສະໜອງທາງດ້ານແຮ່, ຊາຍ, ເຫຼັກ, ຊີມັງ ແລະ ອື່ນໆ ຄາດວ່າໃນທ້າຍເດືອນພະຈິກນີ້ ຈະໄດ້ຈັດຕັ້ງປະຕິບັດໃຫ້ສຳເລັດ 100%.

ສຳລັບທາງຫ້ອງການກະສິກຳ ແລະ ປ່າໄມ້ເມືອງ ກໍ່ໄດ້ຈັດຕັ້ງພະນັກງານ-ວິຊາການລົງປະຈຳໃນແຕ່ລະກຸ່ມບ້ານ ໂດຍສະເພະຈຳນວນ 25 ໂຄງການທີ່ມີແຜນຈັດຕັ້ງປະຕິບັດໃນປີນີ້ ໃນເນື້ອທີ່ທັງໝົດ 2.800 ເຮັກຕາ ພ້ອມທັງສະໜອງແນວພັນຈຳນວນໜຶ່ງໃຫ້ແກ່ຊາວກະສິກອນ ຄາດວ່າໃນທ້າຍເດືອນພະຈິກນີ້ແມ່ນຈະໄດ້ເລີ່ມລົງມືຕົກກ້າ. ນອກນີ້ກໍ່ຍັງໄດ້ກະກຽມໃຫ້ແກ່ການ ປູກພືດລະດູແລ້ງ ໃນເນື້ອທີ່ຕາມແຜນການ 1.770 ເຮັກຕາ ປະຈຸບັນແມ່ນໄດ້ຈັດຕັ້ງປະຕິບັດແລ້ວຈຳນວນໜຶ່ງ.

Medialaos khammouane