ກອງປະຊຸມຄະນະກໍາມະການລາຍແມັກ (LIMEC) ໄດ້ຈັດຂຶ້ນໃນວັນທີ 14 ພະຈິກ 2019 ນີ້ຢູ່ທີ່ຫ້ອງປະຊຸມຫ້ອງວ່າການປົກຄອງແຂວງໄຊຍະບູລີ. ໂດຍເປັນກຽດເຂົ້າຮ່ວມມີທ່ານ ນາງ ບຸນພັກ ອິນທະປັນຍາ ຮອງເຈົ້າແຂວງ ປະທານຊີ້ນໍາລາຍແມັກຂັ້ນແຂວງ, ທ່ານ ບຸນທ່ຽງ ສຸລິວັນ ປະທານສະພາການຄ້າ ແລະ ອຸດສາຫະກໍາແຂວງຫຼວງພະບາງ ປະທານຄະນະກໍາມະການລາຍແມັກ ສປປ ລາວ, ມີປະທານຄະນະກໍາມະການລາຍແມັກປະເທດໄທ, ປະທານຄະນະກໍາມະການລາຍແມັກປະເທດມຽນມາ, ຜູ້ອໍານວຍການວິທະຍາໄລໂລຈິດສະຕິກ ແລະ ໂຊອຸປະທານມະຫາວິທະຍາໄລນະເຣສວນ, ມີບັນດາຄະນະກໍາມະການລາຍແມັກ 5 ຈັງຫວັດຕອນລຸ່ມຣາຊະອານາຈັກໄທ, ຄະນະກໍາມະການລາຍແມັກຈາກລັດມອນ, ລັດກະຫຼ່ຽງ ແລະ ແຂວງເມວະດີ ສະຫະພາບມຽນມາ ແລະ ກໍາມະການລາຍແມັກ ຈາກແຂວງຫຼວງພະບາງ, ແຂວງໄຊຍະບູລີເຂົ້າຮ່ວມ.

ໃນພິທີ ທ່ານ ນາງ ບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ ປະທານຊີ້ນໍາລາຍແມັກ ໄດ້ກ່າວວ່າ: ມາເຖິງປະຈຸບັນກອງປະຊຸມລາຍແມັກໄດ້ດໍາເນີນກ້າວເຂົ້າສູ່ປີທີ 6 ທີ່ຈັດກອງປະຊຸມໃຫຍ່ລາຍແມັກທີ່ປະເທດມຽນມາ. ທີ່ຜ່ານມາໄດ້ມີການຮ່ວມມືຫຼາຍດ້ານ ບໍ່ວ່າຈະເປັນການຮ່ວມມືຕາມແນວທາງຂອງການຮ່ວມມືລາຍແມັກເຊັ່ນ: ທາງດ້ານການຄ້າ, ການລົງທຶນ, ການທ່ອງທ່ຽວ, ທາງດ້ານການສຶກສາ-ສາທາລະນະສຸກ ແລະ ການຂົນສົ່ງໂລຈິສຕິກ. ເຖິງແມ່ນວ່າຈະມີການລົງນາມການຮ່ວມມືໄປແລ້ວກໍ່ຕາມ ໂດຍລວມແມ່ນມີຫຼາຍດ້ານທີ່ສໍາເລັດ, ແຕ່ມີບາງດ້ານຍັງບໍ່ໄດ້ຈັດຕັ້ງປະຕິບັດ ຍ້ອນຄວາມພ້ອມຂອງອີກຝ່າຍໜຶ່ງບໍ່ສາມາດດໍາເນີນທຸລະກິດຮ່ວມກັນໄດ້ ສະນັ້ນອັນນີ້ເປັນບັນຫາໜຶ່ງໃນເຫດຜົນ ທີ່ພວກເຮົາຈະຕ້ອງພ້ອມກັນປຶກສາຫາລືແກ້ໄຂບັນດາສາເຫດສິ່ງອຸດຕັນ ແລະ ພ້ອມກັນຊອກຫາທາງອອກຮ່ວມກັນ. ໃນບົດບັນທຶກກອງປະຊຸມຄະນະກໍາມະການລາຍແມັກຄັ້ງທີ 2 ທີ່ນະຄອນຫຼວງພະບາງ ບັນດາຄະນະກໍາມະການທັງ 3 ປະເທດໄດ້ພ້ອມກັນຄົ້ນຄວ້າ ເຫັນໄດ້ບັນຫາຫຍຸ້ງຍາກຕ່າງໆຕົງກັນ ແລະ ກໍ່ເໄດ້ພ້ອມກັນມີວິທີແກ້ໄຂໃນຕໍ່ໜ້າ. ກອງປະຊຸມຄັ້ງນີ້ເຫັນວ່າມີຄວາມໝາຍ-ຄວາມສໍາຄັນເປັນຢ່າງຍິງ ເປັນການກະກຽມຄວາມພ້ອມບັນຫາດ້ານຕ່າງໆເຂົ້າສູ່ກອງປະຊຸມໃຫຍ່ລາຍແມັກຄັ້ງທີ 6 ທີ່ປະເທດມຽນມາ. ໃນໄລຍະ 5 ປີຜ່ານມາໄດ້ມີນັກທຸລະກິດ ຈາກປະເທດລາວຮ່ວມລົງນາມການຮ່ວມມື ໃນ 5 ດ້ານຕາມກອບການຮ່ວມມືຂອງ ລາຍແມັກ ແລ້ວຈໍານວນທັງໝົດ 34 ຄູ່ ໃນນັ້ນປະກອບມີ:

ດ້ານການຄ້າ-ການລົງທຶນ 23 ຄູ່, ການທ່ອງທ່ຽວ 6 ຄູ່, ສຸຂະພາບ 4 ຄູ່ ແລະ ໂລຈິດສະຕິກ 1 ຄູ່; ປະກອບມີນັກທຸລະກິດຈໍານວນ 19 ຫົວໜ່ວຍທຸລະກິດ ເຊິ່ງເຫັນວ່າເປັນຕົວເລກການຮ່ວມມື ( MoU ) ໃນລະດັບປານກາງຖືວ່າຍັງບໍ່ທັນຫຼາຍເທື່ອ ແຕ່ກໍ່ໄດ້ມີທຸລະກິດທີ່ເປັນໜໍ່ແໜງໃນການຮ່ວມມືກັນຢ່າງເປັນຮູບປະທໍາ ແລະ ຕໍ່ເນື່ອງນັບຕັ້ງແຕ່ ລາຍແມັກ ຄັ້ງທີ 3 ເປັນຕົ້ນມາເຖິງ 4 ຫົວໜ່ວຍທຸລະກິດຄື: ສູນຫັດຖະກໍາ ອອກພົບຕົກ ແລະ ຟາມໄໝໄຮ່ກໍານັນຈຸນ, ຮ້ານ ພີພີ ການກະເສດ ແລະ ບໍລິສັດ ພູເກືອ ຈໍາກັດ, ບໍລິສັດທ່ອງທຽວລາວກຣີນ ແລະ ກຸ່ມບໍລິສັດທ່ອງທ່ຽວໃນເຂດແຂວງ ອຸຕະລະດິດ ແລະ ສຸໂຂໄທ, ບໍລິສັດ ມະໂມລັກ ສົ່ງເສີມກະສິກໍາ ແລະ ໂຮງງານວົງພານິດ ເຊິ່ງຈະໄດ້ລົງນາມ MoU ແລະ ເປັນຕົວແທນຂອງໂຮງງານ ວົງພານິດ ສາຂາແຂວງຫຼວງພະບາງ ໃນທ້າຍປີນີ້ຊຶ່ງຖືວ່າເປັນໃບໜ້າອັນໃໝ່ໃຫ້ກັບແຂວງຫຼວງພະບາງໃນການຈັດການສິ່ງເສດເຫຼືອໃນທຸກໆວັນ ແລະ ເປັນຜົນສໍາເລັດອັນໜຶ່ງຂອງການຮ່ວມມືໃນໂຄງການ ລາຍແມັກ. ນອກຈາກບັນດານັກທຸລະກິດຕ່າງໆທີ່ໄດ້ກ່າວມາຂ້າງເທິງ ກໍ່ຍັງມີກິດຈະກໍາຫຼາຍໆຢ່າງທີ່ເກີດຈາກການຮ່ວມມືຂອງສະມາຊິກໃນກຸ່ມ ລາຍແມັກ ເປັນຕົ້ນແມ່ນກິດຈະກໍາຕ່າງໆທີ່ຕິດພັນກັບການທ່ອງທ່ຽວ, ການຄ້າ ແລະ ການລົງທຶນ ເຊິ່ງມີທັງທາງກົງ ແລະ ທາງອ້ອມ ເພາະລາຍແມັກໄດ້ຊ່ວຍໃຫ້ນັກທ່ອງທ່ຽວ ແລະ ຜູ້ຄົນທົ່ວໄປຮູ້ຈັກ 2 ແຂວງ, 5 ຈັງຫວັດ ແລະ 2 ລັດຫຼາຍຂຶ້ນ; ເກີດມີການໄປມາ, ມີການທ່ອງທ່ຽວ ແລະ ການຈາລະຈອນສິນຄ້າຜ່ານເສັ້ນທາງນີ້ນັບມື້ນັບເພີ່ມຂຶ້ນ. ນີ້ຄືໝາກຜົນໜຶ່ງຂອງ ລາຍແມັກ ທີ່ໄດ້ສ້າງສະສົມມາເຖິງ 5 ປີ ເຖິງແມ່ນວ່າບາງຢ່າງອາດຈະບໍ່ໄດ້ເກີດຈາກສະມາຊິກໃນກຸ່ມໂດຍກົງ ແຕ່ກໍ່ໄດ້ເປັນສ່ວນໜຶ່ງໃນການເກີດຜົນເຫຼົ່ານັ້ນ.

ຂ່າວ: ມະໄລວັນ.
Medialaos xayaboury