ທ່ານ ທັນສະໄໝ ກົມມະສິດ ລັດຖະມົນຕີກະຊວງ ໄປສະນີ, ໂທລະຄົມມນາຄົມ ແລະ ການສື່ສານ (ປທສ) ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ວາລາດີເມຍ ກາລີນິນ (Vladimir KALININ) ເອກອັກຄະລັດຖະທູດ ແຫ່ງສະຫະພັນຣັດເຊຍ ປະຈໍາ ສປປ ລາວ, ໃນວັນທີ 18 ພະຈິກນີ້ ເນື່ອງໃນໂອກາດມາດໍາລົງຕໍາແໜ່ງເປັນເອກອັກຄະລັດຖະທູດ ຄົນໃໝ່ປະຈໍາ ສປປ ລາວ.

ໃນໂອກາດນີ້, ທ່ານ ທັນສະໄໝ ກົມມະສິດ ໄດ້ສະແດງຄວາມຕ້ອນຮັບ, ຊົມເຊີຍ ຕໍ່ທ່ານ ວາລາດີເມຍ ກາລີນິນ ທີ່ໄດ້ເດີນທາງມາ ປະຕິບັດໜ້າທີ່ການທູດ ຢູ່ ສປປ ລາວ ເຊິ່ງເປັນການປະກອບ ສ່ວນອັນສຳຄັນ ໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ 2 ປະເທດ ໃຫ້ມີຄວາມແໜ້ນແຟ້ນຍິ່ງຂຶ້ນ. ພ້ອມນີ້, ສອງຝ່າຍຍັງໄດ້ແລກປ່ຽນຄໍາຄິດຄໍາເຫັນ ກ່ຽວກັບການເພີ່ມທະວີການຮ່ວມມືທາງດ້ານໄອຊີທີ ກໍ່ຄືຂະແໜງການ ໄປສະນີ, ໂທລະຄົມມນາຄົມ ແລະ ການສື່ສານ ເພື່ອປະກອບສ່ວນອັນສໍາຄັນເຂົ້າໃນການພັດທະນາເສດຖະກິດ-ສັງຄົມ. ລາວ-ຣັດເຊຍ ມີສາຍພົວພັນການຮ່ວມມືກັນມາຍາວນານ ແລະ ໄດ້ມີການຊ່ວຍເຫລືອເຊື່ງກັນຕະຫລອດມາ ບໍ່ວ່າຈະເປັນ ການຈັດຝຶກອົບຮົມສຳມະນາກັບ ສ.ຣັດເຊຍ ກ່ຽວກັບວຽກງານການປະສານງານຄື້ນຄວາມຖີ່ຕາມຊາຍແດນ, ການຮ່ວມມືກັບອົງການສື່ສານທາງອາວະກາດສາກົນ (Intersputnik) ສ.ຣັດເຊຍ. ພ້ອມນັ້ນ, ສອງຝ່າຍ ຍັງໄດ້ປຶກສາຫາລືການພົວພັນຮ່ວມມືຊ່ວຍເຫຼືອຊຶ່ງກັນ ແລະ ກັນ ໃນຕໍ່ໜ້າໃຫ້ນັບມື້ນັບຂະຫຍາຍຕົວ, ແຕກດອກອອກຜົນຍິ່ງໆຂື້ນ.
ໃນຕ້ອນທ້າຍ ທ່ານ ລາດີເມຍ ກາລີນິນ ໄດ້ສະແດງຄວາມຂອບໃຈ ຕໍ່ທ່ານລັດຖະມົນຕີ ທີ່ໄດ້ສະຫຼະເວລາ ອັນມີຄ່າ ຕ້ອນຮັບການເຂົ້າຢ້ຽມຂໍ່ານັບໃນຄັ້ງນີ້ ຢ່າງອົບອຸ່ນ, ເປັນກັນເອງ ແລະ ໄດ້ມີການແລກປ່ຽນຄຳຄິດຄຳເຫັນ ຢ່າງກົງໄປກົງມາ.

ພາບ+ຂ່າວ: ຫ້ອງການ, ພະແນກເລຂານຸການພິທີການ