ໃນວັນທີ 20 ພະຈິກ 2019 ນີ້ ຢູ່ທີ່ສະໂມສອນ ເມືອງອາດສະພອນ ແຂວງສະຫວັນນະເຂດ ສະຫາຍ ຄຳແພງ ເພັດທຸມພອນ ກຳມະການພັກແຂວງ ເລຂາພັກເມືອງ ເຈົ້າເມືອງອາດສະພອນ, ໄດ້ໃຫ້ກຽດໂອ້ລົມສະມາຊິກພັກພະນັກງານ ຫ້ອງການໃນຂົງເຂດເສດຖະກິດຂອງເມືອງ. ໃນໂອກາດດັ່ງກ່າວ ສະຫາຍ ຄຳເພັດ ບຸດສຸວັນ ກຳມະການພັກເມືອງ ຫົວໜ້າຫ້ອງການເງິນເມືອງ ກໍ່ໄດ້ລາຍງານ ຜົນສໍາເລັດການຊີ້ນຳໆພາ ຂອງແຕ່ລະວຽກງານໃນຂົງເຂດເສດຖະກິດ ໄລຍະ 1 ປີຜ່ານມາ.

ຈາກນັ້ນໃນພິທີ ກໍ່ຍັງໄດ້ມີການມອບບັດສະມາຊິກພັກປະຊາຊົນປະຕິວັດລາວ ໃຫ້ສະມາຊິກພັກສົມບູນ ຈາກ 05 ໜ່ວຍພັກຄື: ໜ່ວຍພັກຫ້ອງການອຸດສະຫະກຳ ແລະ ການຄ້າເມືອງ, ໜ່ວຍພັກຫ້ອງການໂຍທາທິການ ແລະ ຂົນສົ່ງເມືອງ, ໜ່ວຍພັກຫ້ອງການເງິນເມືອງ, ໜ່ວຍພັກຫ້ອງການກະສິກຳ ແລະ ປ່າໄມ້ເມືອງ ແລະ ໜ່ວຍພັກຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມເມືອງ; ຈຳນວນ 23 ສະຫາຍ, ຍິງ 04 ສະຫາຍ. ໃຫ້ກຽດມອບບັດດັ່ງກ່າວ ໂດຍ ສະຫາຍ ຄຳແພງ ເພັດທຸມພອນ ມອບໃຫ້ຢ່າງສົມກຽດ.

ໃນຕອນທ້າຍ ສະຫາຍ ຄຳແພງ ເພັດທຸມພອນ ກໍ່ໄດ້ໃຫ້ກຽດໂອ້ລົມຕໍ່ບັນດາສະຫາຍ ສະມາຊິກພັກພະນັກງານຫ້ອງການ ໃນຂົງເຂດເສດຖະກິດ ເຊິ່ງທ່ານກໍ່ໄດ້ກ່າວຍ້ອງຍໍຊົມເຊີຍຜົນງານ, ການຊີ້ນຳໆພາວຽກງານຂົງເຂດດັ່ງກ່າວນີ້ ໃຫ້ເກີດຜົນສໍາເລັດໃນຫຼາຍດ້ານ, ພ້ອມນັ້ນ ກໍ່ໄດ້ເອົາໃຈໃສ່ສຶກສາອົບຮົມການເມືອງແນວຄິດ ໃຫ້ຖັນແຖວສະມາຊິກພັກຂອງຕົນ ໃຫ້ເຂັ້ມແຂງ, ພ້ອມນັ້ນ ທ່ານ ກໍ່ໄດ້ເນັ້ນໜັກ ໃຫ້ຮັກສາມູນເຊື້ອຄວາມດຸໝັ່ນ, ສາມັກຄີ ທີ່ບັນດາທ່ານບັນດາສະຫາຍ ໄດ້ປະຕິບັດກັນມາໃຫ້ເຂັ້ມແຂງຍິ່ງຂື້ນ, ເອົາໃຈໃສ່ເສຍສະຫຼະ ແລະທຸມເທຄວາມຮູ້ຄວາມສາມາດທີ່ຕົນມີ, ສຸມທຸກກໍາລັງແຮງ ປະກອບເຂົ້າໃນການສ້າງສາພັດທະນາປະເທດຊາດ ເວົາລວມ, ເວົ້າສະເພາະກໍ່ຄືເມືອງອາດສະພອນຂອງພວກເຮົາ ໃຫ້ມີຄວາມຈະເລີນກ້າວໜ້າຍິ່ງຂື້ນ, ພ້ອມກັນຕ້ານສະກັດກັ້ນປະກົດການຫຍໍ້ທໍ້ຕ່າງໆ ທີ່ເກີດຂຶນໃນສັງຄົມ.

ຂ່າວຍັງແຈ້ງຕື່ມອີກວ່າ: ໃນວັນທີ 19 ພະຈິກ ທີ່ຜ່ານມານີ້ ໄດ້ມີພິທີມອບບັດສະມາຊິກພັກ ປະຊາຊົນ ປະຕິວັດລາວ ໃຫ້ຮາກຖານພັກ ປກຊ ເຊິ່ງມີທັງໝົດ 18 ສະຫາຍ, ຍິງ4 ສະຫາຍ. ໂດຍການເປັນປະທານຂອງ ທ່ານ ພັທ ຟ້າຮ່ວນ ພິລາວັນ ຄະນະປະຈຳພັກເມືອງ ຫົວໜ້າກອງບັນຊາການ ປກຊ ເມືອງ.

savannakhet medialaos