ກອງປະຊຸມໃຫ່ຍຄັ້ງທີ XII ຂອງຜູ້ແທນອົງຄະນະພັກເມືອງແບງ ແຂວງອຸດົມໄຊໄດ້ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 21 ພະຈິກນີ້ ທີ່ສະໂມສອນຂອງເມືອງ ໂດຍການເປັນປະທານຂອງສະຫາຍ ບຸນເທີມ ເຕີຍມະນີ ກຳມະການພັກແຂວງ ເລຂາພັກເມືອງ ເຈົ້າເມືອງ ເມືອງແບງ, ເຂົ້າຮ່ວມມີສະຫາຍ ປອ ຄຳພັນ ເຜີຍຍະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງ​ ອຸດົມໄຊ, ມີຄະນະປະຈຳພັກແຂວງ, ກຳມະການພັກແຂວງ, ອາດີດການນຳເມືອງ, ພະນັກງານປະຕິວັດອາວຸໂສ, ຜູ້ຊົງຄຸນວຸດທິ, ພ້ອມດ້ວຍ ແຂກຖືກເຊີນຈາກຂັ້ນແຂວງ, ເມືອງໃກ້ຄຽງ ແລະ ບັນດາສະຫາຍຜູ້ແທນສົມບູນ 128 ສະຫຍ, ຍິງ 5 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກ ໃນທົ່ວທຸກຂົງເຂດວຽກງານ 2.016 ສະຫາຍເຂົ້າຮ່ວມຢ່າງພ້ອມພຽງ.

ໃນກອງປະຊຸມ ສະຫາຍ ບຸນເທີມ ເຕີຍມະນີ ກຳມະການພັກແຂວງ ເລຂາພັກເມືອງ ເຈົ້າເມືອງ ເມືອງແບງ ໄດ້ກ່າວເປີດກອງປະຊຸມຢ່າງເປັນທາງການພ້ອມຜ່ານຮ່າງລາຍງານການເມືອງຂອງຄະນະບໍລິຫານງານພັກເມືອງ ຊຸດທີ XI ຂອງເມືອງ. ພາຍໃຕ້ການຊີ້ນໍາໆພາຂອງອົງຄະນະພັກເມືອງ ໄດ້ເຮັດໃຫ້ທົ່ວເມືອງແບງ ສາມາດຮັກສາໄດ້ສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ເສດຖະກິດ – ສັງຄົມໄດ້ຮັບການພັດທະນາຢ່າງຕໍ່ເນື່ອງ, ພື້ນຖານໂຄງລ່າງຂອງເມືອງກໍໄດ້ຮັບການປັບປຸງ,ຊີວິດການເປັນຢູ່ຂອງປະຊາຊົນບັນດາເຜົ່າ ໄດ້ຮັບການປັບປຸງ ແລະ ດີຂຶ້ນກວ່າເກົ່າ ສະແດງອອກຕະຫຼອດໄລຍະ 5ປີຜ່ານມາ ມູນຄ່າລວມຜົນຜະລິດ ແລະ ລາຍຮັບ ໃນປີ 2019 ສາມາດບັນລຸ 407.19 ຕື້ກີບ ໃນນີ້ຂະແໜງກະສິກໍາ-ປ່າໄມ້ ແລະ ການປະມົງ 305.51 ຕື້ກີບ, ຂະແໜງອຸດສະຫະກໍາ 28.27 ຕຶ້ກີບ, ຂະແໜງບໍລິການ 73.38 ຕື້ກີບ. ທຽບໃສ່ 5 ປີຜ່ານມາເພີ້ມຂຶ້ນ 22,57%, ສະເລ່ຍ 4,51%ຕໍ່ປີ, ສະເລ່ຍລາຍຮັບຕໍ່ຄົນໄດ້ 9 ລ້ານກ່ວາກີບ ຫຼື ເທົ່າກັບ 1.163 ໂດລາສະຫະລັດຕໍ່ຄົນຕໍ່ປີ.

ກອງປະຊຸມຜູ້ແທນທີ່ເຂົ້າຮ່ວມຈະໄດ້ພ້ອມກັນຄົ້ນຄ້ວາ,ປະກອບຄໍາເຫັນໃສ່ຮ່າງບົດລາຍງານການເມືອງ, ແຜນພັດທະນາ ເສດຖະກິດ – ສັງຄົມ 5 ປີ, ທິດທາງລວມ ແລະ ຄາດໝາຍສູ້ຊົນຕົ້ນຕໍ, ວຽກງານຈຸດສຸມແຕ່ລະດ້ານ ແລະ ບົດສໍາຫຼວດການນໍາພາລວມຂອງຄະນະບໍລິຫານງານພັກເມືອງ ຊຸດທີ XI, ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ ແລະ ບົດຮຽນ ໃນການ ຊີ້ນໍາ-ນໍາພາ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI. ທີ່ສຳຄັນໃນກອງປະຊຸມຈະໄດ້ມີການປ່ອນບັດຄັດເລືອກເອົາຄະນະບໍລິຫານງານພັກເມືອງແບງຊຸດໃໝ່, ປ່ອນບັດຄັດເລືອກເອົາຄະນະປະຈຳພັກເມືອງ, ເລຂາ, ຮອງເລຂາພັກເມືອງ,ປະທານ, ຮອງປະທານກວດກາພັກຊຸດໃໝ່ເພື່ອສືບຕໍ່ບໍລິຫານວຽກງານຂອງອົງຄະນະພັກເມືອງແບງໃນຕໍ່ໜ້າ.

ໂດຍ: ສີຈັນ ເກດວົງສາ
Medialaos