ໃນທ້າຍອາທິດຜ່ານມານີ້ ພະແນກແຮງງານ ແລະສະຫວັດດີການສັງຄົມແຂວງສາລະວັນໄດ້ຈັດພິທີປະກາດມອບ-ຮັບ ແລະແຕ່ງຕັ້ງລະຫວ່າງຮັກສາການຫົວໜ້າພະແນກແຮງງານຜູ້ເກົ່າ ແລະຜູ້ໃໝ່ຂື້ນຢູ່ທີ່ຫ້ອງປະຊຸມຂອງພະແນກໂດຍເປັນກຽດເຂົ້າຮ່ວມຂອງທ່ານ ວິຊຽນ ນະວິກຸນ ຮອງເຈົ້າແຂວງໆສາລະວັນ, ມີຕ່າງໜ້າພະແນການຕ່າງໆທີ່ກ່ຽວຂ້ອງ, ຫົວໜ້າຫ້ອງການພະແນກແຮງງານ ແລະສະຫວັດດີການສັງຄົມໃນ 8 ຕົວເມືອງ ແລະພະນັກງານລັດຖະ ກອນ, ສະມາຊິກພັກເຂົ້າຮ່ວມ

ທ່ານ ເພັດສະໜອນ ພາສີ ຮອງຫົວໜ້າຄະນະຈັດຕັ້ງແຂວງສາລະວັນກໍ່ໄດ້ຂື້ນຜ່ານຂໍ້ຕົກລົງເລກທີ 679/ຈຂ.ສວ ລົງວັນທີ 5 ພະຈິກ ປີ 2019 ວ່າດ້ວຍການແຕ່ງຕັ້ງຫົວໜ້າພະແນກແຮງງານ ແລະສະຫວັດດີການສັງຄົມແຂວງ ອີງຕາມກົດໝາຍການປົກຄອງທ່ອງຖິ່ນ ( ສະບັບປັບປຸງ ) ເລກທີ 68/ສພຊ ລົງວັນທີ 14 ທັນວາ ປີ 2015 ໝວດທີ IV ມາດຕາທີ 20 ຂໍ້ທີ 11 ວ່າດ້ວຍ: ສິດຂອງເຈົ້າແຂວງໃນການຕົກລົງແຕ່ງຕັ້ງ, ຍົກຍ້າຍ ຫຼືປົດຕໍ່າແໜງຫົວໜ້າພະແນກ, ອີງຕາມໜັງສືແຈ້ງຕອບຂອງລັດຖະມົນຕີກະຊວງແຮງງານ ແລະສະຫວັດດີການສັງຄົມ ສະບັບເລກທີ 4271/ຮສສ ລົງວັນທີ 28 ຕຸລາ ປີ 2019 ເລື່ອງເຫັນດີຮັບການຍົກຍ້າຍ ແລະແຕ່ງຕັ້ງພະນັກງານການນຳພະແນກແຮງງານ ແລະສະຫວັດດີການສັງຄົມແຂວງສາລະວັນ ແລະອິງຕາມໜັງສືສະເໜີ ຂອງຄະນະຈັດຕັ້ງແຂວງ ສະບັບເລກທີ 331/ຄຈຂ.ສວ ລົງວັນທີ 4 ພະຈິກ ປີ 2019, ເຈົ້າແຂວງສາລະວັນຕົກລົງເຫັນດີ ແຕ່ງຕັ້ງທ່ານ ຄຳຕາ ໂຮ່ຊົງເລືອງ ກຳມະການພັກແຂວງ ອາດີດເລຂາພັກເມືອງ, ເຈົ້າເມືອງໆສະໝ້ວຍ ເປັນຫົວໜ້າພະແນກແຮງງານ ແລະສະຫວັດດີການສັງຄົມແຂວງສາລະວັນ
ພ້ອມນັ້ນໃນພິທີກໍ່ຍັງໄດ້ຮັບຟັງການຜ່ານບົດສະຫຼຸບລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດໜ້າທີ່ວຽກງານໃນໄລຍະຜ່ານມາເຊິ່ງມີທັງດ້ານດີ-ດ້ານອ່ອນ, ຂໍ້ຄົງຄ້າງ ແລະວຽກງານທີ່ຈະສືບຕໍ່ຈັດຕັ້ງປະຕິບັດໃນໄລຍະຕໍ່ໜ້າເພື່ອເຮັດໃຫ້ຜູ້ມາຮັບໜ້າທີ່ໃໜໄດ້ຮັບຮູ້ ແລະເຂົ້າໃຈ, ຈາກນັ້ນກໍ່ໄດ້ມີການລົງນາມເຊັນບົດບັນທຶກມອບ-ຮັບຫວ່າງ ທ່ານ ສຸດດາ ໄລອິນທະວົງ ຮັກສາການຫົວໜ້າພະແນກແຮງງານສະຫວັດດີການສັງຄົມແຂວງຜູ້ເກົ່າ ແລະທ່ານ ຄຳຕາ ໂຮຊົງເລືອງ ກຳມະການພັກແຂວງ ອາດີດເລຂາພັກເມືອງ, ເຈົ້າເມືອງໆສະໝ້ວຍ ທີ່ມາຮັບໜ້າທີ່ໃໝເປັນຫົວໜ້າພະແນກແຮງງານ ແລະສະຫວັດດີການສັງຄົມແຂວງສາລະວັນ, ໂດຍຊ່ອງໜ້າທ່ານ ວິຊຽນ ນະວິກຸນ ຮອງເຈົ້າແຂວງໆສາລະວັນ ແລະແຂກທີ່ຖືກເຊີນ

ພາບ-ຂ່າວ: ສິດຕາ ເພັດວົງສາ
medialaos salavanh