ເຈົ້າເມືອງໆນອງ ຢ້ຽມຢາມໂອ້ລົມພະນັກງານ ອະວຸໂສບຳນານ

0
217

ໃນວັນທີ 19 ພະຈິກ2019ຜ່ານມານີ້ ທ່ານ ລຳແກ້ວແສງໜູທອງ ຮັກສາການ ເລຂາພັກເມືອງ ເຈົ້າເມືອງໆນອງ ໄດ້ລົງພົບປະປະຢ້ຽມຢາມ ພະນັກງານການນຳຫຼັກແຫຼ່ງ ຂອງຫ້ອງການ ແຮງງານສະຫວັດດີການ ແລະ ສັງຄົມເມືອງ, ແລະ ຫ້ອງການ ສະຫະພັນນັກຮົບເກົ່າ ຢູ່ທີ່ ສະໂມສອນຫ້ອງການສຶກສາທິການແລະກິລາເມືອງ ມີທ່ານ ບຸນໄມ ໄຊຍະນວນຫົວໜ້າຫ້ອງການແຮງງານ, ທ່ານ ທອງຈັນ ວັນນາລີ ປະທານສະຫະພັນນັກຮົບເກົ່າເມືອງນອງ ,ພະນັກງານທັງສອງຫ້ອງການເຂົ້າຮ່ວມຢ່າງພ້ອມພຽງ.
ໃນພິທີກໍ່ໄດ້ຮັບຟັງການລາຍງານການຈັດຕັ້ງປະຕິບັfຂອງວຽກງານທັງສອງຫ້ອງການຕະຫຼອດໄລຍະຜ່ານມາ ຈາກ ທ່ານ ນາງ ທອງໃສ ວຸທິສະຫວັດ ຮອງຫົວໜ້າ ຫ້ອງການ ແຮງງານ ສະຫວັດດີ ແລະສັງຄົມເມືອງໃຫ້ຮູ້ເຖິງ ດ້ານດີ, ດ້ານອ່ອນ, ຂໍ້ຂາດຕົກບົກຜ່ອງ ແລະ ຜົນງານທີ່ຍາດມາໄດ້ຕະຫຼອດໄລຍະຜ່ານມາ.

ໂອກາດດັ່ງກ່າວກໍ່ໄດ້ຮັບຟັງການໂອ້ລົມຂອງ ທ່ານ ລຳແກ້ວ ແສງໜູທອງ ເຈົ້າເມືອງໆນອງ ໂດຍໃຫ້ຮູ້ວ່າ: ຫ້ອງການແຮງງານສະຫວັດດີການ ແລະສັງຄົມ ແລະ ຫ້ອງການ ສະຫະພັນນັກຮົບເກົ່ານີ້ ບໍ່ແມ່ນພະນັກງານລັດຖະກອນທີ່ເຮັດວຽກກັບນັກທຸລະກິດ, ບໍ່ແມ່ນພະນັກງານລັດຖະກອນທີ່ເຮັດວຽກງານທົ່ວໄປ, ແຕ່ເປັນພະນັກງານລັດຖະກອນທີ່ເຮັດວຽກ ກັບຜູ້ສູງອາຍຸ, ຜູ້ເສຍອົງຄະ, ແລະອື່ນໆ, ແຕ່ເຮັດວຽກກັບຄົນທີ່ມີລະດັບການສຶກສາບໍ່ສູງ ແຕ່ມີຄວາມຮູ້, ຄວາມສາມາດສູງ ໃນເມື່ອຮູ້ຄືແນວນັ້ນແລ້ວ ພະນັກງານທັງສອງຫ້ອງການນີ້ຕ້ອງໄດ້ເຂົ້າໃຈ, ຕ້ອງໄດ້ມີຄວາມອົດທົນ, ຕ້ອງໄດ້ຮັກສາຈັນຍາບັນ, ໃນໜ້າວຽກທີ່ເຮັດ, ໃນໜ້າທີ່ ທີ່ປະຕິບັດ, ພະນັກງານແຮງງານສະຫວັດດີການ ແລະ ພະນັກງານນັກຮົບເກົ່າແມ່ນພະນັກງານທີ່ຕ້ອງເຮັດວຽກງານ ກ່ຽວກັບການປະຕິບັດນະໂຍບາຍ, ຕ້ອງເປັນຜູ້ກໍາແໜ້ນ, ຄົ້ນຄ້ວາແນວທາງນະໂຍບາຍຂອງພັກ-ລັດ ເປັນຜູ້ໃຫ້ຂໍ້ມູນ ໃຫ້ຄຳແນະນຳທີ່ດີ, ແນະນຳຄຳສະເໜີຕ່າງໆ ແລະການບໍລິການຕ່າງໆທີ່ດີ ຕໍ່ກັບນັກຮົບ, ນັກປະຕິວັດ ຜູ້ອະວຸໂສທີ່ມາສອບຖາມ ຫຼື ພົວພັນວຽກງານອື່ນໆ. ນອກນັ້ນ ທ່ານ ລຳແກ້ວ ແສງໜູທອງ ເຈົ້າເມືອງໆນອງ ກໍ່ຍັງຮຽກຮ້ອງມາຍັງບັນດາ ພະນັກງານປະຕິວັດ ອະວຸໂສບຳນານ ຊ່ວຍສຶກສາອົບຮົມລູກຫຼານທີ່ໜຸ່ມນ້ອຍ ໃຫ້ມີຄວາມເຕົ້າໂຮມຄວາມສາມັກຄີ, ສຶກສາອົບຮົມທາງດ້ານປະຫວັດສາດ, ເລົ່າເຫດການປະຫວັດສາດທີ່ໄດ້ຕໍ່ສູ້ມາຢ່າງລະອິດ, ລະອ້ຽວ, ແສນທຸກທົນ ເພື່ອຈະໄດ້ມີມື້ນີ້ມາ,ດ້ວຍຄວາມບາກບັ່ນຂອງຄົນຮຸ່ນຫຼັງໄດ້ຍອມເສຍເລືອດເນື້ອຈິດໃຈ,ກາຍ ແລະ ເສຍຊີວິດມາຫຼາຍແສນຄົນນັບບໍ່ຖ້ວນ ຢາກໃຫ້ຄົນຮຸ່ນຫຼັງ, ລູກຫຼານ ໄດ້ຊຶມຊັບເຂົ້າໃນຈິດໃຈເພື່ອໃຫ້ມີຈິດສຳນຶກຮັກ ແລະຫວງແຫນຜືນແຜ່ນດິນທີ່ຢູ່ອາໃສ ໃຫ້ຮັກສາໄວ້ຈົນຊົ່ວລູກຊົ່ວຫຼານຕະຫຼອດໄປ. ນອກນັ້ນ ທັງ 2 ຫ້ອງການກໍ່ໄດ້ນຳເໜີກ່ຽວກັບ ການໃຊ້ບັດ ເອທີເອັມ ປະຈຸບັນນີ້ ຄິດວ່າສະດວກສະບາຍຂຶ້ນຫຼາຍແລ້ວ ແຕ່ພັດຍິ່ງເພີ່ມຄວາມຫຍຸ້ງຍາກສັບສົນຫຼາຍ ເພາະວ່າຢູ່ເມືອງນອງ ຊ້ຳພັດບໍ່ມີຕູ້ກົດເງິນ, ຖ້າເງິນເດືອນອອກເດືອນໃດຕ້ອງໄດ້ເດີນທາງ ໄປກົດຢູ່ ເມືອງເຊໂປນ ຫຼື ຢູ່ເຂດຊາຍແດນລາວ-ຫວຽດນາມ ຍິ່ງເຮັດໃຫ້ມີຄວາມຫຍຸ້ງ ຍາກສັບສົນຫຼາຍໆຢ່າງ ແຕ່ບໍ່ສະເພາະຫ້ອງການທີ່ກ່າວມາ ໃນທົ່ວເມືອງກໍ່ເຊັ່ນດຽວກັນ, ນຳສະເໜີກ່ຽວກັບເງິນນະໂຍບາຍ ຕໍ່ຜູ້ເສຍຊີວິດໃນສະໄໝສົງຄາມ ແລະຍັງມີຫຼາຍໆບັນຫາທີ່ນຳສະເໜີ.

savanakhet medialaos