ກອງ​ປະ­ຊຸມ​ລັດ­ຖະ­ມົນ­ຕີ​ສະ­ຫວັດ­ດີ​ການ​ສັງ­ຄົມ ແລະ ການ​ພັດ­ທະ­ນາ ອາ​ຊຽນ ຄັ້ງ​ທີ 10 ແລະ ກອງ​ປະ­ຊຸມ​ທີ່​ກ່ຽວ­ ຂ້ອງ​ໄດ້​ເປີດ​ຂຶ້ນ​ຢ່າງ​ເປັນ​ທາງ​ການ​ໃນ​ວັນ​ທີ 21 ພະ­ຈິກ ນີ້ ທີ່​ໂຮງ­ແຮມ​ດອນ​ຈັນ​ພາ​ເລດ ນະ ­ຄອນ­ຫຼວງ​ວຽງ​ຈັນ,ໃຫ້​ກຽດ​ກ່າວ​ເປີດ​ກອງ​ປະະ​ຊຸມ​ດັ່ງ­ກ່າວ​ໂດຍ ທ່ານ ສົມ​ດີ ດວງ​ດີ ຮອງ​ນາ­ຍົກ​ລັດຖະ​ມົນ­ຕີ, ລັດ­ຖະ­ມົນ­ຕີ​ກະ ­ຊວງ​ການ​ເງິນ ແຫ່ງ ສປປ ລາວ, ມີ​ບັນ­ດາ​ລັດ­ຖະ­ມົນ­ຕີ ຮອງ​ລັດ ­ຖະ­ມົນຕີສະ­ຫວັດ­ດີ​ການ​ສັງ­ຄົມ ແລະ ການ​ພັດ­ທະ­ນາອາ​ຊຽນ ແລະ ຮອງ​ເລ­ຂາ­ທິ­ການ​ໃຫຍ່​ອາ​ຊຽນ ພ້ອມ​ທັງ ຄະ­ນະ​ຜູ້​ແທນ​ ອາ​ຊຽນ ແລະ ແຂກ​ຖືກ​ເຊີນເຂົ້າ​ຮ່ວມ ປະ­ມານ 150 ທ່ານ.

ໃນ​ພິ­ທີ ທ່ານ ສົມ​ດີ ດວງ​ດີ ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ຜົນ­ງານ ກໍຄື​ບົດ­ບາດ​ອັນ​ສຳ ­ຄັນ​ຂອງ​ບັນ­ດາ​ລັດ­ຖະ­ມົນ­ຕີ​ປະ­ເທດ​ສະ­ມາ­ຊິກ​ອາ​ຊຽນ ທີ່​ໄດ້​ປະ­ກອບ­ສ່ວນ​ເຂົ້າ​ໃນ​ການ​ສ້າງ​ປະ­ຊາ​ຄົມ​ອາ​ຊຽນ 2025 ໂດຍ​ສະ­ເພາະ​ການ​ສ້າງປະ ­ຊາ​ຄົມ​ອາ​ຊຽນໃນ​ໄລ­ຍະ​ຜ່ານ​ມາ ພ້ອມ​ທັງ​ໄດ້​ກ່າວ​ຢໍ້າ​ວ່າ ກອງ​ປະ­ຊຸມ​ລັດ­ຖະ­ມົນ­ຕີ​ສະ ຫວັດ­ດີ​ການ​ສັງ­ຄົມ ແລະ ການ​ພັດ­ທະ­ນາ ອາ​ຊຽນ ຄັ້ງ​ທີ 10 ແລະ ກອງ​ປະ­ຊຸມ​ທີ່​ກ່ຽວ­ຂ້ອງ​ຄັ້ງ​ນີ້ ແມ່ນ​ຈັດ​ຂຶ້ນ​ພາຍ​ໃຕ້​ຫົວ­ຂໍ້ “ການ​ສ້າງ​ຄວາມ​ເຂັ້ມ­ແຂງ​ວຽກ​ງານ​ປົກ​ປ້ອງ​ສັງ­ຄົມ​ສຳ­ລັບ​ເດັກ​ດ້ອຍ​ໂອ­ກາດ” ໂດຍ​ເລັ່ງ​ໃສ່ ສາມ​ບັນ­ຫາ​ທີ່​ສໍາ​ຄັນ ຄື: 1) ຮັດ​ແໜ້ນ​ວຽກ​ງານ​ປົກ​ປ້ອງ​ສັງ­ຄົມ​ໃຫ້​ມີ​ລັກ­ສະ­ນະ​ກວມ​ລວມ, ເທົ່າ​ທຽມ​ກັນ ແລະ ຮັບ­ປະ­ກັນ​ສ່ວນ​ຮ່ວມ ແລະ ໄດ້​ຮັບ​ຜົນ​ປະ­ໂຫຍດ​ຂອງ​ທຸກ​ພາກ­ສ່ວນ​ໃນ​ສັງ­ຄົມ ໂດຍ​ສະ­ເພາະ​ເດັກ​ດ້ອຍ​ໂອ­ກາດ, ຜູ້​ພິ­ການ ແລະ ຜູ້​ອາ­ຍຸ​ສູງທີ່​ປ່ຽວ­ພອຍ; 2) ຍົກ​ສູງ​ການ​ເຂົ້າ​ເຖິງ​ການ​ບໍ­ລິ­ການ ແລະ ການ​ປົກ​ປ້ອງ​ສັງ­ຄົມ​ໃຫ້​ມີ​ຄວາມ​ສະ­ດວກ, ວ່ອງ­ໄວ, ມີ​ຄວາມ​ກຽມ­ພ້ອມ, ຄົບ​ວົງ​ຈອນ, ມີ​ຄຸນ​ນະ​ພາບ, ເທົ່າ​ທຽມ​ກັນ ແລະ ຍືນ​ຍົງ; ແລະ 3) ເພີ່ມ​ທະ­ວີ​ການ​ພົວ­ພັນ​ຮ່ວມ​ມື ແລະ ລະ­ດົມ​ຂົນ­ຂວາຍ​ທຶນ­ຮອນ, ເຕັກ­ນິກ​ວິ­ຊາ​ການ​ຈາກ​ຄູ່​ເຈ ­ລະ­ຈາ ອາ​ຊຽນ, ຄູ່​ຮ່ວມ​ມື​ພາຍ​ນອກ, ອົງ­ການ​ຈັດ​ຕັ້ງ​ສາ­ກົນ ລວມ​ທັງ​ອົງ­ການ​ຈັດ​ຕັ້ງ​ສາ­ກົນ​ບໍ່​ສັງ­ກັດ​ລັດ­ຖະ­ບານ ເພື່ອ​ມີ​ສ່ວນ​ຮ່ວມ​ໃນ​ການ­ຈັດ­ຕັ້ງ​ປະ­ຕິ­ບັດ​ໃຫ້​ບັນ­ລຸ​ຜົນ­ສຳ­ເລັດ​ສູງ​ຂຶ້ນ.

ນອກ­ຈາກ​ນີ້, ທ່ານ ສົມ​ດີ ດວງ​ດີ ຍັງ​ໄດ້​ສະ­ເໜີ​ໃຫ້​ບັນ­ດາ​ລັດ­ຖະ­ມົນ­ຕີ ອາ​ຊຽນ ສືບ­ຕໍ່​ຊຸກ­ຍູ້​ໃຫ້​ຂະ­ແໜງການ​ທີ່​ກ່ຽວ­ຂ້ອງ ປະ­ຕິ­ບັດ​ແຜນ​ວຽກ 2016-2020 ໃຫ້​ມີ​ປະ­ສິດ​​ທິ​ພາບ​ກວ່າ​ເກົ່າ ໂດຍ​ສະ­ເພາະ​ໃຫ້​ມີ​ການ​ທົບ​ທວນ​ກາງ​ສະ­ໄໝ​ການ­ຈັດ ­ຕັ້ງ​ປະ­ຕິ­ບັດ​ແຜນ​ແມ່​ບົດ​ການ​ສ້າງ​ປະ­ຊາ​ຄົມ​ວັດ­ທະ­ນະ​ທຳ​-​ສັງ­ຄົມ ອາ​ຊຽນ 2025 ແລະ ໃຫ້​ຄົ້ນ­ຄວ້າ​ລະ­ອຽດ​ໃນ​ການ​ກຳ­ນົດ​ເອົາ​ບຸລິ​ມະ​ສິດ​ສຳ­ຄັນ​ຕ່າງໆ​ເຂົ້າ​ໃນ​ການ​ຮ່າງ​ແຜນ​ວຽກ​ໃໝ່ 2021-2025, ສືບຕໍ່​ນຳ​ເອົາ​ແຜນ​ງານ​ເສີມ​ສ້າງ​ຊຶ່ງ​ກັນ ແລະ ກັນ 2020-2025 ທີ່​ໄດ້​ຮັບ­ຮອງ​ເອົາ​ໃນ​ກອງ​ປະ­ຊຸມ​ສຸດ​ຍອດ ອາ​ຊຽ​ນ-ສປຊ ຄັ້ງ​ທີ 10 ຜ່ານ​ມາ ທີ່ ບາງ­ກອກ ເພື່ອ​ນຳ­ໄປ​ຈັດ​ຕັ້ງ​ປະ­ຕິ­ບັດ​ໃຫ້​ປະ ­ກົດ​ຜົນ​ເປັນ​ຈິງ ແລະ ສືບ­ຕໍ່​ເພີ່ມ​ທະ­ວີ​ການ​ພົວ ­ພັນ​ຮ່ວມ​ມື​ກັບ​ບັນ­ດາ​ປະ​ເທດ​ຄູ່​ເຈ­ລະ­ຈາ​ອາ​ຊຽນ​ບວກ​ສາມ, ຄູ່​ຮ່ວມ​ມື​ພາຍ​ນອກ, ອົງ­ການ​ຈັດ​ຕັ້ງ​ສາ­ກົນ ແລະ ທຸກ​ພາກ ສ່ວນ​ທີ່​ກ່ຽວ­ຂ້ອງ ເພື່ອ​ປະ­ກອບສ່ວນ​ເຂົ້າ​ໃນ​ວຽກ​ງານ​ສະ­ຫວັດ­ດີ​ການ​ສັງ­ຄົມ​ໃຫ້​ນັບ​ມື້​ດີ​ຂຶ້ນ.

ພາຍ­ຫຼັງ​ສຳ­ເລັດ​ພິ­ທີ​ເປີດ​ແລ້ວ, ກອງ​ປະ­ຊຸມ​ລັດ­ຖະ­ມົນຕີ​ ສະ­ຫວັດ­ດີ​ການ​ສັງ­ຄົມ ແລະ ການ​ພັດ­ທະ­ນາ ອາ​ຊຽນ ຄັ້ງ​ທີ 10 ແມ່ນ​ໄດ້​ດໍາ​ເນີນ​ໄປ​ພາຍ​ໃຕ້​ການ​ເປັນ​ປະ­ທານ​ຂອງ ທ່ານ ຄຳ​ແພງ ໄຊ​ສົມ​ແພງ ລັດ­ຖະ ­ມົນ­ຕີ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ, ກອງ​ປະ­ຊຸມ​ໄດ້​ມີ​ການ​ແລກ­ປ່ຽນ​ຄຳ​ຄິດ​ຄຳ​ເຫັນກ່ຽວ​ກັບວຽກ​ງານ​ສະ­ຫວັດ­ດີ​ການ​ສັງ­ຄົມ ແລະ ການ​ພັດທະ­ນາອາ​ຊຽນ ໂດຍ​ສະ­ເພາະ​ແມ່ນ​ວຽກ​ປົກ​ປ້ອງ​ສິດ­ຜົນ­ປະ­ໂຫຍດ​ຂອງ​ແມ່​ຍິງ ແລະ ເດັກນ້ອຍ, ການ​ເບິ່ງ­ແຍງ​ດູ­ແລຜູ້​ອາ­ຍຸສູງ, ການ​ຊ່ວຍ ­ເຫຼືອ​ຜູ້​ພິ­ການ ແລະ ກຸ່ມ​ຄົນ​ທີ່​ດ້ອຍ​ໂອ­ກາດ​ຕ່າງໆ. ພ້ອມ​ກັນ​ນັ້ນ, ກອງ​ປະ­ຊຸມ​ຍັງ​ໄດ້​​ສຸມ​ໃສ່​ບາງ​ບັນ­ຫາ​ທີ່​ສຳ­ຄັນ​ເປັນ­ຕົ້ນ​ແມ່ນ ເພີ່ມ​ທະ­ວີ​ການ​ຮ່ວມມື, ຊ່ວຍ­ເຫຼືອ ແລະ ແລກ­ປ່ຽນ​ບົດ­ຮຽນ​ກ່ຽວ​ກັບ​ການ​ພັດ­ທະ ­ນາ​ກຸ່ມ​ຄົນ​ດ້ອຍ​ໂອ­ກາດ ໂດຍ​ສະ­ເພາະ​ເດັກ​ໃຫ້​ຫຼາຍ​ຂຶ້ນ​ກວ່າ​ເກົ່າ; ປະ­ສານ​ສົມ­ທົບ​ກັບ​ບັນ­ດາ​ຂະ­ແໜງການ ແລະ ອົງ­ການ​ຕ່າງໆ ທີ່​ກ່ຽວ­ຂ້ອງ​ໃນອາ​ຊຽນ ເພື່ອ​ຮ່ວມ​ກັນ​ວາງ​ແຜນ­ການ ແລະ ໂຄງການ​ຕ່າງໆ ເພື່ອ​ຈັດ​ຕັ້ງ​ປະ­ຕິ­ບັດ​ວຽກ​ສະ­ຫວັດ­ດີ​ການ​ສັງ­ຄົມ ແລະ ການ​ພັດ ­ທະນາ ໂດຍ​ສະ­ເພາະການ​ປົກ​ປ້ອງ​ສັງ​ຄົມ​ສໍາ​ລັບ​ເດັກ​ດ້ອຍ​ໂອ­ ກາດ​ໃນອາ​ຊຽນ ໃຫ້​ເປັນ​ຮູບ​ປະ​ທຳ​ດີ​ຂຶ້ນ​ກວ່າ​ເກົ່າ; ຂະ­ຫຍາຍ​ການ​ຮ່ວມ​ມື​ກັບ​ບັນ­ດາ​ປະ­ເທດ​ຄູ່​ເຈ­ລະ­ຈາ​ອາ​ຊຽນ​ບວກ​ສາມ, ບັນ­ດາ​ອົງ­ການ​ຈັດ​ຕັ້ງ​ສາ­ກົນ, ອົງ­ການ​ພາກ​ພື້ນ, ຂະແໜງ​ການ​ພາກ​ລັດ ແລະ ເອ­ກະຊົນ ທີ່​ກ່ຽວຂ້ອງ ເພື່ອ​ລະ­ດົມ​ແຫຼ່ງ​ທຶນ ແລະ ເຕັກນິກ​ວິ­ຊາ​ການ ນໍາ​ໃຊ້​ເຂົ້າ​ໃນ​ການ­ຈັດ­ຕັ້ງ​ປະ ­ຕິ­ບັດ​ວຽກ​ສະຫວັດ­ດີ​ການ​ສັງ ­ຄົມ ແລະ ການ​ພັດ­ທະ­ນາ​ອາ​ຊຽນ ໃຫ້​ມີ​ຄວາມ​ຄືບ​ໜ້າ ແລະ ມີ​ຜົນສຳ­ເລັດ​ເປັນ​ຮູບ​ປະ​ທຳ​ຫຼາຍ​ຂຶ້ນ.

ໃນ​ຕອນ​ທ້າຍ,ທ່ານ​ປະ ­ທານ​ກອງ​ປະ­ຊຸມ​ໄດ້​ສະ­ແດງ​ຄວາມ​ຂອບ­ໃຈ​ຕໍ່​ບັນ­ດາ​ຄະ­ນະ​ຜູ້​ແທນ​ທີ່​ໃຫ້­ການ ປະ­ກອບ­ສ່ວນ ແລະ ສະ­ໜັບ­ສະ­ໜູນ​ໃນ​ການ​ຜັນ​ຂະ­ຫຍາຍ​ຄຳ​ໝາຍ​ໝັ້ນ​ຂອງ​ຂະແໜງ­ການ​ສະ­ຫວັດ­ດີ​ການ​ສັງ­ຄົມ ແລະ ການ​ພັດ ­ທະ­ນາ ອາ​ຊຽນ ທີ່​ໄດ້​ເອົາ­ໃຈ­ໃສ່​ຮ່ວມ​ມື​ຢ່າງ​ໃກ້­ຊິດ ເພື່ອ​ພ້ອມ​ກັນ​ແກ້​ໄຂ​ບັນ­ຫາ​ສັງ­ຄົມ, ການ​ປົກ​ປ້ອງ ແລະ ສົ່ງ­ເສີມ​ສິດ­ທິ​ມະ­ນຸດ ໂດຍ​ສະ­ເພາະ​ແມ່ນ​ເດັກ­ນ້ອຍ, ຜູ້​ອາ­ຍຸສູງ, ຄົນ​ພິ­ການ ແລະ ກຸ່ມ​ຄົນ​ທີ່​ດ້ອຍ​ໂອ­ກາດ​ຕ່າງໆ​ໃນ​ອາ​ຊຽນ ເພື່ອ​ຫຼຸດ­ຜ່ອນ​ສິ່ງ​ກີດ­ຂວາງ ແລະ ການ​ເຂົ້າ​ເຖິງ​ການ​ບໍ­ລິ­ການ​ຕ່າງໆ​ທີ່​ເທົ່າ​ທຽມ​ກັນ ແລະ ນຳ­ໄປ​ຈັດ​ຕັ້ງ​ປະ­ຕິ­ບັດ ໃຫ້​ໄດ້​ຮັບ​ໝາກ­ຜົນ​ສູງ​ກວ່າ​ເກົ່າ.

Medialaos Massmedia