ກອງປະຊຸມພາກພຶ້ນອາຊີປາຊີຟິກ ແລະ ກອງປະຊຸມຄະນະເລຂາຂອງຄະນະສັນຕິພາບໂລກ ໄດ້ຈັດຂຶ້ນ ໃນວັນທີ 24 ຫາ 26 ພະຈິກ 2019 ທີ່ນະຄອນຫຼວງວຽງຈັນ ສປປ ລາວ ເຊິ່ງເປັນກຽດເຂົ້າຮ່ວມກ່າວເປີດກອງປະຊຸມໂດຍ ທ່ານ ສົມພັນ ແພງຄຳມີ ຮອງປະທານສະພາແຫ່ງຊາດ ປະທານຄະນະສັນຕິພາບ ແລະ ສາມັກຄີລາວ. ທ່ານ ນາງ ໂຊໂກໂລ ໂກເມສ (Socoro Gomez) ປະທານສະພາສັນຕິພາບ, ບັນດາທ່ານປະທານ, ຮອງປະທານ, ເລຂາທິການຂອງອົງການຈັດຕັ້ງສັນຕິພາບພາກພື້ນເຂົ້າຮ່ວມທັງໝົດ 30 ກວ່າທ່ານ ຈາກອົງການຈັດຕັ້ງສັນຕິພາບ 18 ປະເທດ.

ໃນກອງປະຊຸມຄັ້ງນີ້ຜູ້ເຂົ້າຮ່ວມຈະໄດ້ພ້ອມກັນປຶກສາຫາລືຢ່າງກົງໄປກົງມາ ແລະ ຮ່ວມກັນຕີລາຄາຢ່າງຮອບດ້ານ ກ່ຽວກັບສະພາບການພາກພື້ນ ແລະ ສາກົນທີ່ພວມຜັນແປໄປຢ່າງໄວວ່ອງໄວ,ສັບສົນ,ຄາດເດົາໄດ້ຍາກ ເຊິ່ງພວມເປັນສິ່ງທ້າທາຍອັນໃຫຍ່ຫຼວງໃຫ້ແກ່ຂະບວນການສັນຕິພາບໃນພາກພື້ນຕ່າງໆ ຂອງໂລກພວກເຮົາ.ພ້ອມດຽວກັນນັ້ນ ກອງປະຊຸມຈະໄດ້ທົບທວນຄືນການເຄື່ອນໄຫວຂອງສະພາສັນຕິພາບກໍຄືອົງການຈັດຕັ້ງສັນຕິພາບໃນພາກພື້ນ ແລະປຶກສາຫາລືກ່ຽວກັບກົນໄກ ແລະ ຮູບການການຮ່ວມມືໃນການເຄື່ອນໄຫວວຽກງານສັນຕິພາບໃນປີຕໍ່ໜ້າ ເພື່ອປະກອບສ່ວນເສີມສ້າງສັນຕິພາບ,ຄວາມໝັ້ນຄົງໃນພາກພື້ນ ແລະ ສາກົນ.

( ສ່ວນເນື້່ອໃນລາຍລະອຽດເພີ່ມເຕີມ ທ່ານສາມາດຕິດຕາມຂ່າວ ນຳຂ່າວສານປະເທດລາວ, ວິທະຍຸກະຈາຍສຽງແຫ່ງຊາດ, ໂທລະພາບແຫ່ງຊາດ, ໜັງສືພິມປະຊາຊົນ, ໜັງສືພິມພາສາຕ່າງປະເທດ ແລະ ສື່ ທາງການ).