ໃນຕອນເຊົ້າຂອງວັນທີ 25 ພະຈິກ 2019, ທີ່ສະໂມສອນ ຫ້ອງວ່າການແຂວງ ໄຊຍະບູລີ ໄດ້ຈັດພິທີເຜີຍແຜ່ ຄໍາສັ່ງເລກທີ 064/ກມສພ, ລົງວັນທີ 9 ເມສາ 2019, ວ່າດ້ວຍວຽກງານຂະຫຍາຍພັກ, ເຂົ້າຮ່ວມເປັນກຽດ ແລະ ເຜີຍແຜ່ໂດຍ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ໄຊຍະບູລີ, ບາງຕອນສະຫາຍໄດ້ກ່າວວ່າ: ວຽກງານຂະຫຍາຍພັກເປັນວຽກງານທີ່ສໍາຄັນ ແລະ ເປັນຍຸດທະສາດຂອງພັກ, ຜ່ານມາຄະນະພັກແຕ່ລະຂັ້ນໄດ້ເອົາໃຈໃສ່ຄົ້ນຄົ້ວ, ເຊື່ອມຊືມ, ກໍາແໜ້ນ ແລະ ໄດ້ຊີ້ນໍາ-ນໍາພາຮາກຖານພັກທີ່ຢູ່ໃນຄວາມຮັບຜິດຊອບ, ໂດຍຖືເອົາວຽກງານຂະຫຍາຍພັກຕິດພັນກັບການປັບປຸງພັກ, ຍົກສູງຄຸນນະພາບ ແລະ ຄວາມສາມາດນໍາພາຂອງການຈັດຕັ້ງຮາກຖານພັກ ແລະ ສະມາຊິກພັກ, ເຮັດໃຫ້ການຂະຫຍາຍສະມາຊິກພັກໃນທົ່ວປະເທດ, ເວົ້າລວມ, ເວົ້າສະເພາະແມ່ນທົ່ວແຂວງ ໄຊຍະບູລີ ເພີ່ມຂຶ້ນທາງດ້ານປະລິມານ ແລະ ຄຸນນະພາບ, ສະຫາຍ ພົງສະຫວັນ ສິດທະວົງ ຍັງໄດ້ກ່າວອີກວ່າ:

ການເຜີຍແຜ່ຄໍາສັ່ງຄັ້ງນີ້ໂດຍມີຈຸດປະສົງເພື່ອເຮັດໃຫ້ສໍານັກງານ-ອົງການ, ກໍາລັງປະກອບອາວຸດ, ໂຮງຮຽນ, ໂຮງໝໍ, ວິສາຫະກິດ ແລະ ບ້ານ ໃຫ້ມີສະມາຊິກພັກ, ມີໜ່ວຍພັກນໍາພາຢ່າງຖົ່ວເຖິງ, ແນໃສ່ເພີ່ມທະວີບົດບາດ, ຄວາມສາມາດຂອງພັກໃຫ້ສູງຂຶ້ນ, ນໍາພາຈັດຕັ້ງປະຕິບັດໜ້າທີ່ການເມືອງຂອງໜ່ວຍພັກ, ສະມາຊິກພັກໃຫ້ມີຜົນສໍາເລັດ ແລະ ມີປະສິດທິພາບສູງຂຶ້ນ, ຈາກນັ້ນ ສະຫາຍ ດວງຕາ ໄຊວຸດ ຄະນະປະຈໍາພັກແຂວງ, ຫົວໜ້າຄະນະຈັດຕັ້ງແຂວງ ໄດ້ຂຶ້ນຜ່ານບົດສະຫຼຸບການຈັດຕັງປະຕິບັດກົດລະບຽບພັກ ສະໄໝທີ X ທົ່ວອົງຄະນະພັກແຂວງ ໄຊຍະບູລີ, ບາງຕອນສະຫາຍໄດ້ກ່າວວ່າ: ວຽກງານຂະຫຍາຍພັກຢູ່ແຂວງ ໄຊຍະບູລີ ແມ່ນໄດ້ເຄື່ອນໄຫວຈັດຕັ້ງປະຕິບັດພາລະບົດ, ສິດ, ໜ້າທີ່ ຂອງຄະນະພັກແຕ່ລະຂັ້ນ, ຊຶ່ງຮອດປີ 2020 ສູ້ຊົນລືບລ້າງໜ່ວຍພັກດຽວນໍາພາຫຼາຍຫ້ອງການ, ອົງການໃຫ້ໄດ້ 140 ໜ່ວຍພັກ, ມາຮອດປະຈຸບັນ ລືບລ້າງໜ່ວຍພັກດຽວນໍາພາຫຼາຍຫ້ອງການດ້ວຍການສ້າງຕັ້ງໜ່ວຍພັກໃໝ່ຂຶ້ນ ຈໍານວນ 163 ໜ່ວຍພັກ, ສ້າງໜ່ວຍພັກເຂັ້ມແຂງ-ຮູ້ນໍາພາຮອບດ້ານໄດ້ 826 ໜ່ວຍ, ເທົ່າກັບ 68%, ປະເພດແຂງ 296 ໜ່ວຍ, ເທົ່າກັບ 24,35%, ປະເພດກາງ 92 ໜ່ວຍ, ເທົ່າກັບ 7,57%, ອ່ອນ 1 ໜ່ວຍ, ເທົ່າກັບ 0,08%, ບໍ່ໄດ້ແບ່ງ 41 ໜ່ວຍ ( ຍ້ອນຂະຫຍາຍໃໝ່ ), ໃນພິທີດັ່ງກ່າວຍັງໄດ້ຮັບຟັງ ແລະ ເຊື່ອມຊືມ ຄໍາແນະນໍາ ເລກທີ 13/ອກ-ບຄ, ລົງວັນທີ 29 ຕຸລາ 2019, ກ່ຽວກັບການສະຫຼຸບຕີລາຄາການຈັດຕັ້ງກົດລະບຽບພັກ ສະໄໝທີ X ໃນທົ່ວອົງຄະນະພັກຕົນ, ຄໍາແນະນໍາຂອງຄະນະຈັດຕັ້ງສູນກາງພັກ ເລກທີ 201/ຄຈສພ, ລົງວັນທີ 29 ຕຸລາ 2019, ກ່ຽວກັບການຈັດຕັງປະຕິບັດຄໍາສັ່ງກົມການເມືອງສູນກາງພັກ ວ່າດ້ວຍວຽກງານຂະຫຍາຍພັກ, ເຂົ້າຮ່ວມຮັບຟັງມີ ບັນດາຄະນະປະຈໍາພັກແຂວງ, ກໍາມະການພັກແຂວງ, ຄະນະປະຈໍາພັກເມືອງ, ກໍາມະການພັກເມືອງ 11 ເມືອງ, ມີຄະນະພັກຮາກຖານ, ເລຂາໜ່ວຍພັກແຕ່ລະພະແນກການ ແລະ ລັດວິ ສາຫະກິດເຂົ້າຮ່ວມຮັບຟັງ 100 ກວ່າສະຫາຍ.

ຂ່າວ-ພາບ: ນັກຂ່າວຫ້ອງວ່າການແຂວງ ໄຊຍະບູລີ
ໂດດຍ: ອຸ່ນເຮືອນ ໂພທິລັກ
ໂທ: 2212 6933