ປະຕິບັດຕາມທິດນຳວຽກງານ 3 ສ້າງ ແລະ ມາດຕາການສ້າງສ້າງແຂວງ ເປັນຫົວໜ່ວຍຍຸດທະສາດ, ສ້າງເມືອງ ເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດນາ ໃຫ້ເຂົ້າສູ່ລວງເລີກກວ້າງຂວາງ ແລະ ປະກົດຜົນເປັນຈິງ ຕາມຄວາມພະຍາຍາມຂອງພັກ-ລັດຖະບານໃນການວາງຄາດໝາຍແກ້ໄຂຄວາມທຸກຍາກຂອງປະຊາຊົນຫຼຸດພົ້ນອອກຈາກຄວາມດ້ວຍພັດທະນາເທື່ອລະກ້າວນັ້ນ.

ໃນກອງປະຊຸມ ສະຫລຸບວຽກງານ 3 ສ້າງທົ່ວແຂວງ ອັດຕະປື ທີ່ພະແນກພາຍໃນແຂວງເປີດຂຶ້ນ ລະຫວ່າງວັນທີ 27- 28 ພະຈິກ 2019 ໂດຍມີ ຄະນະນຳຈາກພະແນກການກ່ຽວຂ້ອງຂັ້ນແຂວງ ແລະ ພະນັກງານການນຳຫັນລົງກໍ່ສ້າງຮາກຮາກຖານເຂົ້າຮ່ວມນັ້ນ, ໃນບົດສະຫຼຸບສັງເກດຕີລາວຽກງານ 3 ສ້າງ ຕະຫລອດໄລຍະຜ່ານມາໄດ້ມີຫຼາຍບັນຫາທີ່ກໍ່ພາໃຫ້ເກີດຄວາມຫຍຸ້ງຍາກ ສັບສົນ ແຕ່ດ້ວຍຄວາມຕັດສິນໃຈ ຕັ້ງໜ້າບຸກບືນສູ້ຊົນ ຂອງບັນດາສະມາຊິກພັກ, ພະນັກງານ-ລັດຖະກອນ ໃນທົ່ວແຂວງ ອັດຕະປື ຈຶ່ງສາມາດຍາດໄດ້ຜົນສຳເລັດ ເປັນພຽງບາງດ້ານທີ່ພົ້ນເດັ່ນ ແຕ່ຄຽງຄູ່ກັນນັ້ນ ຍັງເຫັນວ່າວຽກງານ 3 ສ້າງຍັງມີຈຸດອ່ອນ ແລະ ຂໍ້ຄົງຄ້າງຈຳນວນຫລາຍ ທີ່ພວກເຮົາຈະຕ້ອງໄດ້ຖອດຖອນບົດຮຽນ ແລະ ພ້ອມກັນສືບຕໍ່ແກ້ໄຂໃນຕໍ່ໜ້າ ໃຫ້ປະສົບຜົນສຳເລັດ ຕາມຄາດໝາຍທີ່ວາງໄວ້ ດັ່ງທີ່ກອງປະຊຸມກໍ່ໄດ້ມີບັນດາການນຳຂອງແຂວງໄດ້ພ້ອມກັນປະກອບຄຳຄິດຄຳເຫັນ ເພື່ອຊອກຫາທາງອອກໃນປີຕໍ່ໄປໃຫ້ໄດ້ຮັບຜົນດີຂຶ້ນກວ່າເກົ່າແລ້ວ.

ທ່ານ ເລັດ ໄຊຍະພອນ ເລຂາພັກແຂວງ ອັດຕະປື ໄດ້ຍົກໃຫ້ເຫັນວ່າ: ຜ່ານການປະກອບຄຳຄິດຄຳເຫັນ ຂອງຜູ້ແທນກອງປະຊຸມໃນຄັ້ງນີ້ ແມ່ນເຫັນດີເປັນເອກະພາບ ຕໍ່ການສະຫລຸບຕີລາຄາສະພາບການເຄື່ອນໄຫວ ວຽກງານ 3 ສ້າງ ໃນໄລຍະຜ່ານມາ ເພື່ອໃຫ້ກ້າວເຂົ້າສູ່ລວງເລິກ ເຮັດໃຫ້ການຈັດຕັ້ງ ຜັນຂະຫຍາຍເນື້ອໃນຈິດໃຈ ຂອງວຽກງານ 3 ສ້າງ ລົງສູ່ຮາກຖານທ້ອງຖິ່ນຕາມທິດນຳຂອງຂັ້ນເທິງໄດ້ວາງໄວ້ ສຳລັບຢູ່ແຂວງຕົນໃນສາມເມືອງ ແລະ 6 ບ້ານເປົ້າໝາຍເຮັດທົດລອງ 3 ສ້າງນັ້ນ ເຫັນວ່າໄດ້ມີການພັດທະນາດີຂຶ້ນ.

ຖ້າທຽບໃສ່ເມື່ອກ່ອນທີ່ບໍ່ທັນໄດ້ຈັດຕັ້ງປະຕິບັດ, ບັນດາບ້ານດັ່ງກ່າວ ສາມາດສ້າງໄດ້ບ້ານພັດທະນາ, ບ້ານປອດຄະດີ, ບ້ານສາມສະອາດ. ປະຊາຊົນມີຄວາມກະຕືລືລົ້ນເປັນເຈົ້າການເຂົ້າຮ່ວມ ການພັດທະນາເສດຖະກິດ-ສັງຄົມ ເນື່ອງຈາກໄດ້ຮັບຜົນປະໂຫຍດຕົວຈິງຈາກ 3 ສ້າງເປັນຕົ້ນຜົນປະໂຫຍດຈາກລົງທຶນຂອງລັດ ເຂົ້າໃນການພັດທະນາດ້ານຕ່າງໆໂດຍສະເພາະແມ່ນຖະໜົນຫົນທາງ, ໄຟຟ້າ, ສຸກສາລາ ໂຮງຮຽນ ແລະ ອື່ນໆ. ທ່ານ ຍັງກ່າວຕື່ມວ່າ: ການຈັດຕັ້ງປະຕິບັດວຽກງານທົດລອງ 3 ສ້າງໄດ້ເຮັດໃຫ້ປະຊາຊົນມີການພັດທະນາທາງດ້ານວັດຖຸ ແລະ ຈິດໃຈ, ແຕ່ໃນນັ້ນຕ້ອງໄດ້ມີການກຳນົດແຜນການ ໂຄງການຢ່າງລະອຽດ ເພາະຢູ່ບ້ານທົດລອງ 3 ສ້າງ ມີຄວາມຕ້ອງການການພັດທະນາ ຫລາຍດ້ານ.ດັ່ງນັ້ນ, ຕ້ອງກຳນົດວຽກວ່າໂຕໃດຄວນເຮັດກ່ອນ ແລະ ໂຕໃດຄວນເຮັດນຳຫລັງ ເພື່ອເຮັດໃຫ້ການຈັດຕັ້ງປະຕິບັດງານດັ່ງກ່າວ ປະສົບຜົນສຳເລັດຕາມທີ່ກຳນົດໄວ້.

ຮອດປີ 2019 ທົ່ວແຂວງ ອັດຕະປື ມີ 3 ເມືອງທົດລອງສາມສ້າງ ຄື: ເມືອງ ສາມັກຄີໄຊ ມີບ້ານ ໃຫຍ່ເຊກະໜາມ ແລະ ບ້ານ ໃຫຍ່ໝື່ນຫົວເມືອງ; ເມືອງໄຊເສດຖາ ມີບ້ານ ສະເເຄ້ະ ແລະ ບ້ານ ວັດຫຼວງ ແລະ ເມືອງ ສະໜາມໄຊ ມີບ້ານແທ ແລະ ຫີນລາດ.

Medialaos