28 ພະຈິກນີ້, ກອງປະຊຸມໃຫຍ່ ຄັ້ງທີ VIII ຂອງຜູ້ແທນອົງຄະນະພັກເມືອງວາປີ ແຂວງສາລະວັນ ໄຂຂື້ນຢ່າງເປັນທາງການ, ຢູ່ສະໂມສອນເມືອງ, ໂດຍການເຂົ້າຮ່ວມຂອງ ສະຫາຍ ສີສຸວັນ ວົງຈອມສີ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງສາລະວັນ, ພາຍໃຕ້ການເປັນປະທານຂອງ ສະຫາຍ ບຸນຍູ້ ຈັນທະລັງສີ ຮັກສາການເລຂາພັກເມືອງ ຮັກສາການເຈົ້າເມືອງໆວາປີ, ມີ ທ່ານ ບຸນທຽມ ແກ້ວໄຊຍະວົງ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ, ມີກຳມະການພັກແຂວງ, ຄະນະປະຈຳພັກ-ກຳມະການພັກເມືອງ ແລະ ຜູ້ແທນກອງປະຊຸມໃຫຍ່ ຈຳນວນ 117 ສະຫາຍ, ຍິງ 6 ສະຫາຍ ທີ່ເປັນຕົວແທນໃຫ້ສະມາຊິກພັກໃນທົ່ວເມືອງທັງໝົດ 1.293 ສະຫາຍ ແລະມີບັນດາແຂກຖືກເຊີນຈາກເມືອງອ້ອມຂ້າງແຂວງ ແລະ ເມືອງທ່າປາງທອງ ແຂວງສະຫວັນນະເຂດ ຕະຫຼອດຮອດພະນັກງານອາວຸໂສບຳນານ, ແຂກຖືກເຊີນ ເຂົ້າຮ່ວມ.

ກອງປະຊຸມໃຫຍ່ ຄັ້ງທີ VIII ຂອງຜູ່ແທນອົງຄະນະພັກເມືອງວາປີ ແຂວງສາລະວັນ

ກອງປະຊຸມຄັ້ງນີ້ ໄດ້ຜ່ານບົດລາຍງານການເມືອງ, ບົດລາຍງານແຜນພັດທະນາເສດຖະກິດສັງຄົມ 5 ປີ 2015 – 2019, ພ້ອມທັງຈະໄດ້ມີການປະກອບຄຳຄິດເຫັນບັນດາເມືອງຕ່າງໆທີ່ເຂົ້າຮ່ວມ ແລະ ຄອບຄົວຕົວແບບໃນການຜະລິດ, ຕົວແບບບ້ານປ້ອງກັນຄວາມສະຫງົບດີ, ຕາງໜ້າຕົວແບບຕ່າງໆ, ນອກນັ້ນຍັງຈະໄດ້ຜ່ານບົດສຳຫຼວດການນຳພາລວມຂອງຄະນະບໍລິຫານງານພັກເມືອງ ຊຸດເກົ່າ ພ້ອມທັງກ່າວລາໜ້າທີ່ ແລະ ຈະໄດ້ຜ່ານມາດຖານ, ເງື່ອນໄຂຜູ້ສະໝັກຮັບເລືອກຕັ້ງ, ພ້ອມທັງຈະໄດ້ດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງ ຊຸດທີ VIII. ກອງປະຊຸມຈະໄດ້ດຳເນີນໄປເປັນເວລາ 2 ວັນ ນັບແຕ່ວັນທີ 28 – 29 ພະຈິກ 2019.

ກອງປະຊຸມໃຫຍ່ ຄັ້ງທີ VIII ຂອງຜູ່ແທນອົງຄະນະພັກເມືອງວາປີ ແຂວງສາລະວັນ

Medialaos