ໃນຕອນເຊົ້າວັນທີ 28 ພະຈິກ 2019 ນີ້. ການນຳແຂວງສະຫວັນນະເຂດ ໄດ້ເຂົ້າວາງພວງມາລາ,ກະຕ່າດອກໄມ້ ແລະ ດອກໄມ້ສົດ ທີ່ອະນຸສາວະລີນັກຮົບນີລະນາມ,ອະນຸສາວະລີ ປະທານ ໄກສອນ ພົມວິຫານ,ອະນຸສາວະລີ ທ່ານ ໜູຮັກ ພູມສະຫວັນ ແລະ ອະນຸສາວະລີ ທ່ານ ພູນ ສີປະເສີດ ເນື່ອງໃນໂອກາດວັນຊາດທີ 2 ທັນວາ ຄົບຮອບ 44 ປີ ,ໂດຍມີກ້ອນກໍາລັງຕ່າງໆເຂົ້າວາງພວງມາລາ ບໍ່ວ່າຈະເປັນ,ກ້ອນກຳລັງການນຳຂອງແຂວງ

ເຊິ່ງນໍາພາໂດຍທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດພ້ອມຄະນະ, ກ້ອນກໍາລັງ ກົງສູນໃຫຍ່ແຫ່ງລາຊະອານາຈັກໄທ ປະຈຳແຂວງສະຫວັນນະເຂດ, ຄະນະສະມາຊິກສະພາແຫ່ງຊາດຈໍາເຂດເລືອກຕັ້ງທີ 13 ແລະ ສະພາປະຊາຊົນແຂວງ, ກອງບັນຊາການ ປກສ, ກອງບັນຊາການ ປກຊ, ຂົງເຂດເສດຖະກິດ, ຂົງເຂດຕຸລາການ, ສະພາອຸດສະຫະກຳການຄ້າ, ອົງການຈັດຕັ້ງມະຫາຊົນ, ຄະນະພັກ-ຄະນະການນຳນະຄອນໄກສອນພົມວິຫານ, ຊາວໜຸ່ມ-ເຍົາວະຊົນ, ສະຖາບັນການສຶກສາແຫ່ງຕ່າງໆພາຍໃນເທດສະບານນະຄອນໄກສອນ ພົມວິຫານ ແລະ ພາກສ່ວນອື່ນໆລວມທັງໝົດ 21 ກ້ອນກຳລັງເຂົ້າຮ່ວມ.

ທ່ານ ລັດຕະນະ ທິບພະໄກສອນ ຮອງຫົວໜ້າຄະນະຮັບຜິດຊອບ ອະນຸສອນສະຖານ ກໍ່ໄດ້ກ່າວບົດສະດຸດີເນື່ອງໃນໂອກາດ ວັນຊາດທີ 2 ທັນວາ ຄົບຮອບ 44 ປີ ( 2 ທັນວາ 1975 – 2 ທັນວາ 2019) ເຊິ່ງແມ່ນວັນສະຖາປານາ ສາທາລະນະລັດ ປະຊາທິປະໄຕ ປະຊາຊົນລາວ ທີ່ໄດ້ໝູນວຽນມາບັນຈົບຄົບຮອບອີກວາລະໜຶ່ງ ດັ່ງນັ້ນ ການນຳຂອງແຂວງ ເຊິ່ງນຳໂດຍ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ໄດ້ນຳພາກ້ອນກຳລັງຈາກພາກສ່ວນຕ່າງໆອ້ອມຂ້າງ ແຂວງສະຫວັນນະເຂດ ເຂົ້າວາງພວງມາລາ,ກະຕ່າດອກ ແລະ ດອກໄມ້ ເພື່ອ ລະນຶກເຖິງບຸນຄຸນ, ຄຸນງາມຄວາມດີ, ນ້ຳໃຈຕໍ່ສູ້ພິລາດອາດຫານ ແລະ ບໍຍອມຈຳນົນຂອງບັນດານັກຮົບປະຕິວັດທີ່ເສຍສະຫຼະຊີວິດ, ເລືອດເນື້ອ, ເຫຼື່ອແຮງເພື່ອພາລະກິດປະຕິວັດຢ່າງອົງອາດກ້າຫານພາຍໃຕ້ການຊີ້ນຳ-ນຳພາຂອງພັກປະຊາຊົນປະຕິວັດ.

ຈາກນັ້ນການນຳຂອງແຂວງກໍ່ໄດ້ນຳພາກ້ອນກຳລັງ ແຕ່ລະພາກສ່ວນເຂົ້າວາງກະຕ່າດອກໄມ້ ແລະ ດອກໄມ້ສົດ ທີ່ອະນຸສາວະລີ ທ່ານ ໜູຮັກ ພູມສະຫວັນ ແລະ ອະນຸສາວະລີ ທ່ານ ພູນ ສີປະເສີດ ຕື່ມອີກ.