ໃນຕອນເຊົ້າຂອງວັນທີ່ 28 ພະຈີກ 2019 ຢູ່ທີ່ສະໂມສອນໃຫຍ່ຂອງເມືອງບຸນເໜືອ, ແຂວງຜົ້ງສາລີ ເປີດກອງປະຊຸມໃຫຍ່ຜູ້ແທນອົງຄະນະພັກເມືອງບຸນເໜືອ ຄັ້ງທີ VIII ຂື້ນຢ່າງເປັນທາງການ. ໂດຍພາຍໃຕ້ການເປັນປະທານຂອງສະຫາຍ ພອນໄຊ ແກ້ວສົມພັນ ກຳມະການພັກແຂວງ, ເລຂາຄະນະບໍລິຫານງານພັກເມືອງ, ເຈົ້າເມືອງໆບູນເໜືອ.

ເປັນກຽດເຂົ້າຮ່ວມຂອງສະຫາຍ ຄຳຜອຍ ວັນນະສານ ຮັກສາການເລຂາພັກແຂວງ, ຮັກສາການເຈົ້າແຂວງໆຜົ້ງສາລີ, ມີສະຫາຍ ສັນຕິ ແກ້ວຍະສານ ກຳມະການປະຈຳພັກແຂວງ, ຫົວໜ້າຄະນະຈັດຕັ້ງແຂວງ, ມີຜູ່ຕ່າງໜ້າຈາກຄະນະຈັດຕັ້ງສູນກາງພັກ, ຄະນະຈັດຕັ້ງແຂວງ – ກວດກາແຂວງ, ບັນດາສະຫາຍກຳມະການປະຈຳພັກແຂວງ, ກຳມະການພັກແຂວງ, ຮອງເລຂາພັກເມືອງ, ກຳມະການປະຈຳພັກເມືອງ, ກຳມະການພັກເມືອງ, ເຈົ້າເມືອງຈາກ 6 ເມືອງ, ພະນັກງານປະຕິວັດອາວຸໂສບຳນານ, ອະດິດການນຳເມືອງ, ມີຜູ້ແທນສົມບູນເຂົ້າຮ່ວມທັງໝົດ 179 ສະຫາຍ, ຍີງ 32 ສະຫາຍ, ທີ່ເປັນຕົວແທນໃຫ້ແກ່ສະມາຊີກພັກ, ທີ່ມາຈາກຄະນະພັກຮາກຖານ ແລະ ໝ່ວຍພັກທົ່ວເມືອງບູນເໝືອທັງໝົດ 1.344 ສະຫາຍ.

ໃນກອງປະຊຸມສະຫາຍ ພອນໄຊ ແກ້ວສົມພັນ ກຳມະການພັກແຂວງ, ເລຂາພັກເມືອງ, ເຈົ້າເມືອງໆບູນເໜືອ ກໍ່ໄດ້ຂື້ນກ່າວໄຂກອງປະຊຸມຢ່າງເປັນທາງການ ເຊີ່ງທ່ານບາງຕອນໄດ້ກ່າວວ່າ: ພາຍໃຕ້ການຊີ້ນຳຈາກຄະນະບໍລິຫານງານພັກແຂວງ ແລະ ການນຳພາຂອງຄະນະບໍລິຫານງານພັກເມືອງໃນການຈັດຕັ້ງປະຕິບັດມະຕິກອງປະຊຸມໃຫຍ່ຂອງພັກຂັ້ນຕ່າງໆ ໂດຍສະເພາະແມ່ນ ມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກເມືອງບູນເໜືອ ຕະຫຼອດໄລຍະ 5 ປີຜ່ານມາເຫັນວ່າມີຜົນສໍາເລັດຫຼາຍດ້ານ ເປັນຕົ້ນ ທົ່ວເມືອງບູນເໜືອ ແມ່ນມີສະຖຽນລະພາບທາງດ້ານການເມືອງອັນໜັກແໜ້ນ, ທົ່ວສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ, ເສດຖະກິດ-ສັງຄົມ ມີການພັດທະນາດ້ວຍບາດກ້າວ ແລະ ທ່ວງທ່າໃໝ່, ປະຊາຊົນບັນດາເຜົ່າມີຄວາມສາມັກຄີປອງດອງ, ພື້ນຖານໂຄງລ່າງຂອງເມືອງກໍ່ໄດ້ຮັບການປັບປຸງ, ຊີວິດການເປັນຢູ່ຂອງປະຊາຊົນກໍ່ໄດ້ຮັບການປັບປຸງດີຂື້ນເປັນກ້າວໆ, ອັດຕາສ່ວນຄວາມທຸກຍາກໄດ້ຫຼຸດໜ້ອຍຖອຍລົງເທື່ອລະກ້າວ.

ເຊີ່ງສະແດງອອກດ້ານເສດຖະກິດມີການຂະຫຍາຍຕົວ 11,39 % ຕໍ່ປີ, ລື້ນແຜນການ 3,55%, ໃນນັ້ນກະສີກຳ – ປ່າໄມ້ ກວມເອົາ 56,90%, ອຸດສະຫະກຳ – ຫັດຖະກຳ ກວມເອົາ 16,94%, ການບໍລີິການກວມເອົາ 26,16%, ເຮັດໃຫ້ໂຄງປະກອບເສດຖະກິດມີການປ່ຽນແປງ, ລວມຍອດມູນຄ່າຜົນຜະລີດໃນປີ 2019 ບັນລຸໄດ້ 334,9 ຕື້ກີບ, ສະເລ່ຍໃສ່ຫົວຄົນໄດ້ 13ລ້ານ 4 ແສນກີບ.

ກອງປະຊຸມໃຫຍ່ຄັ້ງທີ VIII ຂອງຄະນະບໍລິຫານງານພັກເມືອງ ບູນເໜືອຄັ້ງນີ້ ຜູ້ແທນທີ່ເຂົ້າຮ່ວມຈະໄດ້ພ້ອມກັນຄົ້ນຄ້ວາ,ປະກອບຄໍາເຫັນໃສ່ຮ່າງບົດລາຍງານການເມືອງ, ແຜນພັດທະນາ ເສດຖະກິດ – ສັງຄົມ 5, ທົບທວນຕີລາຄາຄືນກ່ຽວກັບການຈັດຕັ້ງປະຕິບັດແນວທາງການປ່ຽນແປງໃໝ່ທີ່ມີຫຼັກການຂອງພັກກໍ່ຄືການຈັດຕັ້ງປະຕິບັດເນື້ອໃນຈິດໃຈມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກເມືອງ, ກຳນົດທິດທາງໜ້າທີ່ແຕ່ນີ້ຮອດປີ 2024. ພ້ອມທັງເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່.
ກອງປະຊຸມໃຫຍ່ຜູ້ແທນອົງຄະນະພັກເມືອງບູນເໜືອຄັ້ງທີ VIII ດຳເນີນເປັນເວລາ 2 ວັນ ຮອດວັນທີ 29 ພະຈິກຈິ່ງສຳເລັດ.

Medialaos