ຄະນະພັກ, ຄະນະນໍາຂອງກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ພົບປະ, ຮັບຟັງ ແລະ ແລກປ່ຽນຄໍາເຫັນກັບພະນັກງານປະຕິວັດອາໂສບໍານານ ເຊິ່ງໄດ້ຈັດຂຶ້ນໃນຕອນເຊົ້າວັນທີ 29 ພະຈິກ 2019 ທີ່ຫໍວັດທະນະທຳແຫ່ງຊາດ ພາຍໃຕ້ການເປັນປະທານ ໂດຍ ທ່ານ ສຈ.ປອ.ກິແກ້ວ ໄຂຄຳພິທູນ ເລຂາທິການສູນກາງພັກ, ເລຂາຄະນະພັກ, ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເຊິ່ງມີບັນດາທ່ານຮອງລັດຖະມົນຕີ, ບັນດາອະດີດການນຳ, ພະນັກງານປະຕິວັດອາວຸໂສບຳນານ ແລະ ພະນັກງານຫຼັກແຫຼ່ງຂອງກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເຂົ້າຮ່ວມ.

ຈຸດປະສົງກອງປະຊຸມຄັ້ງນີ້ກໍແມ່ນເພື່ອລະດົມຄໍາເຫັນ, ແລກປ່ຽນບົດຮຽນກັບພະນັກງານປະຕິວັດອາວຸໂສບໍານານ ທີ່ມີປະສົບການ, ຄວາມຮູ້, ຄວາມສາມາດ, ທີ່ເຄີຍປະຕິບັດວຽກງານໃນໄລຍະຜ່ານມາ; ເພື່ອຟັງຄໍາແນະນໍາ ແລະ ການສະເໜີຂອງພະນັກງານອາວຸໂສບໍານານ ເພື່ອປັບປຸງພັດທະນາວຽກງານໃຫ້ມັນດີຂຶ້ນ, ພ້ອມທັງສືບຕໍ່ພາລະກິດທີ່ປະຕິບັດຜ່ານມາໃຫ້ນັບມື້ດີຂຶ້ນ. ນອກຈາກນີ້, ບັນດາຜູ້ເຂົ້າກອງປະຊຸມປະກອບຄໍາຄິດເຫັນຕໍ່ສະພາບການບ້ານເມືອງ, ຕໍ່ການພັດທະນາວຽກງານກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ການສະເໜີບັນຫາທີ່ຕິດພັນກັບຊີວິດ ແລະ ການເຄື່ອນໄຫວຂອງພະນັກງານບໍານານ.

ບັນດາຜູ້ເຂົ້າຮ່ວມກອງປະຊຸມກໍໄດ້ປະກອບຄໍາເຫັນຕໍ່ກັບສະພາບການເສດຖະກິດ-ສັງຄົມຂອງປະເທດຊາດ ເວົ້າລວມ, ເວົ້າສະເພາະກໍຄືກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຢ່າງກົງໄປກົງມາ ເປັນຕົ້ນຕໍ່ວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ວຽກງານເສນາທິການເຊັ່ນ: ການປະຕິບັດນະໂຍບາຍ, ການນໍາພາການເມືອງແນວຄິດ, ການສົ່ງເສີມການມີສ່ວນຮ່ວມຂອງພະນັກງານອາວຸໂສບໍານານ.

ກອງປະຊຸມຍັງໄດ້ຮັບຟັງການໂອ້ລົມຂອງ ທ່ານ ລັດຖະມົນຕີ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ຕໍ່ກັບບັນຫາຕ່າງໆ ທີ່ພະນັກງານປະຕິວັດອາວຸໂສບໍານານໄດ້ປະກອບຄໍາຄິດຄໍາເຫັນ ດ້ວຍບັນຍາກາດອັນອົບອຸ່ນ ເຕັມໄປດ້ວຍຄວາມໝາຍຄວາມສໍາຄັນຢ່າງເລິກເຊິ່ງ. ທ່ານ ລັດຖະມົນຕີ ໄດ້ຍົກໃຫ້ເຫັນບັນຫາສະພາບການພາຍໃນ, ການປັບປຸງວຽກງານ, ວິທີການແກ້ໄຂບັນຫາຂອງປະເທດພວກເຮົາ,  ແນວທາງ, ນະໂຍບາຍຂອງພັກ-ລັດ ໃນໄລຍະໃໝ່ ແລະ ອຸດົມການຂອງພັກທີ່ຖືກຕ້ອງຂອງພວກເຮົາ. ທ່ານ ຍັງໄດ້ເນັ້ນຕື່ມວ່າ, ພະນັກງານປະຕິວັດອາວຸໂສບໍານານ ພວກເຮົາກໍຍັງແມ່ນຜູ້ທີ່ຍັງມີຄວາມຮັບຜິດຊອບຕໍ່ພັກ-ລັດ ຍັງເປັນແກ່ນສານຢູ່ພື້ນຖານ, ເຂົ້າໃຈ ແລະ ເຊື້ອໝັ້ນຕໍ່ອຸດົມການຂອງພັກ ແລະ ມີສ່ວນຮ່ວມຕິດຕາມຊຸກຍູ້ສົ່ງເສີມການສ້າງສາພັດທະນາດ້ານວຽກງານຕ່າງໆ. ພະນັກງານບໍານານເປັນຜູ້ທີ່ກໍາແໜ້ນແນວທາງ, ນະໂຍບາຍຂອງພັກ-ລັດ ພວກເຮົາ ແລະ ມິສະຕິຕໍ່ກົນ ອຸບາຍຂອງກຸ່ມຄົນບໍ່ຫວັງດີ ໂດຍສະເພາະສືບຕໍ່ແນະນໍາ, ສຶກສາອົບຮົມ, ຕັກເຕືອນຊາວໜຸ່ມເຍົາວະຊົນ, ຍາດພີ່ນ້ອງ, ເພື່ອນມິດສະຫາຍຂອງພວກເຮົາໃຫ້ປະຕິບັດຖືກຕ້ອງຕາມລະບຽບກົດໝາຍ, ແນວທາງ, ນະໂຍບາຍຂອງພັກ-ລັດ ເຮົາ.  

ໃນຕອນທ້າຍກອງປະຊຸມທ່ານລັດຖະມົນຕີ ກໍໄດ້ສະແດງຄວາມຊົມເຊີຍ ແລະ ຮັບເອົາບັນດາຄໍາເຫັນຂອງຜູ້ເຂົ້າຮ່ວມທັງໝົດໄປຄົ້ນຄວ້າຄືນນໍາໝູ່ຄະນະ ເພື່ອປັບປຸງວຽກງານຂອງພວກເຮົາໃຫ້ເກີດດອກອອກຜົນຢ່າງມີປະສິດທິ ພາບຍິ່ງຂຶ້ນ ແລະ ກອງປະຊຸມພົບປະຄັ້ງນີ້ ຖືວ່າເປັນບາດກ້າວໜຶ່ງໃນການຊຸກຍູ້ໃຫ້ແກ່ການກະກຽມດໍາເນີນຂອງກອງປະຊຸມໜ່ວຍພັກ, ຮາກຖານພັກ ເພື່ອກ້າວສູ່ການດໍາເນີນກອງປະຊຸມໃຫຍ່ ອົງຄະນະພັກກະຊວງຖວທ ຄັ້ງທີ V. ເປັນການສ້າງຂະບວນການຂໍ່ານັບຮັບຕ້ອນວັນຊາດທີ 2 ທັນວາ ຄົບຮອບ 44 ປີ.