ວັນທີ 1 ທັນວາ 2019 ນີ້ ເມືອງລະມາມ ແຂວງເຊກອງ ໄດ້ຈັດງານປະເພນີບຸນຊ່ວງເຮືອ ປະຈຳປີ2019 ຢູ່ທີ່ແມ່ນໍ້າເຊກອງ, ເຂົ້າຮ່ວມເປັນກຽດ ມີ #ທ່ານຄໍາເຜີຍ ບຸດດາວຽງ ເຈົ້າແຂວງ-ແຂວງເຊກອງ, ມີທ່ານຫວງຽນຈຽງເຊິນ ຮອງເຈົ້າຄອງນະຄອນຕາມກີ ແຂວງກວາງນາມ ສສ ຫວຽດນາມ, ມີທ່ານຂັນຕີ ສີລະວົງສາ ເຈົ້າເມືອງລະມາມ, ປະທານຊີ້ນໍາຄະນະກໍາມະການຈັດງານບຸນຊ່ວງເຮືອປະຈໍາປີ 2019, ມີຄະນະປະຈຳພັກແຂວງ, ຄະນະນຳຂັ້ນແຂວງ, ຂັ້ນເມືອງ, ຕາງໜ້າພັກ-ລັດຈາກແຂວງຈໍປາສັກ, ສາລະວັນ ແລະອັດຕະປື, ພ້ອມດ້ວຍບັນດານັກທຸລະກິດ, ນັກສີພາຍ3 ແຂວງ ແລະ ປະຊາຊົນພາຍໃນເມືອງ, ຕ່າງເມືອງ, ຕ່າງແຂວງ ແລະຕ່າງປະເທດ ເຂົ້າຮ່ວມຢ່າງຄັບຄາໜາແໜ້ນ.

ທ່ານ ຂັນຕີ ສີລະວົງສາ ເຈົ້າເມືອງລະມາມ ໄດ້ໃຫ້ກຽດຂື້ນກ່າວເປີດງານປະເພນີບຸນຊ່ວງເຮືອ ປະຈຳປີ 2019 ຢ່າງເປັນທາງການ, ເຊິ່ງທ່ານໄດ້ກ່າວວ່າ: ງານບຸນຊວງເຮືອປະເພນີຂອງຊາວແຂວງເຊກອງປະຈຳປີ 2019 ໄດ້ຈັດຂຶ້ນໃນທ່າມກາງບັນຍາກາດທີ່ທົ່ວພັກ-ທົ່ວກຳລັງປະກອບອາວຸດ ແລະ ທົ່ວປວງຊົນບັນດາເຜົ່າກຳລັງເບີກບານມ່ວນຊື່ນຕໍ່ກັບການສະເຫຼີມສະຫຼອງວັນຊາດທີ 2 ທັນວາ ຄົບຮອບ 44 ປີ, ວັນຄ້າຍວັນເກີດຂອງປະທານ ໄກສອນ ພົມວິຫານ ອາດີດຜູ້ນຳທີແສນເຄົາລົບຮັກທັງຊາດຄົບຮອບ 99 ປີ ຕິດພັນກັບສ້າງຂະບວນການຂໍ່ານັບຮັບຕ້ອນກອງປະຊຸມ 3 ຂັ້ນຂອງພັກ ຢ່າງເປັນຂະບວນຟົດຟື້ນ, ປະເພນີຊ່ວງເຮືອ ແມ່ນບຸນປະເພນີອັນໜຶ່ງ ທີ່ເຄີຍຈັດຕັ້ງປະຕິບັດກັນມານັບແຕ່ປີ 1990 ເປັນຕົ້ນມາ ໂດຍໄດ້ກຳນົດເອົາຕົ້ນເດືອນທັນວາ ກ່ອນ ຫຼືຫຼັງວັນຊາດ ຂອງທຸກໆປີ ເປັນມື້ຈັດງານ, ເຊິ່ງໃນປີນີ້ມີເຮືອເຂົ້າຮ່ວມແຂ່ງຂັນທັງໝົດລວມມີ 23 ລຳ, ມີ 27 ຄະນະ, ສີພາຍເພດຍິງ ມີ 4 ຄະນະໃນນັ້ນມີນັກກິລາເຮືອຊ່ວງມາຈາກຕ່າງແຂວງເຂົ້າຮ່ວມແຂ່ງຂັນນຳທັງໝົດ 3 ລຳ ເຊິ່ງມາຈາກແຂວງຈຳປາສັກ,ແຂວງສາລະວັນ ແລະ ແຂວງອັດຕະປື ເປັນນັກກິລາເຮືອຊ່ວງເພດຊາຍ, ໃຊ້ເວລາການແຂ່ງຂັນ 1 ວັນ; ພິເສດຍັງມີການປະກວດເຮືອງາມ (ໃຫຍ່-ນ້ອຍ), ພາຍໃນງານ ຍັງມີຮ້ານວາງສະແດງສີນຄ້າຫັດຖະກຳທີ່ຜະລິດຈາກປະຊາຊົນພາຍໃນເມືອງ, ຜົນຜະລິດກະສິກຳ, ຕະຫຼາດນັດ ແລະອື່ນໆ.

ຜົນການແຂ່ງຂັນ ໃນປີນີ້ ທີມຊະນະເລີດ ເຮືອປະເພນີໃຫຍ່ ຊາຍ ( 35-40 ສີພາຍ ) ແມ່ນຫ້ອງວ່າການແຂວງເຊກອງ, ເຮືອສູດໃຫຍ່ ຊາຍ ( 35-40 ສີພາຍ ) ແມ່ນແຂວງສາລະວັນ ໄດ້ຮັບຂັນເງິນຂອງທ່ານເຈົ້າເມືອງ 1 ໜ່ວຍ, ເງິນສົດ 12 ລ້ານກີບ, ເຮືອປະເພນີ ຊາຍ ( 19-22 ສີພາຍ) ແມ່ນບ້ານໂມ, ເຮືອປະເພນີ ຍິງ ( 19-22 ສີພາຍ) ແມ່ນບ້ານເພຍໃໝ່, ເຮືອເຄິ່ງສູດເຄິ່ງປະເພນີ ຊາຍ ແມ່ນເມືອງລະມາມ, ເຮືອສູດ ຊາຍ ( 19-22 ສີພາຍ) ແມ່ນພະແນກໂຍທາທິການ ແລະຂົນສົ່ງແຂວງເຊກອງ ໄດ້ຮັບຂັນເງິນ 1 ໜ່ວຍ, ເງິນສົດ 10 ລ້ານກີບ; ທີ 2 ເຮືອປະເພນີໃຫຍ່ ຊາຍ ແມ່ນພະແນກກະສິກໍາ ແລະປ່າໄມ້ແຂວງເຊກອງ, ເຮືອສູດໃຫຍ່ ຊາຍ ແມ່ນພະແນກໂຍທາທິການ ແລະຂົນສົ່ງແຂວງເຊກອງ ໄດ້ຮັບເງິນສົດ 10 ລ້ານກີບ, ເຮືອປະເພນີ ຊາຍ ແມ່ນເມືອງທ່າແຕງ, ເຮືອປະເພນີຍິງ ແມ່ນບ້ານໃໝ່ຫົວເມືອງ, ເຮືອເຄິ່ງສູດ ແມ່ນ ປກສ ແຂວງເຊກອງ, ເຮືອສູດ ຊາຍ ແມ່ນຂົງເຂດວັດທະນະທໍາ-ສັງຄົມB ໄດ້ຮັບເງິນສົດ 8 ລ້ານກີບ; ທີ 3 ເຮືອສູດໃຫຍ່ ຊາຍ ແມ່ນແຂວງຈໍາປາສັກ ໄດ້ຮັບເງິນສົດ 10 ລ້ານກີບ, ເຮືອປະເພນີ ຊາຍ ແມ່ນຂົງເຂດປົກປ້ອງກົດໝາຍແຂວງເຊກອງ, ເຮືອປະເພນີ ຍິງ ແມ່ນບ້ານໂມ, ເຮືອເຄິ່ງສູດ ຊາຍ ແມ່ນ ປກຊ ແຂວງເຊກອງ, ເຮືອສູດ ຊາຍ ແມ່ນຂົງເຂດວັດທະນະທໍາ-ສັງຄົມB ໄດ້ຮັບເງິນສົດ 5 ລ້ານກີບ ແລະ ຊະນະເລີດ ເຮືອງາມ (ໃຫຍ່ 35-40 ສີພາຍ) ແມ່ນພະແນກກະສິກໍາ ແລະປ່າໄມ້ແຂວງ, ໄດ້ຮັບເງິນສົດ 1 ລ້ານກີບ, ທີ 2 ເຮືອງາມ(ນ້ອຍ19-22 ສີພາຍ) ແມ່ນບ້ານໂມ ໄດ້ຮັບເງິນສົດ 1 ລ້ານ ກີບແລະ ໄດ້ຮັບລາງວັນຊົມເຊີຍ ມີ 10 ລາງວັນ ລາງວັນລະ 1 ລ້ານກີບ. ໂດຍໃຫ້ກຽດມອບລາງວັນຊະນະເລີດເພດຊາຍ – ເພດຍິງ ໂດຍແມ່ນ ຂັນຕີ ສີລະວົງສາ ເຈົ້າເມືອງ-ລະມາມ.

ຂ່າວ: ພຸດທະສອນ
Medialaos sekong