ເນື່ອງ​ໃນ​ໂອກາດ​ວັນ​ສະ​ຖາ​ປະ​ນາ ສາທາລະນະ​ລັດ ປະຊາທິປະໄຕ ປະຊາຊົນ​ລາວ ຄົບຮອບ 44 ປີ (2/12/1975-2/12/2019) ບັນດາ​ທູຕາ​ນຸ​ທູດ, ອົງການ​ຈັດ​ຕັ້ງ​ສາກົນ​ປະຈຳ ລາວ ໄດ້​ເຂົ້າ​ອວຍພອນ​ທ່ານ​ຜູ້ນຳ​ຂອງ​ລາວ​ເຮົາ ນຳ​ໂດຍ ທ່ານ ບຸນ​ຍັງ ວໍລະ​ຈິດ ປະທານ​ປະເທດ ພ້ອມ​ພັນ​ລະ​ຍາ, ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ພ້ອມ​ພັນ​ລະ​ຍາ, ທ່ານ​ນາງ ປານີ ຢ່າ​ທໍ່​ຕູ້ ປະທານ​ສະພາ​ແຫ່ງ​ຊາດ ພ້ອມ​ດ້ວຍ​ສາມີ, ທ່ານ ພັນ​ຄຳ ວິພາ​ວັນ ຮອງ​ປະທານ​ປະເທດ ພ້ອມ​ດ້ວຍ​ພັນ​ລະ​ຍາ, ທ່ານ ​ສະເຫຼີມ​ໄຊ ກົມ​ມະ​ສິດ ລັດຖະມົນຕີ​ກະຊວງ​ການ​ຕ່າງປະເທດ ພ້ອມ​ດ້ວຍ​ພັນ​ລະ​ຍາ, ທ່ານ​ນາງ ສູນ​ທອນ ໄຊ​ຍະ​ຈັກ ຫົວໜ້າ​ຄະນະ​ພົວພັນ​ຕ່າງປະເທດ​ສູນ​ກາງ​ ພັກ ພ້ອມດ້ວຍທ່ານ​ລັດຖະ ມົນຕີ​ຫົວໜ້າ​ຫ້ອງ​ວ່າການ​ປະທານ​ປະເທດ ໃນ​ຕອນ​ເຊົ້າ​​ວັນທີ 29 ພະຈິກຜ່ານ​ມາທີ່​ທຳ​ນຽບ​ປະທານ​ປະເທດ.

   ໃນ​ໂອກາດ​ດັ່ງກ່າວ ທ່ານ​ນາງ ເບ​ລິນ​ດາ ອັນເຕ, ທູດ​ອາວຸໂສຕາງໜ້າ​ທູຕາ​ນຸ​ທູດ ແລະ ອົງການ​ຈັດ​ຕັ້ງ​ສາກົນ​ປະຈຳລາວ ໄດ້​ຂຶ້ນ​ກ່າວອວຍ ພອນ​ການ​ນຳ​ລາວ​ເຮົາ ວ່າ: ໃນ​ຖານະ​ທູດ​ອາວຸໂສ​ຂໍ​ສົ່ງຄຳ​ຊົມເຊີຍ​ອັນ​ອົບ​ອຸ່ນ​ມາຍັງບັນ​ດາທ່ານ, ລັດຖະບານ ແລະ ປະຊາຊົນ​ລາວ​ ເນື່ອງໃນ​ໂອ ກາດ​ສະເຫຼີມສະຫຼອງ​ວັນ ຊາດ ​ຄົບຮອບ 44 ປີ, ປີ​ນີ້​ເສດຖະກິດ​ຂອງ ສປປ ລາວ ຄາດວ່າ​ຈະ​ໄດ້​ຮັບ​ການ​ຟື້ນ​ຟູເຖິງ​ວ່າ​ຈະ​ຍັງ​ສືບຕໍ່​ມາດ​ຕະການ​ຮັດກຸມ​ທາງ​ດ້ານ​ງົບ ປະມານ ແລະ ຄວາມ​ຜັນ​ຜວນ ​ຂອງ​ເສດຖະກິດໂລກ, ທະ ນາຄານ​ໂລກ​ໄດ້​ລາຍ​ງານ​ໃນ​ຕົ້ນ​ປີ​ນີ້​ວ່າ: ສປປ ລາວ ເປັນ​ໜຶ່ງ​ໃນ​ບັນດາ​ປະເທດ​ທີ່​ມີ​ເສດ ຖະກິດ​ຂະຫຍາຍຕົວ​ໄວ​ທີ່​ສຸດ ໃນ​ອາຊີ​ຕາເວັນ​ອອກ​ ແລະ ປາ​ຊີ​ຟິກ, ໃນຊຸມປີຜ່ານມາ ລັດຖະບານ​ລາວ ໄດ້​ມີ​ຄວາມ​ກ້າວໜ້າ​ໂດຍ​ສະເພາະ​ແມ່ນ​ການ​ລຶບລ້າງ​ຄວາມທຸກ​ຍາກ​ໃຫ້​ໝົດ​ໄປ​ກວ່າ​ເຄິ່ງ​ໜຶ່ງ, ການ​ຫຼຸດຜ່ອນ​ຄວາມ​ອຶດຫິວ ແລະ ກຳລັງ​ປັບປຸງ​ປະສິດທິພາບ​ທາງ​ດ້ານ​ການ​ສຶກສາ ແລະ ສາທາລະນະ​ສຸກ​ທົ່ວ​ປະເທດ, ພວກ​ເຮົາ​ມີ​ຄວາມ​ຍິນດີ​ຕໍ່​ການ​ຕັດສິນ​ໃຈ​ຂອງ​ລັດຖະບານ ແຫ່ງ ສປປ ລາວ ເພື່ອ​ເຮັດ​ໃຫ້ການ​ຄຸ້ມ​ຄອງ​ລັດ ມີ​ຄວາມ​ເຂັ້ມແຂງ ລວມ​ທັງ​ຄວາມ​ພະຍາຍາມ​ຂອງ​ລັດຖະບານ​ໃນ​ການ​ແກ້​ໄຂ​ຄວາມ​ຫຍຸ້ງຍາກ​ທາງ​ດ້ານ​ເສດຖະກິດ​ຂອງ​ປະເທດ ແລະ ຮັກສາ​ການ​ເຕີບ​ໂຕ​ຂອງ​ເສດຖະກິດ ຕໍ່​ສິ່ງ​ທ້າ​ທາຍ​ທັງ​ພາຍ​ໃນ ແລະ ພາຍ​ນອກ, ໃນ​ຖານະ​ຄູ່​ຮ່ວມ​ພັດທະນາ​ຈະ​ຕັ້ງໜ້າ​ຮ່ວມ​ກັບ​ບັນດາ​ທ່ານ​ເພື່ອ​ຈັດ​ຕັ້ງ​ປະຕິບັດ ແລະ ເຮັດ​ໃຫ້​ແຜນ​ດັ່ງກ່າວ​ນີ້​ບັນລຸ​ເປົ້າ​ໝາຍ​ໂດຍ​ການ​ຮັດ​ແໜ້ນ​ສາຍ​ພົວພັນ​ຂອງ​ພວກ​ເຮົາ​ໃຫ້​ເລິກ​ເຊິ່ງ​ກວ່າເກົ່າ, ສຶກສາ​ຊ່ອງ​ທາງ ແລະ ​ການ​ຊຸກຍູ້​ໃຫ້​ມີ​ການ​ພົວພັນ​ທາງ​ດ້ານ​ການ​ຄ້າ ແລະ ການ​ລົງທຶນ​ໃຫ້​ຫຼາຍ​ຂຶ້ນ, ສົ່ງເສີມ​ການ​ພົວພັນ​ຮ່ວມ​ມື​ລະຫວ່າງ​ລັດ​ຕໍ່​ລັດ ປະຊາຊົນ​ກັບ​ປະຊາຊົນ, ລວມ​ທັງ​ສົ່ງເສີມ​ການ​ຮ່ວມ​ມື​ໃນ​ຂອບ​ສອງ​ຝ່າຍ ແລະ ຫຼາຍ​ຝ່າຍນຳ​ອີກ​, ພວກ​ເຮົາ​ເຫັນ​ໄດ້​ເຖິງ​ຄວາມ​ພະຍາຍາມ​ຂອງ​ລັດຖະບານລາວ ໃນ​ປີ​ນີ້​ໃນ​ການ​ຊ່ວຍເຫຼືອ​ບັນເທົາ​ທຸກ​ຜົນ​ກະທົບ​ຈາກ​ໄພ​ທຳ​ມະ​ຊາດ ແລະ ດຳເນີນ​ນະໂຍບາຍ​ຕ່າງໆ​ເພື່ອ​ຮັບ​ມື​ກັບ​ໄພ​ທຳ​ມະ​ຊາດ, ບັນດາ​ທູຕາ​ນຸ​ທູດ ແລະ ອົງການ​ຈັດ​ຕັ້ງ​ສາກົນ​ປະຈຳລາວ ກໍ​ໃຫ້ການ​ສະໜັບສະໜູນ ແລະ ການ​ຊ່ວຍເຫຼືອ​ຕໍ່ ສປປ ລາວ ໃນ​ໄລຍະ​ເກີດ​ໄພ​ທຳ​ມະ​ຊາດ ຊຶ່ງ​ກໍໃຫ້ເກີດ​ຄວາມ​ເສຍ​ຫາຍ​ທາງ​ດ້ານ​ຊີວິດ ​ແລະ​ ຊັບ​ສິນ​ຂອງ​ປະຊາຊົນ​ລາວ ໃນ​ເດືອນ​ສິງຫາ ແລະ ເດືອນ​ກັນຍາ​ປີ​ນີ້.

   ພວກ​ເຮົາ​ຂໍ​ຢືນຢັນ​ຕໍ່​ບັນ ດາ​ທ່ານ​ການ​ນຳ​ຂອງ​ລາວ​ວ່າ: ຈະ​ກຽມພ້ອມ​ໃຫ້ການ​ຊ່ວຍເຫຼືອ​ເພີ່ມ​ເຕີມ​ແກ່ ສປປ ລາວ ເພື່ອ​ຮັບ​ມື​ກັບ​ໄພ​ທຳ​ມະ​ຊາດ​ທັງ​ໃນ​ຂອບ​ສອງ​ຝ່າຍ ຫຼື ຜ່ານ​ກົນ​ໄກ​ການ​ຮ່ວມ​ມື​ໃນ​ຂອບ​ອາ​ຊຽນ​ແລະ ຂອບ​ການ​ຮ່ວມ​ມື​ແບບ​ຫຼາຍ​ຝ່າຍ​ຕ່າງໆ.

   ຂ້າພະເຈົ້າ​ຕາງໜ້າ​ທູຕາ​ນຸ​ທູດ ແລະ ອົງການ​ຈັດ​ຕັ້ງ​ສາກົນ ປະຈຳ ລາວ ຂໍ​ອວຍພອນ​ໄຊ​ອັນ​ປະ​ເສີ​ດມາ​ຍັງ ບັນດາ​ທ່ານ​ການ​ນຳ​ຂອງ ສປປ ລາວ ຈົ່ງ​ມີ​ສຸຂະພາບ​ແຂງແຮງ​ປະສົບ​ຜົນສຳເລັດ​ໃນ​ໜ້າທີ່​ອັນ​ມີ​ກຽດ​ສູງ​ສົ່ງ​ຂອງ ບັນດາ​ທ່ານ ແລະ ຂໍ​ໃຫ້​ປະຊາຊົນ​ລາວ​ທຸກ​ຖ້ວນ​ໜ້າ​ຈົ່ງ​ມີ​ຄວາມສຸກ​ຄວາມ​ຈະເລີນ​ຮຸ່ງ​ເຮືອງ.

   ຈາກ​ນັ້ນ​ທ່ານ ບຸນ​ຍັງ ວໍລະ​ຈິດ ປະທານ​ປະເທດ ຕາງໜ້າ​ການ​ນຳ​ພັກ​-​ລັດ​ສະແດງ​ຄວາມ​ຂອບໃຈ​ຕໍ່​ທ່ານ​ທູດ​ອາວຸໂສ ແລະ ທູຕາ​ນຸ​ທູດ​ຕະຫຼອດ​ຮອດ​ອົງການ​ຈັດ​ຕັ້ງ​ສາກົນ​ປະຈຳ ລາວ ທີ່​ເຂົ້າ​ອວຍພອນ​ແດ່​ການ​ນຳ​ພັກ​-​ລັດ ແລະ ປະຊາຊົນ​ລາວ​ທຸກ​ຖ້ວນ​ໜ້າ ໃນ​ໂອກາດ​ວັນຊາດ​ຂອງ ສປປ ລາວ ຄົບ ຮອບ 44 ປີ ຂ້າພະເຈົ້າ​ເຊື່ອ​ໝັ້ນ​ວ່າ ຄຳ​ຍ້ອງຍໍ​ຊົມເຊີຍ​ ແລະ​ ຄຳ​ອວຍ​ພອນ​ອັນ​ປະເສີດ​ຂອງ​ທ່ານ​ຈະ​ເປັນ​ແຫຼ່ງ​ອັນ​ຍິ່ງ​ໃຫຍ່​ຂອງ​ການ​ສ້າງ​ແຮງ​ບັນດານ​ໃຈ​ໃຫ້​ແກ່​ລັດຖະບານ ແລະ ປະຊາຊົນ​ລາວ​ຂອງ​ພວກ​ຂ້າ ພະເຈົ້າ​ໃນ​ການ​ສືບຕໍ່​ຈັດ​ຕັ້ງ​ປະຕິບັດ​ພາລະກິດ​ອັນ​ສູງ​ສົ່ງ​ແຫ່ງ​ການ​ສ້າງສາ​ພັດທະນາ​ປະເທດ​ຊາດ​ຕາມ​ທິດ​ຍືນ​ຍົງ ແລະ​ ສີຂຽວ​ ແນໃສ່​ເຮັດ​ໃຫ້​ປະເທດ​ລາວ​ຫຼຸດ​ພົ້ນ​ອອກ​ຈາກ​ສະຖານະ​ພາບ​ປະເທດ​ດ້ອຍ​ພັດທະນາ​ໃນ​ອະນາ​ຄົດ​ໃກ້ໆ​ນີ້.

   ບັນດາ​ທ່ານ​ທີ່​ມີ​ກຽດ ປີ​ໃໝ່​ສາກົນ 2020 ໃກ້​ຈະ​ໝູນວຽນ​ມາ​ເຖິງ​ໃນ​ມໍ່ໆ​ນີ້, ຂ້າພະເຈົ້າ​ຕາງໜ້າ​ໃຫ້​ພັກ​-​ລັດຖະບານ ແລະ ​ປະຊາຊົນ​ລາວ​ບັນດາເຜົ່າ ຂໍ​ອວຍພອນ​ໃຫ້​ບັນດາ​ທ່ານ​ທູຕາ​ນຸ​ທູດ ແລະ ອົງການ​ຈັດ​ຕັ້ງ​ສາກົນ​ປະຈຳ ລາວ ທີ່​ມາ​ຮ່ວມ​ອວຍພອນ​ໃນ​ຄັ້ງ​ນີ້​ຈົ່ງ​ມີ​ສຸຂະພາບ​ແຂງແຮງ, ມີ​ຄວາມສຸກ​ໃນ​ຊີວິດ​ສ່ວນຕົວ ແລະ ຄອບຄົວ ​ປະສົບຜົນ ສຳເລັດ​ໃນ​ໜ້າທີ່​ອັນ​ມີ​ກຽດ​ສະຫງ່າ​ຂອງ​ທຸກໆ​ທ່ານ ພ້ອມ​ທັງ​ສົ່ງ​ຄວາມ​ຢ້ຽມຢາມ​ຖາມ​ຂ່າວ ແລະ ພອນ​ໄຊ​ອັນ​ປະເສີດ​ໄປ​ຍັງ​ປະມຸກ​ລັດ, ຫົວໜ້າ​ລັດຖະບານ ແລະ ປະຊາຊົນ ກໍ​ຄື​ການ​ນຳ​ອົງການ​ຈັດ​ຕັ້ງ​ສາກົນ​ຂອງ​ບັນດາ​ທ່ານ​ມານະ​ໂອກາດ​ນີ້​ດ້ວຍ. ອວຍພອນ​ໃຫ້​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ທີ່​ດີ​ລະຫວ່າງ ສປປ ລາວ ກັບ​ບັນດາ​ປະເທດ ແລະ ອົງການ​ຈັດ​ຕັ້ງ​ສາກົນ​ໃນ​ພາກ​ພື້ນ ແລະ ໃນ​ໂລກ​ຈົ່ງ​ໄດ້​ຮັບ​ການ​ເສີມ​ຂະຫຍາຍ​ຢ່າງ​ບໍ່​ຢຸດ​ຢັ້ງ​ ແລະ ຍືນ​ຍົງ​ຕະຫຼອດ​ໄປ.

Medialaos Massmedia