ໃນວັນທີ 2 ທັນວາ 2019 ນີ້ ບັນດາສິດເກົ່າໂຮງຮຽນ ມສ ອາດສະພອນ ເມືອງອາດສະພອນ ແຂວງສະຫວັນນະເຂດ, ໄດ້ຈັດກິດຈຳກຳ ສິດເກົ່າຄືນສູ່ເຢົ້າ ຂຶ້ນທີ່ໂຮງຮຽນດັ່ງກ່າວ ໂດຍການເຂົ້າຮ່ວມຂອງ ທ່ານ ສົມດີ ດອກດາລາ ກຳມະການພັກເມືອງ ຫົວໜ້າຈຸດສຸມໂນນມີໄຊ, ມີ ທ່ານ ສີພະສຸກ ປະສານມາ ຜູ້ອຳນວນການໂຮງຮຽນ ມສ ອາດສະພອນ, ມີບັນດາທ່ານຄູອາຈານ ແລະ ນ້ອງນັກຮຽນ ແລະ ບັນດາສິດເກົ່າທຸກທົ່ວໜ້າເຂົ້າຮ່ວມ.

ໂອກາດນີ້ ທ່ານ ສີພະສຸກ ປະສານມາ ກໍ່ໄດ້ໃຫ້ກຽດກ່າວຕ້ອນຮັບບັນດາສິດເກົ່າທັງຫຼາຍ ທີ່ຍັງເຫັນໄດ້ຄຸນງາມຄວາມດີ, ບໍ່ລືມບຸນຄຸນຄູ-ອາຈານ ທີ່ເຄີຍສິດສອນຖ່າຍທອດຄວາມຮູ້ໃຫ້, ເຄີຍຝຶກຝົນຫຼໍ່ຫຼອມຕົນເອງໃຫ້ກາຍເປັນຄົນດີ, ຄົນເກັ່ງ, ມີຄວາມຮູ້ຄວາມສາມາດ ແລະກັບມາສ້າງສາບ້ານເກີດເມືອງນອນ ກໍ່ຄືໂຮງຮຽນທີ່ຕົນເຄີຍໄດ້ສຶກສາຫາຄວາມຮູ້ ໃນໄລຍະຜ່ານມາ. ພ້ອມດຽວກັນນີ້ ບັນດາສິດເກົ່າ ກໍ່ຍັງໄດ້ ນຳອຸປະກອນການຮຽນ ມອບໃຫ້ນ້ອງນັກຮຽນທີ່ຮຽນດີຮຽນເກັ່ງແຕ່ລະຫ້ອງນຽນ ແລະແຕ່ລະຊັ້ນຮຽນ ເຊິງມີທັງໝົດ 24 ນ້ອງ; ນອກຈາກນັ້ນ, ກໍ່ຍັງໄດ້ນຳ ດິນບ໋ອກ ຈຳນວນ 1.000 ກ້ອນ, ປູນ 1 ໂຕນ, ປິນເຕີ 1 ເຄື່ອງ, ຊາຍ 4 ແມັດກ້ອນ, ເງິນສົດ 1 ລ້ານກີບ, ລວມມູນຄ່າທັງໝົດ 5.200.000 ກີບ ມອບໃຫ້ໂຮງຮຽນ ເພື່ອປະກອບສ່ວນໃນການສ້າງສະໂມສອນຂອງໂຮງຮຽນ ທີ່ກຳລັງກໍ່ສ້າງບໍ່ທັນສຳເລັດ,

ນອກຈາກບັນດາສິດເກົ່າ ສົກປີ 2010-2011 ນີ້ແລ້ວ ຍັງມີຫົວໜ່ວຍທຸລະກິດປະກອບສ່ວນຕື່ມອີກ ໂດຍສະເພາະ ຮ້ານອາຫານ ໂດນໃຈ ແລະບັນດາສິດເກົ່າຕ່າງລຸ້ນຮ່ວມກັນປະກອບສ່ວນ.ໂອກາດດັ່ງກ່າວ ບັນດາສິດເກົ່າ ແລະຄູອາຈານກໍ່ຍັງໄດ້ມີກິດຈະກຳແຂ່ງຂັນກິລາບານເຕາະ ມິດຕະພາບ ລະຫວ່າງ ໂຮງຮຽນ ກັບສິດເກົ່າ ເຊິ່ງທັງທີມຍິງ ແລະ ທີມຊາຍ ທັງນີ້ ກໍ່ເພື່ອສ້າງຄວາມສາມັກຄີ ຮັກແພງ ກັບຄູອາຈານ ແລະບັນດາໝູ່ເພື່ອນທີ່ຮ່ວມກິດຈະກຳດ້ວຍກັນນະທີ່ນີ້.