ຮອງນາຍົກ ເນັ້ນໃຫ້ພະນັກງານທົ່ວກະຊວງ ຜທ ເອົາໃຈໃສ່ປະຕິບັດ 6 ວຽກງານສຳຄັນ

0
130

ໃນໂອກາດຈັດຕັ້ງປາຖະ ກະຖາ ວັນຊາດ ທີ 2 ທັນວາ ຄົບຮອບ 44 ປີ ແລະ ວັນເກີດທ່ານ ປະທານ ໄກສອນ ພົມວິຫານ ຄົບຮອບ 99 ປີ ທີ່ກະຊວງແຜນການ ແລະ ການລົງທຶນ ໃນວັນທີ 29 ພະຈິກ ຜ່ານມາ, ທ່ານ ສອນໄຊ ສີພັນດອນ ກຳມະການກົມການເມືອງສູນກາງພັກ ຮອງນາຍົກລັດຖະ ມົນຕີ ລັດຖະມົນຕີ ກະຊວງ ແຜນການ ແລະ ການລົງທຶນ ໄດ້ຖືເອົາໂອກາດອັນດີນີ້ ໂອ້ລົມ ຕໍ່ບັນດາສະມາຊິກພັກ – ພະນັກ ງານພາຍໃນກະຊວງແຜນການ ແລະ ການລົງທຶນ (ຜທ) ໂດຍໄດ້ເນັ້ນໃຫ້ເອົາໃຈ ໃສ່ປະຕິບັດ 6 ວຽກງານ ສຳຄັນດັ່ງນີ້: ວຽກງານທາງດ້ານການ ເມືອງ, ການກໍ່ສ້າງພັກ ແລະ ພະນັກງານ: ສືບຕໍ່ດຳເນີນກອງປະຊຸມໃຫຍ່ຂອງບັນດາໜ່ວຍພັກ ແລະ ຄະນະພັກຮາກຖານສູນສະຖິຕິແຫ່ງຊາດທີ່ຍັງບໍ່ທັນໄດ້ເປີດ ແລະ ກອງປະຊຸມໃຫຍ່ຂອງສາມອົງການຈັດຕັ້ງມະຫາຊົນຂອງກະຊວງ ຜທ ໃຫ້ສຳເລັດ ເພື່ອກະກຽມໃຫ້ແກ່ການດໍາເນີນກອງປະຊຸມໃຫຍ່ ຄັ້ງທີ IV ຂອງອົງຄະນະພັກກະຊວງແຜນການ ແລະ ການລົງທຶນໃນປີ 2020 ທີ່ຈະມາເຖິງນີ້.

ສືບຕໍ່ປັບປຸງກົງຈັກການຈັດຕັ້ງ, ກົນໄກການບໍລິຫານລັດໃຫ້ຮັດກຸມ, ມີປະສິດທິພາບ ແລະ ປະສິດທິຜົນ ໂດຍການສືບຕໍ່ສັບຊ້ອນພາລະບົດບາດຂອງບາງກົມກອງ ທີ່ເຫັນວ່າຍັງມີການສັບຊ້ອນ, ອັນສໍາຄັນແມ່ນເນັ້ນໃສ່ການບໍລິຫານລັດດ້ວຍກົດໝາຍໃຫ້ເຂັ້ມແຂງກວ່າເກົ່າ ແລະ ມີປະສິດທິຜົນສູງ. ວຽກງານຫ້ອງການ ແລະ ນິຕິກຳ: ຄົ້ນຄວ້ານຳໃຊ້ກົນໄກການຄຸ້ມຄອງ ແລະ ການຈໍລະຈອນເອກະສານຂອງກະຊວງແຜນການ ແລະ ການລົງທຶນ ແບບປະຕູດຽວໃຫ້ມີປະສິດທິຜົນກວ່າເກົ່າ. ສືບຕໍ່ຕິດຕາມ ຮັບຟັງຄຳຄິດຄຳເຫັນ ຈາກປະຊາຊົນ ແລະ ສັງຄົມທົ່ວໄປຕໍ່ການຈັດຕັ້ງປະຕິບັດວຽກງານຂອງຂະແໜງແຜນການ ແລະ ການລົງທຶນຜ່ານສາຍດ່ວນ ຂອງກະຊວງ1503. ວຽກງານແຜນການ, ປະເມີນຜົນ ແລະ ການກວດກາ: ສືບຕໍ່ສະຫຼຸບຕີລາຄາການປະຕິບັດແຜນພັດທະນາເສດຖະກິດ-ສັງຄົມ ປີ 2019 ແລະ ສ້າງແຜນການປະຈຳປີ 2020 ໃຫ້ສຳເລັດ. ສະຫຼຸບຕີລາຄາການປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ແລະ ສ້າງແຜນ 5 ປີ ຄັ້ງທີ IX (2021-2025) ໃຫ້ສໍາເລັດໂດຍໄວ ພ້ອມທັງສືບຕໍ່ຄົ້ນຄວ້າ ໃນການປັບໂຄງສ້າງເສດຖະກິດ ເພື່ອເຮັດໃຫ້ແຜນ 5 ປີ ຄັ້ງທີ IX ມີຄວາມສົມດຸນໃນການພັດທະນາ ແລະ ໄປຕາມທິດຍືນຍົງ, ສີຂຽວ ເພື່ອກະກຽມລາຍງານກອງປະຊຸມລັດຖະບານ.

ສືບຕໍ່ຄົ້ນຄວ້າວິທີ ການແກ້ໄຂໜີ້ສິນໂຄງການລົງທຶນຂອງລັດ ທີ່ລັດຖະບານໄດ້ເຫັນດີທາງດ້ານຫຼັກການແລ້ວ ເປັນຕົ້ນການແກ້ໄຂດ້ວຍພັນທະບັດ, ການອວ່າຍໜີ້້ສາມແຈ ແລະ ງົບປະມານປົກກະຕິ ເພື່ອເຮັດໃຫ້ມີສະພາບຄ່ອງໃນການລົງທຶນຂອງລັດ, ການ ສ້າງແຜນການລົງທຶນຂອງ ລັດຕ້ອງປະຕິບັດຕາມກົດໝາຍ ວ່າດ້ວຍການລົງທຶນຂອງລັດຢ່າງເຂັ້ມງວດ ແລະ ເດັດຂາດ ບໍ່ໃຫ້ສ້າງໜີ້ຂຶ້ນໃໝ່. ວຽກງານການລົງທຶນພາກເອກະຊົນ: ເອົາໃຈໃສ່ສົ່ງເສີມການລົງທຶນທີ່ມີຄຸນນະພາບຂອງພາກທຸລະກິດທັງພາຍໃນ ແລະ ຕ່າງປະເທດ ໂດຍການປັບປຸງກົນໄກການບໍລິການປະຕູດຽວໃຫ້ເຂັ້ມແຂງເພື່ອອໍານວຍຄວາມສະດວກໃຫ້ແກ່ການອະນຸມັດລົງທຶນໃຫ້ມີຄວາມວ່ອງໄວ, ໂປ່ງໃສ ສາມາດດຶງດູດການລົງທຶນຕ່າງປະເທດໃຫ້ໄດ້ຫຼາຍຂຶ້ນ, ສົ່ງເສີມການລົງທຶນພາຍໃນໃຫ້ເຂັ້ມແຂງ, ຫຼຸດຕົ້ນທຶນການດຳເນີນທຸລະກິດ ແລະ ທັງເປັນການແກ້ໄຂຫາງສຽງຂອງສັງຄົມກ່ຽວກັບການບໍລິການອະນຸມັດລົງທຶນທີ່ຊັກຊ້າ. ສືບຕໍ່ແກ້ໄຂຂອດຂັ້ນການອະນຸມັດການລົງທຶນໃຫ້ວ່ອງໄວ ແລະ ຮອບຄອບກວ່າເກົ່າ, ເອົາໃຈໃສ່ປັບປຸງການຄຸ້ມຄອງບໍລິຫານເຂດເສດຖະກິດພິເສດ 12 ເຂດ ໃຫ້ມີປະສິດທິຜົນດີຂຶ້ນກວ່າເກົ່າ.

ຊຸກຍູ້ສົ່ງເສີມຫົວໜ່ວຍທຸລະກິດຂະໜາດນ້ອຍ-ກາງຂອງລາວ ໃຫ້ມີສ່ວນຮ່ວມໃນການພັດທະນາໃຫ້ຫຼາຍຂຶ້ນ ພ້ອມທັງຊຸກຍູ້ບັນດາໂຄງການລົງທຶນຂະໜາດໃຫຍ່ທີ່ໄດ້ເຊັນ MOU ແລ້ວໃຫ້ກ້າວເຂົ້າສູ່ໄລຍະລົງທຶນພັດທະນາໂຄງການ ເພື່ອຈັດເກັບລາຍຮັບເຂົ້າງົບປະມານຂອງລັດໃຫ້ຄົບຖ້ວນ. ວຽກງານການຮ່ວມມືສາ ກົນ: ຈັດຕັ້ງຜັນຂະຫຍາຍຜົນກອງປະຊຸມໂຕະມົນປະຈໍາປີ 2019 ທີ່ຫາກໍສຳເລັດເມື່ອບໍ່ດົນມານີ້ ແລະ ຖະແຫຼງການວຽງຈັນ ວ່າດ້ວຍການເປັນຄູ່ຮ່ວມ ເພື່ອການຮ່ວມມືທີ່ມີປະສິດທິຜົນ, ພ້ອມທັງດຶງດູດ ແລະ ຍາດແຍ່ງທຶນຊ່ວຍເຫຼືອທາງການເພື່ອການພັດທະນາຢ່າງມີຈຸດສຸມ, ມີເປົ້າໝາຍຈະແຈ້ງ ແລະ ສອດ ຄ່ອງກັບເປົ້າໝາຍການພັດ ທະນາຂອງລັດຖະບານ ໂດຍສະເພາະເປົ້າໝາຍການ ພັດທະ ນາແບບຍືນຍົງ (SDGs) ແລະ ຍຸດທະສາດການເຕີບໂຕສີຂຽວ.

ສືບຕໍ່ຕິດຕາມ, ຊຸກຍູ້ ການຈັດຕັ້ງປະຕິບັດ ບັນດາໂຄງການຊ່ວຍເຫຼືອ 4 ຕື້ຢວນ ໃຫ້ໄດ້ຮັບການຈັດຕັ້ງປະຕິ ບັດໂດຍໄວ ເພື່ອແກ້ໄຂຄວາມທຸກຍາກ ໃຫ້ແກ່ປະຊາຊົນລາວບັນດາເຜົ່າ ຢ່າງມີປະສິດທິພາບ ແລະມີປະສິດທິຜົນດີ. ສືບຕໍ່ປະສານສົມທົບກັບຝ່າຍຫວຽດນາມ ຜັນຂະຫຍາຍຍຸດທະສາດການຮ່ວມມື ໄລຍະ 10 ປີ (2011-2020) ແລະ ການສ້າງແຜນຍຸດທະສາດການຮ່ວມມື ລາວ-ຫວຽດນາມ ໄລຍະ 10 ປີ (2021-2030), ສັນຍາຮ່ວມມື ໄລຍະ 5 ປີ (2021-2025)ແລະ ບົດບັນທຶກກອງປະຊຸມປະຈໍາປີ ໃຫ້ໄດ້ຮັບໝາກຜົນເປັນຢ່າງດີ. ພ້ອມທັງສືບຕໍ່ຊຸກຍູ້ໂຄງການທີ່ສອງລັດຖະບານໄດ້ຕົກລົງກັນແລ້ວໃຫ້ເປັນຮູບປະທຳເປັນຕົ້ນ: ທ່າເຮືອຫວຸງອ່າງ, ທາງດ່ວນວຽງຈັນ-ຮ່າໂນ້ຍ, ທາງລົດໄຟວຽງຈັນ-ທ່າແຂກ-ມູຢາ-ເຕິນເອິບ-ຫວຸງອາງ, ການຊື້-ຂາຍກະແສໄຟຟ້າ ແລະ ຊຸກຍູ້ໃຫ້ມີການເຈລະຈາກູ້ຢືມເງິນໃຫ້ແກ່ໂຄງການ ກໍ່ສ້າງເສັ້ນທາງພູທິດເຜິ້ງ-ນາຊອນແລະ ອື່ນໆໃຫ້ໄດ້ຮັບການຈັດຕັ້ງປະຕິບັດຕາມແຜນ.

ວຽກງານສະຖິຕິ ແລະ ການຄົ້ນຄວ້ານະໂຍບາຍ: ສ້າງຖານຂໍ້ມູນ ແລະ ເກັບກໍາສະຖິຕິ ເພື່ອເປັນຂໍ້ມູນພື້ນຖານໃຫ້ແກ່ການຕິດຕາມການພັດທະນາເສດຖະກິດ-ສັງຄົມ ແລະ ການຕິດຕາມຄວາມຄືບໜ້າໃນແຕ່ລະດ້ານຢ່າງເປັນລະບົບ, ມີຂໍ້ມູນຢ່າງຊັດເຈນ ແລະ ຢັ້ງຢືນໄດ້ຕາມຄວາມເປັນຈິງຂອງປະເທດເຮົາ; ເອົາໃຈໃສ່ໃນການຕິດຕາມຄວາມຄືບໜ້າຂອງ ສປປ ລາວ ຕາມເງື່ອນໄຂການຫຼຸດພົ້ນຈາກສະຖານະພາບປະເທດດ້ອຍພັດທະນາໃນປີ 2020. ຂຸ້ນຂ້ຽວດຳເນີນການກະກຽມເກັບກຳ ແລະ ສຳຫຼວດສະຖິຕິກະສິກຳຄັ້ງທີ III ແລະ ເສດຖະກິດທົ່ວປະເທດຄັ້ງທີ III ຂອງ ສປປ ລາວ. ເລັ່ງໃສ່ສຶກສາຄົ້ນຄວ້າບັນດາຫົວຂໍ້ວິທະຍາສາດໃນການຮັບໃຊ້ໃຫ້ແກ່ການສ້າງແຜນພັດທະນາເສດຖະກິດ-ສັງຄົມຄັ້ງທີ IX (2021-2025) ໃຫ້ສຳເລັດຕາມເວລາທີ່ກຳນົດໄວ້.

Medialaos Massmedia