ກອງປະຊຸມໃຫຍ່ຜູ້ແທນ ອົງຄະນະພັກ​#ເມືອງໂພນທອງ ຄັ້ງທີ VIII ຈັດຂຶ້ນຢູ່ສະໂມສອນເມືອງໂພນທອງ ໃນວັນທີ 28-29 ພະຈິກ 2019 ໂດຍການເຂົ້າຮ່ວມຂອງ ສະຫາຍ ປອ. ບຸນຖອງ ດີວິໄຊ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໆຈໍາປາສັກ, ສະຫາຍ ສົມສະໜິດ ບຸດຕິວົງ ຮອງເລຂາຄະນະບໍລິຫານງານພັກແຂວງ ຮອງເຈົ້າແຂວງໆຈຳປາສັກ, ສະຫາຍ ນິພອນ ວຽງປະເສີດ ຮອງເລຂາຄະນະບໍລິຫານງານພັກແຂວງ ຫົວໜ້າຄະນະຈັດຕັ້ງແຂວງ, ສະຫາຍຂັນຄຳ ສຸລິວົງເລຂາພັກເມືອງເຈົ້າເມືອງໆໂພນທອງ, ສະຫາຍ ໃນຄະນະປະຈໍາພັກແຂວງ, ມີການນໍາພະແນກການກົມກອງອ້ອມຂ້າງແຂວງ,ການນໍາ 9 ເມືອງ, 1 ນະຄອນ ບັນດາທ່ານໃນຄະນະປະຈໍາພັກ, ກໍາມະການພັກ, ຄະນະໜ່ວຍພັກຈາກຫ້ອງການຕ່າງໆພາຍໃນເມືອງໂພນທອງ, ອົງການຈັດຕັ້ງມະຫາຊົນ ຊາວໜຸ່ມ, ແມ່ຍິງ, ກໍາມະບານ, ພະນັກງານອາວຸໂສບໍານານ ເຂົ້າຮ່ວມ, ໃນນັ້ນ ຜູ້ແທນສົມບູນທີ່ເປັນຕົວແທນຈາກຮາກຖານພັກທົ່ວເມືອງໂພນທອງເຂົ້າຮ່ວມ 163 ສະຫາຍ.

ໃນກອງປະຊຸມ ສະຫາຍ ຂັນຄຳ ສຸລິວົງເລຂາພັກເມືອງເຈົ້າເມືອງໆໂພນທອງຊຸດທີ VII ໄດ້ຂຶ້ນຜ່ານບົດລາຍງານການເມືອງທັງ 2 ພາກ ເຊິ່ງຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນ ອົງຄະນະພັກເມືອງ ຄັ້ງທີ VII ແຕ່ປີ 2015-2019 ໂດຍຍົກໃຫ້ເຫັນຜົນສໍາເລັດ,ດ້ານດີ, ດ້ານອ່ອນ ແລະ ຂໍ້ຄົງຄ້າງໃນການຈັດຕັ້ງປະຕິບັດວຽກງານແຕ່ລະດ້ານ ໂດຍສະເພາະວຽກງານພັດທະນາເສດຖະກິດ ມີອັດຕາການຂະຫຍາຍຕົວຢ່າງຕໍ່ເນື່ອງ ສະເລ່ຍໃນລະດັບ 6,77%, ລວມຍອດຜະລິດຕະພັນພາຍໃນ 5 ປີ ປະຕິບັດໄດ້ 5.058 ຕື້ກີບ, ທຽບໃສ່ແຜນການປະຕິບັດໄດ້ລື່ນແຜນ 3,83%, ສະເລ່ຍລາຍຮັບປະຕິບັດໄດ້ 12.671.115 ກີບ ຫຼື ເທົ່າກັບ 1.584 ໂດລາສະຫະລັດຕໍ່ຄົນຕໍ່ປີ, ທຽບໃສແຜນລື່ນ 12,18%,ການລະດົມແຫຼ່ງທຶນ ເພື່ອການພັດທະນາຂອງເມືອງ ປະຕິບັດໄດ້ 1.685 ຕື້ກ່ວາກີບ ເຮັດໃຫ້ໂຄງປະກອບເສດຖະກິດຂອງເມືອງ ຫັນປ່ຽນໄປຕາມທິດທີ່ຕັ້ງໜ້າ ຕາມທ່າແຮງບົ່ມຊ້ອນຂອງທ້ອງຖິ່ນ ເຮັດໃຫ້ຊີວິດການເປັນຢູ່ຂອງປະຊາຊົນ ໄດ້ຮັບການພັດທະນາດີຂຶ້ນເປັນກ້າວໆ;ສ່ວນວຽກງານວັດທະນະທໍາ-ສັງຄົມ, ການຍົກສູງປະສິດທິພາບໃນການຄຸ້ມຄອງ-ບໍລິຫານລັດ ແລະ ການປົກປ້ອງກົດໝາຍ, ການເສີມຂະຫຍາຍມູນເຊື້ອຄວາມສາມັກຄີປອງດອງປະຊາຊົນບັນດາເຜົ່າ, ວຽກງານແນວລາວສ້າງຊາດ ແລະ ອົງການຈັດຕັ້ງມະຫາຊົນ, ວຽກງານການຕ່າງປະເທດ ແລະ ອື່ນໆ ກໍ່ໄດ້ຮັບການຈັດຕັ້ງປະຕິບັດ ມີການພັດທະນາໄປພ້ອມໆກັນ. ສຳລັບ 5 ປີຕໍ່ໜ້າ(2020-2024) ໂດຍໄດ້ວາງຄາດໝາຍສູ້ຊົນເຮັດໃຫ້ເສດຖະກິດຂອງເມືອງຂະຫຍາຍຕົວໝັ້ນທ່ຽງໃນລະດັບ 7,35% ຕໍ່ປີ, ສຸມໃສ່ພັດທະນາລະບົບພື້ນຖານໂຄງລ່າງໃຫ້ເຂັ້ມແຂງ, ສ້າງໂຄງປະກອບເສດຖະກິດທີ່ຖືເອົາການຜະລິດກະສິກຳເປັນສິນຄ້າ ຕິດພັນກັບການປຸງແຕ່ງ ແລະ ການບໍລິການ, ສູ້ຊົນເກັບລາຍພາຍໃນເມືອງເຂົ້າງົບປະມານໃຫ້ໄດ້ 79,36 ຕື້ກີບ, ເມືອຮອດປີ 2024 ໃຫ້ເມືອງສາມາດກຸ້ມຕົນເອງ ທາງດ້ານລາຍຮັບ ແລະ ລາຍຈ່າຍ, ປຸກລະດົມທຸກແຫຼ່ງທຶນຈາກພາກສ່ວນສັງຄົມເຂົ້າໃນການພັດທະນາເສດຖຖະກິດ-ສັງຄົມ ໃຫ້ໄດ້ 2.533 ຕື້ກີບ.

ນອກຈາກນີ້ຜູ້ແທນທີ່ເຂົ້າຮ່ວມກອງປະຊຸມກໍ່ໄດ້ປະກອບຄໍາເຫັນຕໍ່ກອງປະຊຸມໃຫຍ່ ເພື່ອເຮັດໃຫ້ກອງປະຊຸມເຕັມໄປດ້ວຍເນື້ອໃນເລິກເຊິ່ງໜັກແໜ້ນ ແລະ ຍັງໄດ້ປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ ເຊິ່ງມີຜູ້ສະໝັກ 31 ສະຫາຍ, ຍິງ 6 ສະຫາຍ, ຜ່ານຈາກການປ່ອນບັດເລືອກຕັ້ງຂອງຜູ້ແທນກອງປະຊຸມ ແລະ ຜົນຂອງກອງປະຊຸມຄັ້ງປະຖົມມະເລີກ ໄດ້ເປັນເອກະສັນ ເລືອກເອົາ ສະຫາຍ ສຸພາບ ທຳມະຮັກສາ ເປັນເລຂາຄະນະບໍລິຫານງານພັກເມືອງໂພນທອງ ຊຸດທີ VIII, ສະຫາຍ ໄພສານ ອ່ອນໄຊວຽງ ເປັນຮອງເລຂາ ທັງເປັນປະທານກວດກາ ແລະ ສະຫາຍ ນາງ ສະຖິດພັກດີ ເປັນຮອງເລຂາ .ກຳມະການປະຈຳພັກເມືອງ 9 ສະຫາຍ,ຍິງ 2 ສະຫາຍ ແລະ ກຳມະການພັກເມືອງອີກຈຳນວນ 18 ສະຫາຍ, ຍິງ 4 ສະຫາຍ. ນອກນີ້ ກອງປະຊຸມ ຍັງໄດ້ປ່ອນບັດຄັດເລືອກເອົາຄະນະຜູ້ແທນໄປຮ່ວມກອງປະຊຸມໃຫຍ່ຜູ້ແທນອົງຄະນະພັກແຂວງ ຄັ້ງທີ VIII ຈໍານວນ 20ສະຫາຍ, ຍິງ 3 ສະຫາຍ.
ຕອນທ້າຍກອງປະຊຸມ ສະຫາຍ ສົມສະໜິດ ບຸດຕິວົງ ຮອງເລຂາຄະນະບໍລິຫານງານພັກແຂວງ ຮອງເຈົ້າແຂວງໆຈໍາປາສັກ ກໍ່ໄດ້ມີຄໍາເຫັນໂອ້ລົມຊີ້ທິດເຍືອງທາງ ເພື່ອເປັນບ່ອນອີງໃນການນໍາພາ-ຊີ້ນໍາຂອງອົງຄະນະພັກເມືອງໂພນທອງໃນຕໍ່ໜ້າ ໃຫ້ມີຜົນສໍາເລັດຕາມຄາດໝາຍທີ່ວາງໄວ້.

ສື່ມວນຊົນແຂວງຈຳປາສັກ
medialaos
Cr: ຄຳຫຼ້າ champasakRADIO100,7Mhz