ວັນທີ 27 ພະຈິກ 2019, ໄດ້ມີພິທີມອບ – ຮັບໂຄງການກໍ່ສ້າງອາຄານພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ(ຖວທ)ແຂວງຈໍາປາສັກຫຼັງໃໝ່ ລະຫວ່າງ ບໍລິສັດ ພົງຊັບທະວີ(ກໍ່ສ້າງ ຜູ້ຮັບເໝົາໂຄງການ) ແລະ ພະແນກ ຖວທ ແຂວງ(ເຈົ້າຂອງໂຄງການຂຶ້ນ) ຢູ່ພະແນກດັ່ງກ່າວ ທີ່ບ້ານສະໜາມໄຊ ນະຄອນປາກເຊ ໂດຍການເຂົ້າຮ່ວຂອງ ທ່ານ ບົວລິນ ວົງພະຈັນ ຮອງເຈົ້າແຂວງໆຈໍາປາສັກ ຜູ້ຊີ້ນໍາວຽກງານວັດທະນະທໍາ – ສັງຄົມ ຂັ້ນແຂວງ, ທ່ານ ບົວທອງ ສຸວັນນະສານ ຫົວໜ້າພະແນກ ຖວທ ແຂວງ, ທ່ານ ຄໍາຫຼ້າ ລຸນທະປັນຍາ ປະທານບໍລິສັດ ພົງຊັບທະວີກໍ່ສ້າງ. ມີການນໍາຈາກພະແນກການກົມກອງທີ່ກ່ຽວຂ້ອງ, ຄະນະພັກ-ຄະນະພະແນກ, ຫົວໜ້າ – ຮອງຂະແໜງການກອງວິຊາການອ້ອມຂ້າງພະແນກ, ການນໍາຫ້ອງການ ຖວທ 9 ເມືອງ, 1 ນະຄອນ ແລະ ພະນັກງານວິຊາການທີີ່ກ່ຽວຂ້ອງເຂົ້າຮ່ວມເປັນສັກຂີພະຍານ.

ໃນພິທີ ທ່ານ ຄໍາມ່ວນ ພິມສີວັນໂນ ຮອງຫົວໜ້າພະແນກ ຖວທ ແຂວງ ຫົວໜ້າໂຄງການ ໄດ້ຂຶ້ນລາຍງານສະພາບການຈັດຕັ້ງປະຕິບັດໂຄງການ, ເນື້ອໃນບາງຕອນ ທ່ານກ່າວວ່າ: ໂຄງການກໍ່ສ້າງອາຄານພະແນກ ຖວທ ຫຼັງໃໝ່ ເປັນໂຄງການລົງທຶນຂອງລັດ ທີ່ໄດ້ອະນຸມັດຮັບຮອງຈາກສະພາ ເຊິ່ງເລີ່ມຈັດຕັ້ງປະຕິບັດແຕ່ສົກປີ 2013-2014 ໂດຍແມ່ນບໍລິສັດ ພົງຊັບທະວີ ກໍ່ສ້າງ ເປັນຜູ້ຮັບເໝົາໂຄງການ ໃນຮູບແບບບໍລິສັດລົງທຶນກ່ອນ 100%, ໃຊ້ເວລາໃນການກໍ່ສ້າງ 5 ປີ, ມີຂະໜາດ 25 ແມັດ x 32 ແມັດ, ເປັນອາຄານດ່ຽວ ມີ 4 ຊັ້ນ, ມີຫ້ອງເຮັດວຽກ 23 ຫ້ອງ, ຫ້ອງປະຊຸມ 2 ຫ້ອງ ແລະ ຫ້ອງນໍ້າ 24 ຫ້ອງ ລວມມູນຄ່າການກໍ່ສ້າງທັງໝົດ 13.670.682.201 ກີບ. ພ້ອມນີ້ ທ່ານຍັງຍົກໃຫ້ເຫັນຂໍ້ສະດວກ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດໂຄງການ ຕື່ມອີກ.

ພ້ອມນີ້ ທ່ານ ຄໍາຫຼ້າ ລຸນທະປັນຍາ ປະທານບໍລິສັດ ພົງຊັບທະວີກໍ່ສ້າງ(ຜູ້ຮັບເໝົາໂຄງການ) ກໍ່ໄດ້ກ່າວມອບອາຄານພະແນກ ຖວທ ແຂວງ; ກ່າວຮັບໂດຍ ທ່ານ ບົວທອງ ສຸວັນນະສານ ຫົວໜ້າພະແນກ ຖວທ ແຂວງ ຜູ້ຊີ້ນໍາໂຄງການ. ຈາກນັ້ນ ກໍ່ມີການຕັດແຖບຜ້າ ແລະ ປ່ອຍປຸ່ມເປົ້າເປີດອາຄານຢ່າງເປັນທາງການ.
ໃນໂອກາດມອບ – ຮັບໂຄງການກໍ່ສ້າງອາຄານພະແນກ ຖວທ ແຂວງ ຫຼັງໃໝ່ນີ້, ຄະນະພັກ-ຄະນະພະແນກ ພ້ອມດ້ວຍການນໍາ ແລະ ພະນັກງານຂະແໜງການກອງວິຊາການອ້ອມຂ້າງພະແນກ ຍັງໄດ້ຈັດພິທີທໍາບຸນໃສ່ບາດ ແລະ ຖວາຍສັງຄະທານແດ່ພະສົງ ເພື່ອເປັນສີລິມຸງຄຸນ ແລະ ຄວາມຢູ່ເຢັນເປັນສຸກ ຕື່ມອີກ.

ສື່ມວນຊົນແຂວງຈຳປາສັກ
medialaos
ຂ່າວ-ພາບ: ທູນທອງໃຈ