ຄະນະ​ຜູ້​ແທນ ສປປ ລາວ ນຳ​ໂດຍ​ທ່ານ ທັນ​ສະໄ​ໝ ກົມ​ມະ​ສິດ ລັດຖະມົນຕີ​ກະຊວງ ໄປສະນີ, ໂທລະ​ຄົມມະນາຄົມ ແລະ ການ​ສື່ສານ (ປທສ) ພ້ອມ​ດ້ວຍ​ຄະນະ ໄດ້​ເດີນທາງ​ເຂົ້າ​ຮ່ວມ​ກອງ​ປະຊຸມ​ການ​ສື່ສານ​ຄື້ນ​ຄວາມ​ຖີ່​ໂລກ ​ຄັ້ງທີ 38 (World Radio Communi cation-2019 ຫຼື WRC-19) ຈັດ​ຂຶ້ນ​ເມື່ອ​ບໍ່​ດົນ​ມາ​ນີ້ ທີ່​ປະ ເທດ ເອ​ຢິບ ໂດຍ​ມີ​ປະເທດ​ ສະ ມາຊິກ 165 ປະເທດ​ເຂົ້າ ​ຮ່ວມ ແລະ ໄດ້​ລົງ​ນາມ​ສົນທິສັນຍາ​ສາກົນກ່ຽວ​ກັບ​ການ​ນໍາ​ໃຊ້​ຄື້ນ​ຄວາມ​ຖີ່ (Final Acts of International Radio Resolutions) ແລະ ວົງ​ໂຄຈອນ​ດາວ​ທຽມ ຂອງ​ທຸກ​ປະເທດ​ທົ່ວ​ໂລກ.

   ກອງ​ປະຊຸມ​ການ​ສື່ສານ​ຄື້ນ​ຄວາມ​ຖີ່​ໂລກ ແມ່ນ​ຈັດ​ຂຶ້ນ​ທຸກໆ 4 ປີ ຊຶ່ງ​ມີ​ຈຸດປະສົງ​ເພື່ອ​ປັບປຸງ ສົນທິສັນຍາ​ສາກົນ​ກ່ຽວ​ກັບ​ການ​ນໍາ​ໃຊ້ ຄື້ນ​ຄວາມ​ຖີ່ ເພື່ອ​ຮອງ​ຮັບ​ເຕັກ​ໂນ​ໂລ​ຊີ ແລະ ນະ​ວັດຕະ​ກຳ​ໃ​ໝ່ໆ ດ້ານ​ການ​ສື່ສານ​ໃນ​ອະນາ​ຄົດ ເພື່ອ​ຮັບປະກັນ​ການ​ເຂົ້າ​ເ​ຖິງ ແລະ ການ​ນຳ​ໃຊ້​ເຂົ້າ​ໃນ​ທຸກ​ຂະ ແ​ໜງການ​ຢ່າງ​ປອດ​ໄພ. ໃນ​ໂອກາດ​ດຽວ​ກັນ​ນີ້, ສປປ ລາວ ໄດ້​ຮັບ​ກຽດ​ມີ​ຄຳ​ເຫັນ​ຕໍ່​ກອງ​ປະຊຸມ ເປັນຕົ້ນ ຄື້ນ​ຄວາມ​ຖີ່​ສໍາ​ລັບ ລະບົບ​ໂທລະສັບ​ເຄື່ອນ​ທີ່​ມາດຕະຖານ ສຳ​ລັບ 3G, 4G, 5G ແລະ ຄື້ນ​ຄວາມ​ຖີ່​ສໍາ​ລັບ​ການ​ສື່ສານ​ທາງ​ລົດໄຟ ຊຶ່ງ​ໄດ້​ຮັບ​ການ​ຕົກລົງ​ເຫັນດີ​ຕາມ​ ການ​ສະເໜີເຮັດ​ໃຫ້ ສປປ ລາວ ສາ​ມາດ​ນໍາ​ໃຊ້​ຄື້ນ​ຄວາມ​ຖີ່​ດັ່ງກ່າວ ເຂົ້າ​ໃນ​ການ​ສື່ສານ​ຕ່າງໆ ຕາມ​ການ​ສະເ​ໜີ​ໄດ້.

   ໃນ​ກອງ​ປະຊຸມ​ຄັ້ງ​ນີ້ ຍັງ​ໄດ້​ບັນລຸ​ໝາກຜົນ​ທີ່​ສຳຄັນໃນ​ດ້ານ​ການ​ເຊື່ອມ​ໂຍງ​ສາກົນ ດ້ວຍ​ການ​ນຳ​ໃຊ້​ເຕັກ​ໂນ​ໂລ​ຊີ​ການ​ສື່ສານ ທັງ​ພາກ​ພື້ນ​ດິນ ແລະ ອາ​ວະ​ກາດ ໃນ​ອະນາ​ຄົດ ເຊັ່ນ: ການ​ເພີ່ມ​ຄື້ນ​ຄວາມ​ຖີ່​ໃຫ້​ກັບ​ລະບົບ​ໂທລະສັບ​ເຄື່ອນ​ທີ່ 5G ເຊັ່ນ​ຄື້ນ​ຄວາມ​ຖີ່ 26 GHz ແລະ 40 GHz, ການ​ເພີ່ມ​ຄື້ນ​ຄວາມ​ຖີ່​ໃຫ້​ກັບ​ລະບົບ​ການ​ສື່ສານ​ຮູບ​ແບບ​ສະຖານີ​ລະດັບ​ສູງ (HAPS) ເພື່ອ​ເຮັດ​ໃຫ້​ເຂດ​ຊົນນະບົດ ຫ່າງ​ໄກ​ສອກຫຼີກ ສາມາດ​ເຂົ້າ​ເຖິງ​ການ​ນຳ​ໃຊ້​ອິນ​ເຕີ​ເນັດ​ຄວາມ​ໄວ​ສູງ, ລະບົບ​ການ​ສື່ສານ​ດາວ​ທຽມ​ຄວາມ​ໄວ​ສູງ, ລະບົບ​ການ​ສື່ສານ Earth Station In Motion (ESIM) ເພື່ອ​ເຮັດ​ໃຫ້​ຜູ້​ນໍາ​ໃຊ້​ທີ່ຢູ່​ເທິງ​ຍົນ, ເຮືອ ແລະ ລົດໄຟ​ສາມາດ​ນຳ​ໃຊ້​ການ​ສື່ສານ​ໄດ້, ສ້າງ​ມະຕິ​ຕົກລົງ (Resolution) ກ່ຽວ​ກັບ​ລະບົບ​ການ​ສື່ສານ​ສຳ​ລັບ​ການ​ເດີນທາງ ແລະ ຕິດຕາມ​ຂະບວນ​ລົດໄຟ​ຄວາມ​ໄວ​ສູງ ເພື່ອ​ສົ່ງເສີມ​ການ​ພັດທະນາ​ການ​ສື່ສານ​ທາງ​ລົດໄຟ​ໂດຍ​ສະເພາະ​ແມ່ນ​ການ​ຄວບ​ຄຸມ​ການ​ຈະລາ​ຈອນ, ຄວາມ​ປອດ​ໄພ​ຂອງ​ຜູ້ໂດຍສານ ແລະ ການ​ດຳເນີນ​ງານ​ຂອງ​ລົດ​ໄຟ.

   ກອງ​ປະຊຸມ ຍັງ​ໄດ້​ກໍາ​ນົດ​ວິ​ໄສ​ທັດ​ຮອດ​ປີ 2023 ໂດຍ​ຈະ​ເລັ່ງ​ໃສ່​ການ​ພັດທະນາ​ລະບົບ​ຕ່າງໆ​ເປັນຕົ້ນ ລະບົບ Earth Station In Motion (ESIM) ເພື່ອ​ສົ່ງເສີມ​ການ​ເຂົ້າ​ເຖິງ ແລະ ການ​ນຳ​ໃຊ້​ອິນ​ເຕີ​ເນັດ​ຄວາມ​ໄວ​ສູງ​ໃຫ້​ກັບ​ຍົນ, ເຮືອ ແລະ ພາຫະນະ​ພາກ​ພື້ນ​ດິນ, ລະບົບ High-altitude IMT base stations (HIBS) ທີ່​ນຳ​ໃຊ້​ຄື້ນ​ຄວາມ​ຖີ່​ລະບົບ​ໂທລະສັບ​ມື​ຖື​ເດີມ ແຕ່​ນຳ​ໃຊ້​ສະຖານີ HAPS ເພື່ອ​ສົ່ງເສີມ​ການ​ເຂົ້າ​ເຖິງ ແລະ ການ​ນຳ​ໃຊ້​ອິນ​ເຕີ​ເນັດ​ຄວາມ​ໄວ​ສູງ​ໃຫ້​ກັບ​ເຂດ​ພື້ນ​ທີ່​ຫ່າງ​ໄກ​ສອກຫຼີກ, ລະບົບ​ການ​ສື່ສານ​ເຄື່ອນ​ທີ່​ທາງ​ການບິນ ແລະ ລະບົບ​ປ້ອງ​ກັນ​ແຈ້ງ​ເຕືອນ​ໄພ​ທາງ​ທະເລ ເພື່ອ​ເພີ່ມ​ຄື້ນ​ຄວາມ​ຖີ່ ແລະ ພັດທະນາ​ການ​ສື່ສານ​ໃຫ້​ທັນ​ສະ​ໄໝ.

Medialaos Massmedia