ໃນວັນທີ 8 ທັນວາ 2019 ນີ້, ການນໍາແຂວງໄຊຍະບູລີ ນໍາໂດຍ ທ່ານ ພົງສະຫວັນ ສິດທະວົງ, ເຈົ້າແຂວງ ໄຊຍະບູລີ, ພ້ອມດ້ວຍບັນດາຫົວໜ້າ, ຮອງຫົວໜ້າພະແນກການອ້ອມຂ້າງແຂວງ ແລະ ບໍລິສັດຈໍາປາຄໍາ ໄດ້ນໍາເອົາເຄື່ອງຊ່ວຍເຫຼືອບັນເທົາໜາວ ມອບໃຫ້ຄອບຄົວທຸກຍາກ ເມືອງໄຊສະຖານ, ແຂວງໄຊຍະບູລີ,ເຄື່ອງບັນເທົາໜາວທີ່ນໍາມາມອບຄັ້ງນີ້ປະກອບມີ: ຜ້າຮົ່ມ, ສົ້ງ-ເສື້ອກັນໜາວເດັກ ແລະ ຜູ້ໃຫຍ່, ຜ້າພັນຄໍ ແລະ ອຸປະກອນການຮຽນ-ການສອນຈໍານວນໜຶ່ງ ລວມມູນຄ່າທັງໝົດເກືອບ 100 ລ້ານກີບ, ໂດຍໄດ້ມອບຢູ່ 3 ຈຸດຄື:

ຈຸດກຸ່ມບ້ານສະແມດໃຫຍ່, ຈຸດກຸ່ມບ້ານ ກໍ່-ສະປິ ແລະ ຈຸດບ້ານປາກລອງ, ນອກນີ້ຍັງໄດ້ນໍາເອົາເຄື່ອງອຸປະໂພກ-ບໍລິໂພກເປັນຕົ້ນແມ່ນອາຫານແຫ້ງມອບໃຫ້ອ້າຍນ້ອງທະຫານທີ່ປະຕິບັດໜ້າທີ່ປ້ອງກັນຊາຍແດນ, ໂດຍແມ່ນ ທ່ານ ພົງສະຫວັນ ສິດທະວົງ, ເຈົ້າແຂວງ ໄຊຍະບູລີ, ພ້ອມດ້ວຍທີມງານ ມອບ ແລະ ນຸ່ງເຄື່ອງກັນໜາວໃຫ້ເດັກນ້ອຍ, ທັງນີ້ກໍ່ເພື່ອເຮັດໃຫ້ກຸ່ມຄົນທີ່ທຸກຍາກໃນຂອບເຂດທົ່ວເມືອງດັ່ງກ່າວໄດ້ມີເຄື່ອງນຸ່ງຮົ່ມກັນໜາວ, ປາສະຈາກໂລກໄພໄຂ້ເຈັບຕ່າງໆທີ່ມາກັບອາກາດໜາວປີນີ້, ໂດຍສະເພາະແມ່ນຜູ້ເຖົ້າ ແລະ ເດັກນ້ອຍທີ່ມີພູມຕ້ານທານຕໍ່າ, ເພາະເມືອງດັ່ງກ່າວຍັງມີຄອບຄົວທຸກຍາກປະມານ 920 ກວ່າຄອບຄົວ, ເປັນເຂດທີ່ມີຄວາມສູງຈາກລະດັບໜ້ານໍ້າທະເລ 1.300 ກວ່າກິໂລແມັດ, ມີອາກາດໜາວຈັດ ແລະ ມີລົມພັດແຮງຕະຫຼອດປີ, ໂອກາດດັ່ງກ່າວ ທ່ານ ພົງສະຫວັນ ສິດທະວົງ ກໍ່ໄດ້ຮຽກຮ້ອງໃຫ້ພໍ່ແມ່ປະຊາຊົນຈົ່ງພ້ອມກັນເອົາໃຈໃສ່ເບິ່ງແຍງສຸຂະພາບໃຫ້ດີ, ໂດຍສະເພາະແມ່ນຜູ້ເຖົ້າ ແລະ ເດັກນ້ອຍ, ໃນຊ່ວງໄລຍະທີ່ໜາວ, ພ້ອມດຽວກັນຈົ່ງສືບຕໍ່ເກັບກູ້ຜົນຜະລິດໃຫ້ສໍາເລັດ ແລະ ທ່ວງທັນກັບລະດູການ, ສືບຕໍ່ປູກພືດລະດູແລ້ງຕາມຄວາມເໝາະສົມຂອງທ້ອງຖິ່ນ.

ໂດຍ: ອຸ່ນເຮືອນ ໂພທິລັກ.
Medialaos xayaboury